Stormfloot

Vun Wikipedia

Ene Stormfloot is en von Storm verursaakte Wateranstau an Küsten, besunners an Flachküsten so as an de Noordsee. De Waterstand kann darbi so hooch stiegen, dat Överbowarken un Dieken to Brook gaht un so Överswemmungen deep in't Land indringen köönt.

En Stormfloot hebbt wi denn, wenn oplannigen Wind de normaal Floot höger anstiegen lett. In de Noordsee is dat bi Westenwind, inne Oostsee bi Oostenwind. För de düütsche Nordseeküst un de Münnen vun de Strööm is dat jümmer denn leeg, wenn dat toeerst vun Süüdwest weihen deit un denn op Noordwest dreiht. Denn kummt de „Waterbarg“ mit niege Knööv weer hendol un drückt för Gewalt in de Ilv un Werser.

Stormfloten kaamt meisttiets bloot von November bit Februar. An'n Jadebusen weern in de Tiet von 1854 bit 1957 42 Stormfloten mit Waterstänn bit 4,80 m över NN un twee Orkaanfloten mit noch högere Waterstänn.

De höögsten Stormfloten an de Nordsee weern de Julianenfloot 1164, de Marcellusfloot 1219, de Clemensfloot 1334, de Marcellusfloot (grote Mandränke) 1362, de Antonifloot 1511, de Allerheiligenfloot 1570, de Wiehnachtsfloot 1717, de Februarfloot 1825, de Neejahrsfloot 1854/55, de Februarfloot 1962, de „Johrhunnertfloot“ 1976.

De lesde grote Stormfloot weer an'n 12. Februar 1962. En Windstau, de fief Daag nich naleet, weer de Ursaak för Diekbröök. Weer de Storm mit ene Spreng (Springtide bi Vullmaand)) tosamenfulln, denn weern de Folgen noch veel slimmer wesen. De höögste Waterstand, de in Hamborg meten woor, weer 5,78 över NN, 54 cm höger as bi de Stormfloot von 1825.

Besunners slimm weer 1962, dat de Dieken in de Nacht broken. De Lüüd achter de Dieken weern temlich sorglos to Bett gahn. De Telefone un Sirenen weern utfulln, un so woorn vele von den Blanken Hans överrumpelt. Grote Schadens kemen up an de Dieken von Elv, Oost un Werser. Hamborg ud dat Olland woorn besunners hart bedrapen. An'n Jadebusen geef dat starke Diekutsläge, aver kiene Diekbröök.

De Schaden, den de Floot von 1962 anricht hett, beleep sik up annerthalf Milliarden DM, un 340 Minschen kemen darbi to Doot.

Wenn een de Floot vun 1962 ankiekt, hett Hamburg bi de Stormfloot an'n 3. Januar 1976 meist nix afkregen, ok wenn an'n Pegel in St. Pauli mit 6,45 m över NN de höögste registreete Waterstand siet Minschenerinnern oplopen is. Man de Schaden in de Maschen in Noorn lang de Ilv weer enorm. De olen Dieken weern op groote Längen wegspöölt. In de Johren dornah hett Sleswig-Holsteen denn massig niege Dieken buut.