Thomas Edward Bowdich

Vun Wikipedia
Wesseln na: Navigatschoon, Söök
Thomas Edward Bowdich

Thomas Edward Bowdich (* 20. Juni 1791 in Bristol; † 10. Januar 1824 bi Bathurst) weer en britischen Avendürer, Schriever un Zooloog.

Dör Hülp vun sien Unkel J. Hope-Smith, de de Guvernör vun de britische Siedlungen an de Goldküst weer, kreeg Bowdich en Anstellen as Sekretär in’n Deenst vun de African Company of Merchants, de em 1814 na Cape Coast schicken dei. 1817 schicken se em tosamen mit twee Kollegen na Kumasi to’n König Osei Bonsu vun Ashanti op en Mission, de dat Sekern vun de britische Kuntrull över de Inwahners an de Küst to ehr Opgaav harr. Besünners dör dat diplomaatsche Geschick vun Bowdich kunn de Mission mit Spood afslaten warrn. 1818 keem Bowdich na England trüch un geev een Johr later den Bericht över siene Mission un siene Beobachtungen in Kumasi rut. Siene afrikaansche Sammlung schenk he dat Britische Museum. Bowdich attackeer apentlich dat Leid vun’t Afrikaansche Kommittee. Siene Raatslääg weren Grundlaag bi de Övernahm vun de direkte Kuntrull över de Goldküst dör de britische Regeren.

Bowdich leev vun 1820 bet 1822 in Paris, wo he Mathematik un Naturwetenschoppen studeer. He harr en eng Verhältnis to Georges Cuvier, Alexander von Humboldt un annere Naturwetenschoplers. In de Tiet in de he in Frankriek weer, schreev Bowdich blangen diverse Warken över Afrika ok wetenschopliche Arbeiden. Ut zooloogsche Sicht sien bedüdendst Wark weer An analysis of the natural classifications of Mammalia, for the use of students and travelers, in dat he dree systemaatsche Gruppen vun Söögdeerter as tosamenhöörig erkennen dei un ehr Kennteken beschreev: de Röövdeerter (Carnivora), Gnaagdeerter (Rodentia) un Insektenfreters (Insectivora).

An’n 10. Januar 1824 bleev he na en Malaria-Infekschoon bi Landvermetensarbeiden in’t hüdige Gambia dood.

Warken[ännern | Bornkood ännern]

  • An analysis of the natural classifications of Mammalia, for the use of students and travelers (Paris, 1821)
  • Excursions in Madeira and Porto Santo . . . to which is added A Narrative of the Continuance of the Voyage to its Completion (London, 1825)
  • An Account of the Discoveries of the Portuguese in . . . Angola and Mozambique (London, 1824)
  • A Reply to the Quarterly Review (Paris, 1820)