Tamagotchi

Vun Wikipedia
Wesseln na: Navigatschoon, Söök

Dat Tamagotchi (japaansch たまごっち, Portmanteau ut japaansch „tamago“ [たまご, Ei] un engelsch „watch“, japaansch „uotchi“ [ウオッチ, Klock]) is en elektroonsch Speeltüüch, dat ut Japan kummt. Dat Tamagotchi stellt en lütt Deert dor, dat jüst so as en lebennig Huusdeert pleegt warrn mutt. In de twete Hälft vun de 1990er Johren weer dat Tamagotchi ene Tiet lang op de ganze Welt temlich populär. In’t Johr 2004 geev dat noch wedder en ne’e Oplaag mit den Naam Tamagotchi Connexion.

Historie[ännern | Bornkood ännern]

Dat Tamagotchi hett 1996 de japaansche Utfinnersche Aki Maita utklamüsert. Se möök denn mit de Firma Bandai en Verdrag un dat Tamagotchi keem en beten later in Japan op’n Markt. Nadem dat en temlichen Spood harr, sünd ok in Europa un de USA gau importeerte Eier op’n Markt kamen. Aver ok annere Firmen hebbt dat Prinzip klaut un sünd mit Produkten vun lieke Soort rutkamen. An’n 12. Mai 1997 keem Bandai mit dat Tamagotchi op’n düütschen Markt rut. Dat geev en groten Hype üm de Veecher, aver na en poor Maanden weer dat wedder ut un dat Speeltüüch keem ut’e Mood. 40 Millionen Stück hett Bandai verköfft.

An’n 26. Februar 2004 keem de Nafolger as Tamagotchi Plus in Japan rut. Bandai verköff elk Week 100.000 Stück. In Düütschland keem de Nafolger as Tamagotchi Connexion an’n 7. Juni 2004 rut. An’n 28. April 2005 sünd twölv ne’e Connexion-Klören un an’n 26. Juli 2005 denn ok de Tamagotchi Connexion Version 2 rutkamen.

Speelprinzip[ännern | Bornkood ännern]

Dat Tamagotchi is en lütt Plastikei mit en LCD-Bildschirm, dat binnen en Mini-Rekner bargt un en virtuell Küken dorstellt. De Speler mutt vun dat Slippen an för dat Veech sorgen jüst so as för en lebennig Huusdeert. Dat Deert mutt dorbi jümer noog Slaap, Eten, Drinken un Acht kriegen, wat allens över dat Drücken vun Knööp aflöppt. Af un an mellt sik dat Tamagotchi ok un de Speler mutt sik denn üm den Lütten kümmern. Kriggt dat nich noog Acht, blifft dat Tamagotchi dood. Dat kann aver dör Drücken vun’n Trüchsett-Schalter wedder opweckt warrn.