The Perfect Storm (Film)

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: The Perfect Storm
Düütsch Titel: Der Sturm
Produkschoonsland: USA
Johr vun’t Rutkamen: 2000
Läng: 125 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Wolfgang Petersen
Dreihbook: Bill Wittliff
Vörlaag: Sebastian Junger
Produkschoon: Gail Katz
Wolfgang Petersen
Paula Weinstein
Musik: James Horner
Kamera: John Seale
Snitt: Richard Francis-Bruce
Szenenbild: William Sandell
Kledaasch: Erica Edell Phillips
Dorstellers

The Perfect Storm (op platt so veel as „De perfekte Storm“; dt.: Der Sturm) is de Titel vun en Filmdrama ut dat Johr 2000, bi den Wolfgang Petersen Speelbaas weern. De Katastrophenfilm baseert op en wohre Geschicht, de sik in’t Johr 1991 todragen hett. Dat Dreihbook weer na dat Saakbook The Perfect Storm vun Sebastian Junger schreven, dat den Vörfall oparbeit hett. De Hööftrullen in den Film speelt George Clooney un Mark Wahlberg.

Inholt[ännern | Bornkood ännern]

De Andrea Gail is en Fischereeschipp, dat för den Fang vun Sweertfisch utrüst is. Kumm dat dat Schipp twee Daag wedder in sien Heimathaven Gloucester legen hett, will de Kaptein Billy Tyne wedder torüch op’n Atlantik, vunwegen dat sien letzten Fohrten teemlich mau weern un he nu noch mol op den groten Fang hapen deit. Sien Mannschop sett sik ut Daglöhners tohopen. Gröttstendeels deen se lever an Land blieven un fohrt blots gegen jemehrn Willen mit, man dat Geld lockt jem. Ünner de Seelüüd is ok Bobby Shatford, de gegen den Willen vun sien Fründin Christina mit an Boord geiht.

Man, ok ditmol löpt dat eerst nich recht. Dorüm beslutt Billy vun jemehr Fangrebeet, de Neefundlandbank (engelsch: „Grand Banks“) , aftodreihn un dat Flemish Cap, ööstlich dorvun, antostüern. De See geiht swoor un so gifft dat ok Unfäll an Boord, wiel de Stimmung jümmer slechter warrt. Man, opletzt künnt se wohrhaftig jemehr Lagerrüüm opfüllen. Aver de Technik speelt nich mit: De Iesmaschien fallt ut, so dat se foorts ümdreihn un op gausten Weg torüch na jemehrn Haven mööt, vördem de hele Fisch ünner Deck verdarven deit. De Kru will dat versöken, ofschoonst dat Schipp dorför midden dör en gresigen „Superstorm“ dörschippern mutt. En Storm vun biblisch Utmaat, de ok al en Seilschipp to’n Kentern bröcht hett un sülvst grote Containerschipp in Gefohr bringt. De Storm kummt tostannen dör en Kooltfront, de mit den Hurrikan „Grace” tosamenstöten deit un as’n Explosion över de See kummt. De Kru vun dat Seilschipp warrt mit en Seenootrettungsheevschruver in Sekerheit bröcht, de glieks dorna wedder torüch op de See flüggt na de letzte Positschoon, de vun de Andrea Gail bekannt is. Intwüschen hett dat Schipp aver sien Funkantenn verloren. As de Heevschruver keen Sprit mehr hett, mutt he afdreihn. De Versöök vun en Betanken in de Luft geiht dorneven, un opletzt stört he af. Een Mann vun de Besatten blifft doot, de annern warrt vun en Rettungsschipp opnahmen.

Intwüschen is de Andrea Gail midden in’n Storm ankamen, un de Kru mutt üm’t Överleven kämpen. De Mannschap hett allns geven, üm den Storm bitokamen. Aver Billy beslutt nu, den Fang optogeven un dat Schipp wedder ut’n Storm ruttostüern. Na en gefährliche Wennen sütt dat ut, as weer dat Dullste vörbi. Man, op eenmol kummt en Monsterbülg op un versenkt de Andrea Gail. De Mannschop, de sik ünner Deck in Sekerheit bröcht hett, hett keen Mööglichkeit sik to redden: As Kaptein mag Billy sien Schipp nich verlaten un will lever mit em ünnergahn. As eenzigen ist dat Bobby, de noch versöcht, sik to redden un an de Waterböverflach to kamen. Opletzt kann aver ok he nich mehr reddt warrn. To’n Enn vun’n Film warrt in de Kark vun Gloucester en Truerfier för de vermissten Seelüüd afhollen un dat Süsterschipp, de Hannah Boden löpt bi schöön Weder ut’n Haven ut.

Kritik[ännern | Bornkood ännern]

De Kritikers hebbt sik grotendeels goot över den Film utlaten. James Berardinelli hett den Film op ReelViews as opregen, engageert un majestäätsch betekent un loov em sünners dorför, dat de histoorsche Achtergrund nich wegen de Dramaturgie ännert weern. Ok dat Speel vun Wahlberg un Clooney stell he positiv rut. In de Chicago Sun-Times vun’n 30. Juni 2000 stell Roger Ebert aver fast, dat de Film alleen op Sensatschoon utricht weer, un keen kumplexe Figuren oder utprägte Geschicht opwiesen de.

Dat Lexikon vun’n internatschonalen Film beschrifft den Film as Aventüerfilm in klass’sche Traditschoon, de sik veel Tiet för’t Vörstellen vun de Personen nimmt un gliektietig moderne Technik insetten deit. Wiel de hele Tiet över de Tokiekers tofreden stellt warrt, wiekt dat Enn vun’n klass’schen Hollywood-Film af[1].

Utteken[ännern | Bornkood ännern]

The Perfect Storm weer alltohopen för 27 Filmpriesen vörslahn, dorünner ok tweemol för den Oscar in de Kategorien Best Toon un Best Trickeffekt. Wunnen hett de Film veer Priesen:

  • 2000: den Bogey Award för Warner Bros.
  • 2001: den BAFTA Film Award in de Kategorie Beste Leistung bi Trickeffekten för Stefen Fangmeier, John Frazier, Walt Conti, Habib Zargarpour un Tim Alexander
  • 2001: den Taurus Award in de Kategorie Beste Waterarbeit för Michael T. Brady, Pete Turner un Sean Graham
  • 2001: den ASCAP Award in de Kategorie Top Box Office Films för James Horner

Anners wat[ännern | Bornkood ännern]

De Film is in Orlando, Gloucester un in Burbank dreiht worrn[2]. Los güng dat mit de Dreiharbeiten an’n 26. Juli 1999 un duer bit to’n 23. Dezember 1999.[3], wobi dree Dreihdaag an’n Rand vun den Hurrkan Floyd legen hebbt[4]. Dat Budget vun den Film is op 140 Millionen US-Dollar schätzt worrn[3].

An’n 26. Juni 2000 Hett de Film sien Weltpremier hatt, in Düütschland weer he siet den 2. Juli 2000 to sehn[5]. Dat eerste Wekenenn hett he in de USA al 41,3 Millionen US-DOllar inspeelt. Alltohopen schall de Film alleen in de USA 182,6 Millionen US-Dollar inspeelt hebben. Weltwiet weern dat so üm un bi 327 bit 328 Millionen US-Dollar[3][6].

Vör de Rull Bobby Shatford weer toeerst Nicolas Cage vörsehn, de aver wegen annere Plichten aflehnen müss. Dat Schipp „Lady Grace“, dat in den Film as Andrea Gail to sehn is, is von Legal Sea Foods, en Restaurant ut Boston, köfft worrn, üm dorut in Gloucester en swemmen Andenken an all Seefohrers to maken, de op de See jemehr Leven laten hebbt[4].

Borns[ännern | Bornkood ännern]

  1. Filmkritik in’t Lexikon vun’n internatschonalen Film
  2. Dreihöörd na Internet Movie Database
  3. 3,0 3,1 3,2 Budget un Inspeelresultaten na Internet Movie Database
  4. 4,0 4,1 Achtergrundto’n Film op Internet Movie Database
  5. Startdaten na Internet Movie Database
  6. The Perfect Storm (2000) op Box Office Mojo, afropen an’n 2. Februar 2011

Weblenken[ännern | Bornkood ännern]