The Adjustment Bureau

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: The Adjustment Bureau
Düütsch Titel: Der Plan
Produkschoonsland: USA
Johr vun’t Rutkamen: 2011
Läng: 109 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: George Nolfi
Dreihbook: George Nolfi
Produkschoon: George Nolfi
Chris Moore
Michael Hackett
Bill Carraro
Isa Dick Hackett
Joel Viertel
Musik: Thomas Newman
Kamera: John Toll
Snitt: Jay Rabinowitz
Szenenbild: Kevin Thompson
Kledaasch: Kasia Walicka-Maimone
Dorstellers

The Adjustment Bureau (op plattdüütsch so veel as „Dat Büro för’t Richtigstellen“; dt. Titel: Der Plan) is de Titel vun en US-amerikaanschen Science-Fiction-Film ut dat Johr 2011. Dat Dreihbook hett Geogre Nolfi schreven, de sülvst ok Speelbaas weer. De Inholt baseert op de Kortgeschicht Adjustment Team vun Philip K. Dick ut dat Johr 1954. Matt Damon un Emily Blunt speelt de Hööftrullen in den Film.

Inholt[ännern | Bornkood ännern]

David Norris is en jungen Politiker in’n US-amerikaanschen Kongress mit Intelligenz un grote Utstrahlen. As he för den Senat vun’n Staat New York kandideert, steiht he hooch in’n Kurs, fallt denn aver över de Presse, de Geschichten ut siene Jöögd publiek maakt. An’n Wahlavend is kloor, dat he verleren deit. Dör en Tofall dröpt he Elise, de sik vun de sellschopplichen Dörsnitt afsetten deit un Norris to en vun sien besten Anspraken inspireeren deit. De beiden markt foorts, dat se sik geern hebbt, verleert sik aver jüst so foorts ok wedder ut de Ogen.

En Tiet later sütt he ehr dör en Tofall in’n Bus wedder, as he op’n Weg na de Arbeit is. David lett sik de Telefonnummer geven, üm den Kuntakt to hollen. As he in sien Büro ankummt, maakt he en snaaksche Opdecken: All de Mitarbeits staht still as infroren, wiel Mannslüüd mit Antöög un Hööd an de Mitarbeiters rümfummeln doot. David will utneihn, warrt aver fangen sett. Em warrt verkloort, dat dat Leven in de Sellschop na en Plaan aftolopen hett, den de so nöömte „Vörsitter“ utklamüstert hett. Un se sülvst weern de Lüüd, de dorför to sorgen harrn, dat disse Plaan ok inhollen warrt. So schüll t. B. David den Morgen to laat na’n Bus kamen. De Plaan sütt neemlich nich vör, dat he Elise weddersehn schüll un vun jemehr Arbeit in’t Büro harr he denn ok nix mitkregen. David warrt kloor maakt, dat he nich över den Plaan un de Mackers snacken dröff, anners müss bi em en Reset maakt warrn, wobi all sien fröher’t Weten un sien Geföhlen löscht warrt. Ok Elise ehr Nummer warrt verbrennt, ümdat he ehr nich wedder drapen kann. Denn laat se em gahn un he leevt sien Leven wieter.

Dree Johren Later dröpt he Elise aver doch wedder. Dat fallt ehr swoor em natosehn, dat he sik nich wedder bi ehr mellt hett. He vertellt ehr nix vun sien Drapen mit de Lüüd vun’t Plaanbüro, si sik aver kloor doröver, dat se achter em ran sünd, un de beiden uteneen hollen wüllt. Liekers hett he ehr so geern, dat he ehr nich wedder ut de Ogen laten müch. För de Plaaners warrt David to en echt Problem, vunwegen dat de Utwirken op jemehr Levens jümmer grötter warrt, je länger de beiden tosamen sünd. De Afwieken vun’n Plaan warrt jümmer mehr.

Dat stellt sik nu aver rut, dat fröhere Versionen vun’n Plaan vörsehn harrn, dat de beiden förenanner bestimmt weern. So is nu ok för de Plaaners to verstahn, dat de beiden so anenanner hangt. David warrt gewohr, dat de Plaaners in’t Entwickeln vun de Minschheit al bit to’t Röömsche Riek ingrepen hebbt. As se de Minschen sik sülvst överlaten harrn, güng dat in’t Middelöller mit jem bargdaal, so dat se bit to de Industriellen Revolutschoon wedder en Plaan opsett harrn. Dorna kemen de beiden Weltkriegen, so dat de „Vörsitter“ nu wedder en ne’en Plaan maakt hett, üm dat sik de Minschen nich sülvst tonichten maken doot.

As sik David un Elise wieter neger kamt, warrt em vertellt, wat de Plaan vörsütt: He schall Präsident warrn un Elise en weltberopene spoodrieke Danzersche un Choreograafsche. Man beide künnt jemehr Drööm nich beleven, wenn se tohopen blieft. Ofschoonst David för Elise ahn Tögern op de Präsidentschop fleiten de, will he ehr Loopbahn nich op’t Speel setten. He lett ehr wedder alleen.

Ölven Maanden later is David wedder op de Hööch vun sien politische Loopbahn un Elise hett gliekermaten Spood mit ehr Dansen. Denn warrt David aver gewohr, dat Elise heiraten will, wat em swoor tosetten deit. He kriggt Besöök vun Harry, een vun de Plaaners, de em vertellt, dat dat nich wohr warrn mutt, wat em över de Utwirken vun jemehr Tosamenblieven vertellt worrn is. He wiest David, woans he sik en Tiet lang vör de annern Plaaners versteken un to Elise kamen kann, üm ehr Hochtiet to hinnern. Wohrhaftig kummt he rechtietig an. Üm aver Elise sien Grünnen kloor to maken, kann he nu nich anners, as vun den Plaan un den „Vörsitter“ to vertellen.

Foorts warrt en Grupp vun Plaaners losschickt, üm David sien Weten to löschen. Elise weet eerst nich, wat se vun sien Geschicht holen schall. Üm David aver nich noch mol wedder to verleren, neiht se mit em ut. David sütt blots een eenzigen Utweg: He will de Vörsitter sülvst drapen. Tosamen mit Elise brickt he in’t Plaanbüro in. Dor warrt se vun de Plaaners ümstellt un fastsett, vördem de denn Vörsitter drapen hebbt. Man, de hett in de Twüschentiet en ne’en Plaan opstellt: Elise un David drööft nu tosamen blieven. Harry, de dissen Utweg mööglich maakt hett, vermoodt to’n Sluss, dat de Saak villicht blots en Test weer, vunwegen dat sik dat Büro för’t Richtigstellen inst wedder vun de Minschen torüchtehn will.

Kritik[ännern | Bornkood ännern]

  • Cinema.de: "Der Plan" ist ein unausgegorener Mischmasch aus "Matrix"-Paranoia und Mysteryromanze, gut gespielt, aber wie so oft in Filmen des Wir-wissen-alles-schon-vorher-Genres voll logischer Ungereimtheiten.[1]
  • Zeit.de: Mit Matt Damon und Emily Blunt in den Hauptrollen geht «Der Plan» perfekt auf. Es ist mehr eine Romanze mit Tiefgang, die um Sinnfragen kreist, als ein Science-Fiction-Thriller, der von Action lebt.[2]

Anners wat[ännern | Bornkood ännern]

De Film is vör allen in Manhattan dreiht worrn. Bi en Aukschoon vun Media Rights Capital hett Universal Pictures den Film köfft.[3]

För de Rull vun de Dansersche Elise weer toeerst Matt Damon sien Steefsüster Sarah Bradford in de Utwahl. Se hett dat aver foorts aflehnt, as se gewohr worrn is, dat ehr Rull en Sexszeen mit Damon vörsehn harr.[4] Se hett aver in en Nevenrull in den Film mitspeelt.

Borns[ännern | Bornkood ännern]

  1. cinema.de – Kritik
  2. zeit.de – Kritik
  3. Michael Fleming: Emily Blunt boards 'Bureau' in Variety vun’n 14. Juli 2011, afropen an’n 28. Juli 2011}}
  4. Matt Damon: Fast Sexszene mit Schwester op Kino.de vun’n 21. Oktober 2010, afropen an’n 14. Januar 2011

Weblenken[ännern | Bornkood ännern]