Star Trek: The Motion Picture

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Star Trek: The Motion Picture
Düütsch Titel: Star Trek: Der Film
Produkschoonsland: USA
Johr vun’t Rutkamen: 1979
Läng: 132 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Robert Wise
Dreihbook: Harold Livingston
Alan Dean Foster (Story)
Produkschoon: Gene Roddenberry
Musik: Jerry Goldsmith
Kamera: Richard H. Kline
Snitt: Todd Ramsay
Szenenbild: Harold Michelson
Kledaasch: Robert Fletcher
Dorstellers

Star Trek: The Motion Picture (op Platt so veel as „Reis na de Steerns: De Speelfilm“; dt. Titel: Star Trek: Der Film) is de Titel vun den eersten Speelfilm ut de Science-Fiction-Reeg Star Trek. Dormit weer de Originalreeg Star Trek wieterföhrt. In de bundsdüütschen Kino keem de Film an’n 27. März 1980.

Inholt[ännern | Bornkood ännern]

En resenhafte Wulk ut Energie stüert op de Eer to un maakt allns tonichten, wat ehr in den Weg kummt. Dat Ruumschipp Enterprise, dat jüst en langen Ümbo achter sik hett is dat eenzige, dat gau noog na de Wulk flegen kann, üm de Gefohr to bannen. De fröhere Kaptein vun dat Schipp, Admiral Kirk, lett sik de Befehlsgewalt över dat Ruumschipp torüchgeven, wat to en duersome Rivalität twüschen em un Kaptein Decker, den egentlichen Kommandaten, föhrt.

Gliektietig versöcht dat fröhere Liddmaat vun de Kru Spock op sien Heimatplanet Vulkan, dat Kohlinar to bestahn – en Technik mit de een sien Geföhlen vullstännig ünnerdrücken kann. Man, op eenmol föhlt he de Präsenz vun de Wulk un kennt se as en frömd Bewusstsien. He maakt sik op’n Weg na de Enterprise un slutt sik de Misschoon an.

Bald is dat Ruumschipp Enterprise bi de Wulk ankamen un flüggt dorin. Binnen in is en vele Kilometers grote Konstrukschoon to finnen, de för dat Tügen vun de Energiewulk verantwoortlich is. Op eenmol warrt de Navigatschoonsoffizeer, Lt. Ilia, op de Enterprise vun ern Sond oplöst un dör en Maschien uttuuscht, de en nipp un naue Kopie vun ehr dorstellt. Se wiest sik as Kommunikatschoonsmedium twüschen de Minschen op dat Ruumschipp un de frömme Entität. So kummt rut, dat se sik V’ger nöömt un op de Söök na ehrn Schöpper is. Un den glöövt se op de Eer to finnen. Spock stellt fast, dat V’ger över en utermatig groot Weten verföögt, aver nich in de Laag is Geföhlen to verstahn.

Wenig later kummt de Wulk bi de Eer an. De Kru vun de Enterprise finnt intwüschen V’ger op en Plattform midden in de Wulk. In Wohrheit is V’ger de Ruumsond „Voyager 6“, en Ruumsond, de de NASA in’t 20. Johrhunnert losschaten hett. Ehr Teel weer, mööglichst veel Weten vun dat Weltall to sammeln. Dör de lange Reis sünd nich mehr all Bookstaven to lesen, so dat blots noch V’ger vun den Naam över is. Op ehrn Weg is de Sond mit en Maschienenzivilisatschoon tosamendrapen, de den Opdrag vun de Sond to wöörtlich nahmen hett. Se hett de Technik vun de Voyager-Sond wieterentwickelt un dormit V’ger dorstellt, de ehr Reis wietermaken de. As se allns lehrt harr, hett se sik op den Weg torüch na de Eer maakt, üm ehr Weten an ehrn Schöpper to överbringen.

Opletzt versteiht V’ger, dat de Minsch de Schöpper vun de Sond weer. Se verlangt Antwoorten na den Sinn vun ehr leddige Existenz, de nix anners as Logik kennt. Decker, de in de Maschien noch jümmer Ilia un ehr Wesen kennen kann, will V’ger dat wohre Wesen vun’t Minsch-wesen bibringen. He büdd an, mit ehr eens to warrn, vunwegen dat he mol wat mit Ilia harr. De Ilia-Sond un he fangt an sik in lüchten Energie optolösen. Dordör entsteiht en nee Wesen un de Wulk löst sik op.

Kritik[ännern | Bornkood ännern]

Dat Lexikon vun’n internatschonalen Film schreev vun en opwännigen Film, de an de spoodrieke Feernsehreeg ansluten de, aver langwielig inszeneert, vun en pseudo-philosoophschen Överbo kenntekent un stereotyyp in siene Figuren weer[1]. Prisma Online snack dorgegen vun en sehnsweert Science-Fiction-Aventüer mit feine Trickeffekten, wunnerbore Musik un en rutragen Kameraarbeit[2].

Utteken[ännern | Bornkood ännern]

Star Trek:The Motion Picture weer alltohopen för twintig Filmpriesen vörslahn, dorünner alleen dreemol för den Oscar in de Kategorien Best Szenenbild, Best Trickeffekt un Best Filmmusik. Uttekent weer de Film opletzt mit twee Priesen:

Achtergrünnen[ännern | Bornkood ännern]

Die Geschicht, de in de Speelfilm vertellt warrt, weer toeerst för de eerste Episood vun de Feernsehreeg Star Trek: Phase Two plaant. Man, Paramount Pictures wull denn aver na lang hen un her överleggen doch lever en Kinofilm produzeeren. De Reeg is nie produzeert worrn, man eenige vun de Kulissen, de för de Reeg boet weern, sünd later denn för den Kinofilm un ok för latere Filmen un Feernsehregen bruukt worrn, üm dat Budget siet to hollen. Dat Kunzept vun den Film weer nich nee. De glieke Idee is al in de Star-Trek-Episood The Changeling verarbeit worrn[3].

De Produkschoon hett dat Filmbudget wiet övertogen. Opletzt hett de Film ruchweg 40 Millionen US-Dollar köst, nich toletzt ok, vunwegen dat sik rutstell, dat de al fardig produzeerten Trickeffekten vun de Trickfirma Robert Abel & Associates nich dögen deen. Se müssen noch mol opwännig nee maakt warrn. De optischen Trickeffekten stünnen ünner de Verantwoorten ünner annern vun Douglas Trumbull un Richard Yuricich, de ok al för 2001: A Space Odyssey Trickeffekten maakt harrn.

Man liekers hett de Film sien Kosten wedder inspeelt, wat ünnerstütt weer dör den Science-Fiction-Hype, de sik üm Star Wars billn de. Wegen den finanziellen Spood is dorna denn de tweete Star-Trek-Film produzeert worrn.

De Soundeffekten vun den Kinofilm weern vun den Düütschen Kai Krause bistüert, de för sien Arbeit mit den Clio Award uttekent worrn is.

Enn vun de 1990er Johren is op Video en ne’e, längere Faten vun den Film rutkamen, de Szenen bargt, de ok in de Fasten vun den US-Feernsehutstrahlen binnen weern. Siet 2002 is de Director’s Edition op DVD op’n Markt, de Robert Wise mit ne’e digitale Effekten un ännerte Szenen opweert hett. 1979 müss de Film wegen den bannigen Termindruck gau fardigstellt warrn. Vele Effekten weern dormols nich so ümsett worrn, as de Speelbaas dat egentlich vörsehn harr.

Musik[ännern | Bornkood ännern]

De Filmmusik to Star Trek: The Motion Picture gellt as een vun de wichtigsten Warken vun Jerry Goldsmith[4]. Vele vun de Themen sünd ok in latere Produkschonen vun de Filmreeg wedder to finnen, wenn Goldsmith doran bedeeligt weer.. Dat gellt sünners för de Titelmusik un dat Klingon Battle-Thema. De Titelmusik keem bi den Star-Trek-Produzenten Gene Roddenberry sogor so goot an, dat se later op sien Wunsch hen ok för de Feernsehreeg Star Trek: The Next Generation bruukt worrn is. Bi de Filmmusik sünd ok en poor Takten vun Alexander Courage bruukt worrn. Dorbi hannelt sik dat üm Deelen vun’t Titelthema vun de Feernsehreeg, de as Ünnermalen vun de Logbookindrääg to hören is.

Goldsmith hett för sien Kompositschoon ungewöhnlich veel Tiet bruukt. Dat keem dorvun, dat de Wünsch vun de Produzenten in Betog op de optischen Trickeffekten jümmer wedder dat Fardigstellen vun’t Bildmaterial ruttögern deen. De letzten Opnahmen to de Filmmusik weern an’n 1. Dezember 1979 nachts Klock 3 optekent – söss Daag vör de Premiere. Dirigeert weer dat Orchester dorbi vun Lionel Newman.

As een vun de wenigen un letzten Produkschonen ut Hollywood fangt de Film mit en Ouvertüre vun ruchweg dree Minuuten an, also mit en rein musikaalschen Anfang noch vör den egentlichen Vörspann. Dorto hett Goldsmith dat Ilia-Thema bruukt – en Stück dat de Komponist sülvst as Leevthema beteken. De Ouvertüre klingt mit en Pianissimo vun’t Orchester ut, worophen dat kräftige Titelthema insetten deit. Dat Enterprise-Thema sülvst is as een vun de fröhesten Stücken fardigstellt worrn un weer toeerst för Szenen dacht, in de Admiral Kirk to dat Ruumschipp in de Eerdümloopbahn transporteert warrt[5].

Dat drüdde drägen Element vun de Filmmusik is dat V’ger-Thema, dat för de frömme Entität steiht, dat de Eer bedrauht. Hier kamt vör allen Blickblaasinstrumenten un Perkusschoon to’n Insatz. För de sünners frömdordigen Klangeffekten hett dorbi de Insatz vun en Blaster Beam sorgt. Dat is en elektroonsch Snereninstrument, dat vun den Künstler Craig Huxley utklamüstert weer[6].

De Singer Shaun Cassidy hett dat Ilia-Thema op en Single vun 1980 as Star Beyond Time covert un mit den Text ünnerleggt[7].

De Filmmusik is 1979 in teihn Scores as LP rutbröcht worrn[8]. Twintig Johren later is en Jubiläumsutgaav produzeert worrn, mit Deelen de vörher nich publizeert weern. Mir Rutkamen vun de DVD weer de Musik noch mol överarbeit un digital verbetert (Dolby 5.1)[9].

Borns[ännern | Bornkood ännern]

  1. Kritik im Lexikon des internationalen Films
  2. Kritik bei Prisma Online
  3. http://de.memory-alpha.org/wiki/Ich_hei%C3%9Fe_Nomad
  4. [1] „Geschichte der Filmmusik“, afropen an’n 13. Januar 2008
  5. Begleitheft to de Jubiläumsutgaav vun de Filmmusik op Dubbel-CD. Columbia, 1998. COL 4899292
  6. [2] Korte Verkloren vun’t Instrument mit Biller, afropen an’n 13. Februar 2008
  7. [3] Översicht vun de Publikatschonen op freewebs.com, afropen an’n 13. Januar 2008
  8. JS 36334
  9. [4] thedigitalbits.com, afropen an’n 13. Februar 2008

Weblenken[ännern | Bornkood ännern]