Thirteen Days
| Filmdaten | |
|---|---|
| Plattdüütsch Titel: | — |
| Originaltitel: | Thirteen Days |
| Düütsch Titel: | Thirteen Days |
| Produkschoonsland: | USA |
| Johr vun’t Rutkamen: | 2000 |
| Läng: | 140 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | Roger Donaldson |
| Dreihbook: | David Self |
| Produkschoon: | Peter O. Almond, Armyan Bernstein, Kevin Costner |
| Musik: | Trevor Jones |
| Kamera: | Andrzej Bartkowiak, Roger Deakins, Christopher Duddy |
| Snitt: | Conrad Buff IV |
| Dorstellers | |
| |
Thirteen Days (op Platt so veel as „Dörteihn Daag“) is de Titel vun en US-amerikaanschen Polit-Thriller ut dat Johr 2000. De Film befaat sik mit de dörteihn Daag lange Kuba-Krise ut Sicht vun de US-Amerikaners. De Film baseert op histoorsch Material un orienteert sik to’n gröttsten Deel an dat, wat ut de Tiet överlevert is. Rutkamen is dorbi en Mischen ut Thriller un Dokumentatschoon. De Hööftpersonen vun den Film sünd Kenneth O’Donnell (Kevin Costner), de politische Berader vun Präsident John F. Kennedy, de Präsident sülvst (Bruce Greenwood) as ok sien Broder Robert F. Kennedy (Steven Culp). Speelbaas weer Roger Donaldson.
Inholt[ännern | Bornkood ännern]
De Film fangt dormit an, dat de US-Amerikaners dör Biller, de en Opkloorfleger över Kuba maakt hett, rutfinnt, dat de Sowjetunion dor nukleare ballistische Bodden-Bodden-Middelstreckenraketen installeeren doot. De Atomraketen stellt en grode Gefahr för de USA dor, vun wegen, dat se vun dor ut meist jeed Teel in de USA mit en Vörwarntiet vun blots fief Minuuten drapen künnt.
Ünner gröttst Geheemhollen versammelt de Präsident John F. Kenndy en Staff vun Beraders üm sik. En grode Tall vun Politikers un sünners hoochrangige Militärs snackt sik för en gauen Luftangreep un an ansluten Invasion vun Kuba ut, üm dat se de Raketen los warrn mööt, man de Präsident versöcht, de gefährliche Laag mööglichst ahn Anwennen vun Gewalt ünner Kontroll to bringen. Man de Tiet lööpt gegen Kennedy, vun wegen dat mit jeden Dag, de verstrieken deit, de Wohrschienlichkeit grötter warrt, dat de Sowjets ehr Raketen to’n Afscheten klor maken künnt.
Na veel Diskuschoon warrt opletzt en Blockaad vun dat Eiland dörsett. Vun wegen, dat en Blockaad as en kriegerischen Akt verstahn warrn künn, warrt de Akschoon ünner den Begreep „Quarantäne“ dörföhrt. Dorünner is to verstah, dat jeed Schipp, dat op’n Weg na Kuba is, egal ut wovun Land un wovun Haven dat kamen is, vör de Küst anhollen un dörsöcht warrt. In den Fall, dat an Boord Wapen funnen warrt, warrt dat Schipp afwiest un torüchschickt.
To glieken Tiet warrt in New York en Vullversammeln vun de UN afhollen, bi de de USA scharp angrepen warrt, vun wegen, dat se disse Blockaad maken doot. Man, de US-amerikaansch Vertreder, Adlai Stevenson, kann de Welt dorvun övertügen, dat dat wohrhaftig Raketen op Kuba gifft.
Toeerst hett de Blockaad Spood, man denn kaakt de Situatschoon hooch, as sik een vun de russ’schen Schipp de Ünnersöken verseggt un straks wieterschippert. Nu kriggt Kennedy opn inoffiziellen Weg en Breef vun den sowjetischen Staatsbaas Chruschtschow, wo de em in anbeden deit, de Raketen vun Kuba wedder aftotehn, wenn de Amerikaners sik in’n Gegentog praat wiest, op en Inavsion to verzichten. Man, wat later drööpt en tweeten Breef in, de wat ganz anners vertellt, de aver liekers ok vun Chruschtschow kamen schall. De amerikaansche Krisenstaff is unseker, wat dorvun to hollen is un wat Chruschtschow wohrhaftig noch sülvst de Macht in de Sowjetunion utöven deit. De Luftangreep mit en ansluten Invasion blifft wieter op de mööglicherwies notwännigen Optschonen.
As wedder en Opkläärflaag stattfinnt, warrt de US-amerikaansche Fleger mit en Bodden-Luft-Rakete afschaten. De Pilot kummt dorbi üm. Dormit warrt de Krieg jümmer wohrschienlicher. As letzte Hapen schickt Kennedy sien Broder Robert na den sowjetschen Bottschopper Dobrynin, üm noch mol to verhanneln. As O’Donnel un Robert Kennedy bi de Bottschop ankaamt, stellt se fast, dat de Sowjets al dorbi sünd, jemehr Dokumenten to verbrennen. Dat is en Teken dorför, dat se dorvun utgaht, dat de Krieg nu vör de Dör steiht. Robert Kennedy sleiht vör, de US-amerikaanschen Jupiter-Raketen ut de Törkie aftotehn un op en Invasion vun Kuba to verzichten, wenn de Sowjetunion jemehr Raketen foorts wedder afteht. Man, de Verhanneln mööt aflsuut geheemn blieven, üm dat de USA na buten hen nich as week un nageven dorstaht. He maakt klor, dat dat Utbreken vun’n Krieg nu blots noch vun de sowjetschen Reakschoon op dat Anboot vun Kennedy afhangt un de Tiet aflöpt.
An’n nächsten Morgen is de Krise wohrhaftig to Enn. Chruschtschow hett Order geven, de Raketen wedder aftoboen un torüch na de Sowjetunion to bringen. An’t Enn vun’n Film sütt man den Präsidenten Kennedy, sien Broder Robert un sien Berader O’Donnell op en Terass vun’t Witte Huus stahn. In’n Achtergrund is en Reed vun Kennedy to höörn.
Kritiken[ännern | Bornkood ännern]
Cinema: „Brillant fotografierte Bilder, perfekte Ausstattung und eine geschmeidige Verdichtung der historischen Ereignisse aus US-Sicht, die Abiturienten mit Leistungskurs Geschichte oder Politik nicht verpassen sollten.“
Utteken[ännern | Bornkood ännern]
De Film is för teihn Filmpriesen vörslahn worrn. Dorvun hett he dree wunnen:
- 2001: mit den Golden Satellite Award in de Kategorie Best Filmsnitt för Conrad Buff IV.
- 2001: mit den Golden Satellite Award in de Kategorie Best Nevendorsteller för Bruce Greenwood.
- 2001: mit den Political Film Society Award för’n Freden.
Weblenken[ännern | Bornkood ännern]
- Thirteen Days in de Internet Movie Database (engelsch)
- Inholt un Kritik op Filmspiegel