Thyborøn

Vun Wikipedia
Wesseln na: Navigatschoon, Söök

Thyborøn is en Oort in de Amtskommun Ringkjøbing in Däänmark. De Oort hett 2.529 Inwahners un is de Seet vun de Kommun Thyborøn-Harboøre, de aver vun 2007 an to de Kommun Lemvig hören schall. Thyborøn liggt an’n Thyborøn-Kanal, de Nissum Bredning, wat en Deel vun’n Limfjord is, mit de Noordsee verbinnt un Jütland vun dat noordjüütsche Eiland trennt. Fröher geev dat dissen Kanal noch nich un de Limfjord weer nich mit de Noordsee verbunnen. Eerst bi ene Stormfloot an’n 3. Februar 1825 is de Landeng dörbraken.

De Oort leevt vun Fischeree un Tourismus. In’n Tweten Weltkrieg weer de Oort Deel vun’n Atlantikwall. En poor Bunkers ut disse Tiet, de op de Dünen bi’n Strand staht, sünd dorvun noch Teken. En Deel vun de Bunkers is as Museum utboot.

Annere Attrakschonen sünd dat Aquarium Jyllands Akvariet, dat Fiskeri og Redningsmuseet (Fischeree- un Rettungsmuseum), un dat Sneglehuset, en Huus, dat kumplett mit Sniggen- un Musselschellen dekoreert is.