Tag (Graffiti)

Vun Wikipedia
Een Busstop mit allerhand Tags

Een Tag ,Mehrtall Tags (Utspraak Täk(s), von engl. tag , Kennteken, Markenteken) warrt bi dat Graffiti een persöönlich Teken nömmt, dat de Sprayer oder Schriever enerwegens achterlaten lett. Normalerwies is düt Tag/Teken een Aart vun Ünnerschrift, de besünners utföhrt wurrn is un een graphisch Utsehn hett. So een Tag/Teken antobringen, warrt tagging oder ok taggen nömmt.

Up de een Siet warrt dat Tag/Teken to'n Ünnerschrieven vun Graffiti-Biller bruukt, man up de anner Kant warrt dat Tag faken ok bloß för sik allerwegens henmaalt, vunwegen datt de Maler een groot Ansehn in de Szene hett, wenn sien Teken allerwegens to sehn is. Wenn een Sprayer een annern Sprayer sien Tag öberspröhn deit, denn warrt dat as Schimp ansehn.

Besunners in de Kuntreien vun de Gangs in de USA weert de Tags bruukt üm antowiesen, keen sien Reveer de Gegend is.

Dat gifft ok Sprayers, de dor fix bi sünd, wenn een Bahn mal eben anhöllt, un maalt dor jem ehr Tag up. Dat warrt bi de Sprayers "Backjump" nömmt. Wer so wat maakt, warrt in de Szene as een fixen Keerl ankeken, vunwegen datt dat Backjumpen gefährlich is un vunwegen datt so'n Tags allerwegens to sehn sünd, wo de Bahn henföhrt.

Tags in Barcelona

Verdreet[ännern | Bornkood ännern]

Buten de Sprayer-Szene gifft dat Taggen veel Verdreet. De meisten Lüde meent, dat sütt aasig ut un ramponeert Huuswännen un Muurn. Veel Geld warrt jedet Johr wedder utgeven för dat Wegmaken vun düsse Tags, man ok vun Graffitis. De Düütsche Bahn AG gifft jedet Johr unbannige Summen ut un betahlt dorüm Geld an de Lüde, de hölpen könnt, de Sprayers to griepen, de an jem ehr Bahnen tokehr gaht. Besunners in de Kuntreien mit soziale Problemen un wenig Arbeitsplätz för de Jöögd is dat Taggen een groot Problem. Hüdigendags hett de Polizei allerwegens besunnere Steden inricht, de gegen dat Taggen un gegen dat illegal Sprayen gegenan gahn schöllt. De vörmalige Binnenminister vun Düütschland, Otto Schily, harr meent, gegen de Sprayers möss hart vörgahn weeren, as he noch in'n Amt weer. He meen, ok Hubschraubers schollen Nachts up Tour gahn un hölpen, illegal Sprayers uptogriepen.