Textkritik

Vun Wikipedia
Wesseln na: Navigatschoon, Söök

De Textkritik oder textkritische Methode (ooldgreeksch κρίνω krínō „unnerscheden, utsorteeren, utwählen“) is en Methode, de unnersöken deit, wie Texte un Dokumente, de ut de Historie up us tokamen sünd, tostann kamen un wietergeven wurrn sünd. Se warrt faken bruukt, wenn dat en ganze Reeg vun verscheden Textformen gifft un denn en „kanonischen“, oder „Ur“-Text wedder herstellt weern schall. De Textkritik höört to de Editionsphilologie to, de wedder en Twieg vun de Literaturwetenschop is. Bi en Edition schall meist en kritische Utgave vun en Text torecht maakt weern. Düsse Utgave schall to lesen sien un dat, wat de Rutgevers ännert hefft, is dor in antekent. Textkritik hett dat nich dor up afsehn, en Text ut to leggen. Se scheert sik veel mehr um de Grundlaag vun dat Utleggen un bringt dat Material tostanne, dat denn in de Exegese oder Textinterpretation up den Inholt hen unnersocht warrt.

De Methode[ännern | Bornkood ännern]

De Textkritik ehre Grundlage is dat Verglieken vun allerhand (handschriftliche oder druckte) Versionen vun en Text. Wenn dat mööglich is, weert se toeerst na de Tied vun ehr Tostannekamen sorteert. Achterna weert se Woort up Woort un Satz up Satz vergleken.

Wenn dat Original vun en Handschrift verschütt gahn is, besteiht de Textkritik ehre Upgave dor in, en Archetyp tohopen to stellen. Dat is en Version vun den Text, de so wiet, as dat man geiht, overeen stimmt mit de allereerste Version vun düssen Text. Later hett sik düsse allererste Text bi dat Afschrieven oder Drucken jummers en beten ännert. Dor sünd Fehlers bi maakt wurrn oder een hett ok mit Afsicht dor wat an rumfummelt.

Lange Tied weer dat so, dat de Forschers, de sik mit Textkritik befaten döen, de Meenung weern, se konnen worraftig de Urform vun en Text wedder herstellen. Hüdigendags warrt dat betwiefelt.

De Textkritik is een vun de Warktüge vun de Histoorsche Kritik, sunnerlich bi de Bibelexegese.