Tappwater

Kraantjewater (uut een Waterkraan)

Tappwater oder Kraantjewater (ook Leitungswater of Le(i)dungswater) is Water, dat dör Leitungen transporteert warrt en ut de (Water)kraan (ook (Water)tapp) ruutfleten deiht. Een Definitschoon finnt sück in de nedderlandsch Waterleidingwet (up Platt soveel as Wett för't Levern van Water), en dor in Art 1 Letter a. Dor folgt uut, dat Kraantjewater verschillig Telen hett – it is to’n Drinken, Kaken, Eten to bereden en anner Telen in een Huushoolden of annerswor – en dat it levert warrt van Bedrieven, de Lüüd mit Water versorgt .

För den Transport dör de Piepen warrt dat Water ünner Druck hoolden dör Pumpen of Watertoorns. Reguleert warrt de Toföhr an’t Enn dör den Waterkraan. Dor flütt dat Water ruut, wenn een den Kraan updreiht.

Verschillen Soorten van Kraantjewater

Dor sünd verschillen Soorten van Kraantjewater, de dör sünnere Rohrsystems transporteert warrt. Mehrst Lüüd sünd anslaten an‘t Rohrsystem för Drinkwater. Derwegen warrt Kraantjewater, dat dör dat Rohr uut den Tapp ruutkümmt, faken as Synoym för Drinkwater bruukt, sünners wenn een Drinkwater uut den Kraan ünnerscheden wüll van Drinkwater uut de Butallje. Dor sünd ook anner Systems, wor anner Soorten van Water transpoort warrt. To’n Bispiell warrt in anner Lanner för Füürwehrn in sünner Rohrsystems Water levert, dat van minner Qualität is as Drinkwater.

Etymologie

Dat Woord Kraantjewater sett sück uut Kraan(tje) en Water tosamaan, jüstement so as kraanwater in Nedderlandsch en Afrikaans, Kran(en)wasser in Deelen van Westdüütschland, kranvatten in Sweedsch - of as tapwater in Ingelsch, wor een de plattdüütsch Wöörd Tapp en Water kennen kann. Dat Word Leitungswater sett sück uut Leitung en Water tosaam, nettso as Leitungswasser in Düütsch of leidingswater in Nedderlandsch.