Tarrafal (Santiago)

Vun Wikipedia
Wesseln na: Navigatschoon, Söök
Nordwestküst vun Santiago mit de Stadt un Bucht Tarrafal in’n Achtergrund

Tarrafal is en Stadt an de Nordwestküst vun’t Eiland Santiago in de Republiek Kap Verde. In de Reeg vun de gröttsten Städer vun dat Land steiht Tarrafal mit sien ruchweg 6.800 Inwahners[1] (Stand vun 2008) an de sövten Steed. Se is togliek de Seet vun de Verwalten vun den concelho Tarrafal.

Geografie un Landschop[ännern | Bornkood ännern]

De beropen Sandstrand vun Tarrafal mit den Monte Graciosa in’n Achtergrund

Tarrafal liggt in’n nöördlichen Afsnitt an de westlichen Küst vun Santiago un ümslutt de Bucht vun Tarrafal. De Stadt is vun’n Süden ut de Serra Malagueta al vun wieter weg in’n Vördergrund vun’n Monte Graciosa to sehn. De Huusbarg Monte Graciosa is – jüst as ok de Rest vun’t Eiland – vulkaansch tostannen kamen un wiest Basaltsülen in verscheden Grötten op, de de ünnerscheedlichen Lavaschichten dorstellt. De Ümgegend vun Tarrafal is savannenoordig, direkt an de Küst breedt sik en fienen Sandstrand ut, de na achtern to vun Kokospalmen süümt warrt.[2]

Stadtbild[ännern | Bornkood ännern]

de Kark an’n Praça vun Tarrafal

As in vele annere Städer vun de Kapverden ok, staht in Tarrafal vele Hüüs, de nich fardig boet worrn sünd, vun wegen, dat de Besitters nich noog Geld harrn. In’n Vergliek mit annere Städer maakt Tarrafal aver’n beten plegteren Indruck un wiest sik teemlich sauber. De Middelpunkt vun Tarrafal – ok tyypsch för de Republiek – is en grötteren Platz (Praça), woneem ok de Kark vun de Stadt to finnen is. Hier ümto finnt sik ok Banken un Ladens, in’t Rebeet na’n Strand to gifft dat ok enige Bars un Restaurants.

Wat een sik ankieken kann[ännern | Bornkood ännern]

De Stadt Tarrafal is sünners vör twee Saken bekannt un beropen. Dat een is de fiene Sandstrand an de Bucht vun Tarrafal, de sünners vun de wat riekeren Lüüd, de op Santiago leevt, besöcht warrt, üm sik dor an’t Wekenenn to verhalen. In jüngere Tiet gifft dat ok tonehmen Touristen, de nich vun Santiago sülvst kamt.[2] Üm den Strand hebbt sik mit de Tiet ok en poor Bars und gode Restaurants anfunnen.

En annere beropen Steed is dat Campo do Tarrafal. Dat is in de Tiet vun de Estado Novo en Konzentratschoonslager wesen, dat in de Neeg vun den Oort Chão Bom liggt. Ünner dat Regime vun Salazar weern Opstännsche ut de Kolonien un portugeesche Kritikers vun’t Regime in Tarrafal insparrt. Eenige dorvun sünd in dat Lager doodbleven.

Borns[ännern | Bornkood ännern]

  1. http://world-gazetteer.com/wg.php?x=&men=gpro&lng=en&des=wg&geo=-58&srt=npan&col=abcdefghinoq&msz=1500&pt=c&va=&geo=379023624
  2. 2,0 2,1 Kapverdische Inseln, Dumont Reisetaschenbuch, 3. Oplaag, 2007, ISBN 3-7701-5968-3

Weblenken[ännern | Bornkood ännern]


Koordinaten:15° 17′ N, 23° 45′ W