Tephra

Vun Wikipedia
Wesseln na: Navigatschoon, Söök
Tephra op de Azoren: En grote Bomb ümgeven vun Aschen un Lapilli.

As Tephra (ut dat greeksch: „Aschen“) warrt in de Geologie und Mineralogie unafhangig vun Grött un Tosamensetten all de Stenen tohopenfaat, de bi en Vulkanutbrook utsmeten un hooch in de Luft föddert warrt. In de Luft köhlt dat Material gau af un warrt noch in’n Fallen fast.

Tephra kummt tomeist bi explosionsoortige Erupschonen tostannen un hett dorüm faken rhyolithische Tosamensetten, wiel de mehrsten explosiven Vulkanen dat Ergevnis vun Lava mit hogen Kieselsüürandeel sünd. Vulkanologen seggt to Tephra ok Pyroklastika oder eenfach Klastika. wenn Tephra na de Lannen noch hitt noog is, kann dor Tuff oder Pyroklastisch Steen ut warrn.

Tephra warrt in dree verscheeden Gröttenklassen ünnerdeelt:

  • Aschen sünd Partikels, de in’n Dörmeter lütter as 2 mm sünd.
  • Lapilli sünd vulkaansch Slacken, wo de Deelken twüschen 2 mm un 64 mm groot sünd.
  • Vulkaansch Bomben warrt alln’s nöömt, wat grötter as 64 mm is.

De Verdelen vun aflagerte Tephra is dorbi vun groot na lütt. Vulkansche Bomben warrt dicht bi’n Vulkankrater aflagert, de lütteren Lapillideelkens fleegt al bedüdend wieter un de Aschen künnt sik mitünner över’n ganzen Globus verdelen, wiel sik de fienen Partikels bit to en poor Weken in de Stratosphäär ophollen künnt.