The Lake House

Vun Wikipedia
Filmdaten
Plattdüütsch Titel:
Originaltitel: The Lake House
Düütsch Titel: Das Haus am See
Produkschoonsland: USA
Johr vun’t Rutkamen: 2006
Läng: 95 Minuten
Originalspraak: Engelsch
Öllersfreegaav in Düütschland: FSK ahn Minnern
Filmkru
Speelbaas: Alejandro Agresti
Dreihbook: David Auburn
Produkschoon: Doug Davison,
Roy Lee
Musik: Rachel Portman,
Paul M. van Brugge
Kamera: Alar Kivilo
Snitt: Alejandro Brodersohn,
Lynzee Klingman
Szenenbild: Nathan Crowley
Kledaasch: Deena Appel
Dorstellers

The Lake House (op Platt so veel as „Dat Huus an’n See“; dt.: Das Haus am See) is de Titel vun en US-amerikaansch Filmdrama ut dat Johr 2006, in dat Sandra Bullock un Keanu Reeves de Hööftrullen speelt. In de USA keem de Film an’n 16. Juni 2006 in de Kinos. In Düütschland weer de Filmstart an’n 6. Juli 2006.

De Film stellt en Remake dor vun den süüdkoreaanschen Film Siworae (dt.: Il Mare – Das Haus am Meer) ut dat Johr 2000.

Inholt[ännern | Bornkood ännern]

De Doktersche Kate Foster hett längere Tiet in en Huus an en See wahnt, tütt denn aver na Chicago, woneem se en Steed in’t Krankenhuus annimmt. För ehrn Namieter lett se en Naricht dor. Alex Wyler, den sien Vadder dat Huus inst boot hett, finnt de Naricht un wunnert sik, vun wegen dat he dacht hett, dat in dat Huus vörher keeneen wahnt hett. Över den Breefkasten vör’t Huus tuuscht Kate un Alex wietere Narichten ut un warrt op dissen Weg mehr vunenanner wies.

Bald stellt sik rut, dat Alex in’t Johr 2004 leevt, man Kate leevt in’t Johr 2006. An ehrn Geboortsdag 2006 sitt Kate alleen in een Bar un denkt torüch an een Mann, den se twee Johr fröher op ehr Geboortsdagfier drapen hett. De Film wiest, woans Alex in’t Johr 2004 tofallig den dormoligen Fründ vun Kate drapen hett un bilöpig to de Fier inlaadt warrt. He weet to den Tietpunkt al över Kate Bescheed ut de Brefen, man Kate kennt em noch nich. Op de Terasse vun dat Huus sitt Kate un Alex un snackt över den Roman Persuasion vun Jane Austen, de in de düütschen Synchronisatschoon „Verführung“ nöömt warrt. Dorin warrt en Poor splitt warrt un sik nich finnen künn. Se danst un geevt sik dorbi en Söten.

In’n nächsten Breef an Alex hollt se em vör, dat he ehr nich seggt hett, wokeen he is. Man he antwoort, dat se em för nich ganz gor hollen harr.

Simon Wyler, Alex Vadder, de en beropenen Architekt is, warrt mit en Hartinfarkt in’t Krankenhuus bröcht. In sien Paperen in’t Krankenhuus stellt Kate fast, dat he kort dorop dood bleven is. Se beduurt, dat se nich bi Aley wesen kann, üm em Troost to geven. Se schickt em en Book to, dat eerst in de tokamen Tiet över sien Vadder schreven warrt.

Mit de Tiet finnt de beiden toenanner un se maakt en Drapen af. Man Alex kummt nich. Kate vertellt em dat, man he kann nich begriepen, worüm he in de tokamen Tiet nich dor is. He versöcht, sik en tweet mol mit Kate an Drapen aftosnacken. Se kann dorin aver keen Sinn sehn, as se dat Geföhl hett, dat jem dat vun’t Schicksal nich vergönnt is, dat se sik draapt un lohnt af, dat se dat wieter versöken doot. He will ehr aver nich opgeven un schrifft wieter Brefen. Man, he kriggt keen Antwoort mehr.

In’t Johr 2006 is Alex mit sien Broder ünnerwegens. As de em doran denken helpt, dat jüst de Valentinsdag 2006 is, mutt he op’n Slag an Kate torüchdenken un an een Breef vun ehr, in den se vertellt, dat se an’n Valentinsdag Tüüg worrn is, as en Unfall paseert is. Dorbi is en Mann üm’t Leven kamen. Üm ruttofinnen, woneem nipp un nau de Unfall passeert is, föhrt he rut na dat Huus an’n See.

To de „glieken Tiet“, twee Johr later, sitt Kate bi Alex’ Broder in’t Büro, üm sik vun em en Huus inrichten to laten. An de Wand finnt se en Bild, dat utsütt as dat Huus an’n See un se fraagt den Broder, wokeen dat tekent hett. He vertellt ehr, dat sien Broder dat weer, man dat he vör nipp un nau twee Johr bi en Unfall dood bleven weer. Op’ Slag warrt Kate klor, dat Alex de Mann weer, den se an’n Valentinsdag 2006 na den Autounfall nich mehr redden künn. De eenzige Weg mit de verleden Tiet to snacken, is de Breefkasten an dat Huus an’n See. Foorts föhrt se dorhen un schrifft em en Breef, in dem se em verklort, dat he de Mann is, de ümkamen weer, un he nich versöken schall ehr an den Dag optosöken. He schall noch mol twee Johr töven un an’n Valentinsdag 2008 wedder na at Huus an’n See kamen.

Se töövt, dat de Breefkasten apengeiht, as Teken dorför, dat Alex den Breef kregen hett. Tatsächlich leest Alex den Breef 2006. In de folgen Szeen kummt he 2008 mit sien Auto üm de Eck föhrt. Beid fallt sik in de Arms un küsst sik – na all de Tiet hebbt se sik endlich wedderfunnen.

Kritiken[ännern | Bornkood ännern]

James Berardinelli hett dat Dreihbook mit en Swiezer Kees vergleken. He meen, dat dat Enn „konventschonell weer“.[1]

Roger Ebert hett in de Chicago Sun-Times schreven, dat de Inholt op Paradoxien baseert, de dat Happy End unmööglich un unlogisch maakt. Dat Speel vun Bullock un Reeves künn man aver mögen.[2]

Op moviereporter.net schreev Frank Neumann vun en wunnerschöön melancholische Geschicht över de Leef un de sünnerlichen Weeg, de se mitünner geiht. He meen, dat dat de perfekte Film för Lüüd mit Lengen oder de sik jüst verkeken hebbt.[3]

Dit un dat[ännern | Bornkood ännern]

De Film weer vun Warner Bros. produzeert. De Produkschoon hett na’n Schätzung üm un bi 40 Millionen US-Dollar köst. In de Kinos vun de USA hett de Film 52,32 Miollionen Dollar inspeelt. In de britschen Kino weern dat 2,715 Mio. Pund Sterling[4].

Dat Restaurant, in dat sik Kate un Alex drapen wüllt, hett den Naam „Il Mare“. So hett ok de internatschonale Originalverschoon ut Süüdkorea.

Filmpriesen[ännern | Bornkood ännern]

De Film hett twee Nomineeren vun de Teen Choice Awards kregen in de Kategorien Movies – Choice Chick Flick un Movies – Choice Liplock. In de tweeten Kategorie is de Film ok wirklich mit den Pries uttekent worrn.

Borns[ännern | Bornkood ännern]

  1. James Berardinelli över The Lake House
  2. Roger Ebert över The Lake House
  3. www.moviereporter.net
  4. Business Data for The Lake House

Websteden[ännern | Bornkood ännern]