Spaceballs

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Spaceballs
Düütsch Titel: Spaceballs
Produkschoonsland: USA
Johr vun’t Rutkamen: 1987
Läng: 92 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Mel Brooks
Dreihbook: Mel Brooks, Thomas Meehan, Ronny Graham
Produkschoon: Mel Brooks, Ezra Swerdlow
Musik: John Morris, Mel Brooks
Kamera: Nick McLean
Snitt: Conrad Buff IV
Szenenbild: Harold Michelson
Kledaasch: Donfeld
Dorstellers

Spaceballs is en US-amerikaansche Filmparodie vun Mel Brooks ut dat Johr 1987. In den Film warrt vör allen die Filmen ut de Star-Wars-Reeg op de Schipp nahmen as ok jemehr Merchandising.

Inholt[ännern | Bornkood ännern]

Den Planet Spaceballs draut de Luft uttogahn, so dat Präsident Skroob sik af un to mol’n Doos „Perri-Air“ apenmaken mutt. He beslutt, de Prinzessin Vespa vun’n Planeten Druidia to roven, üm dat he ehrn Vadder, König Roland, dorto dwingen kann, em de Kombinatschoon vun dat Kraftfeld to geven, dat de Atmosphäär vun den Planeten schuult. Vespa schall de Slaapmütz Prinz Valium heiraten, de de letzte Prinz in de Galaxie is, man bevör dat dorto kummt, neiht se mit ehr Zofe, de Robotersche Dot Matrix, ut. Dat duert nich lang, bit se vun Lord Helmchen mit sien Ruumschipp Spaceball I angrepen warrt. Se kann aver ehrn Vadder üm Help anropen.

König Roland fraagt dorophen Lone Starr, dat he em helpen schall. För de grote Summ vun een Million Spacedollar, de he den Halunken Pizza the Hutt schulden deit, seggt he to un flüggt mit sien Partner Barf in sien Weltruum-Mobil achter de Prinzess’sche ran un kann er för Lord Helmchen redden. Man op de Flucht geiht jem de Driefstoff ut un se mööt op’n Wööstplaneten nootlannen. As se nachts Rast maken doot, kamt sik Vespa un Lone Starr neger, liekers dat se sik vörher gor nicht utstahn künnen. Wiet kamt se aver nich, vun wegen dat bi Dot Matrix foorts de Jumfernalarm losgeiht. De Reeg na, geiht jem aver in de Wööst bald de Pust ut un se klappt tosamen un wart dorophen vun lütte Wesen rett, de sik Dinks nöömt. Se bringt jem to’n Tempel vun de kloken Yoghurt, de Lone Starr dat Geheemnis vun’n Saft, en överirdische Macht, verklort un em en Ring mitgifft, mit den he den Saft bruken kann.

In de Twüschentiet hett dat Ruumschipp Spaceball I mit Help vun en Instant-Cassette vun den Film sülvst rutfunnen, woneem de Flüchtigen afbleven sünd. Se dörkämmt also nu – wöörtlich nahmen – de Wööst ne jem un künnt opletzt dat ünnerirdische Versteek vun Yoghurt opfinnen. Dör Hypnoos kann Helmchen de Prinzessin Vespa ut dat Versteek locken un flüggt mit ehr weg. Natürlich jachtert Lone Starr un Barf glieks achteran. Man bi’n Afscheed kriggt Lone Starr vun Yoghurt noch’n Glückskeks mit op’n Weg.

Lord Helmchen kontakteert nu König Roland un drauht dormit, de Prinzessin ehr olle Nees weddertogeven, wenn he nich den Kood för’t Kraftfeld kriggt. De König gifft na. Aver Lone Starr is rechttietig to Steed un kann de Prinzessin mit veel Scheten ut den Gefängnisball op Spaceball freemaken. Se künnt jüst noch utneihn, vun wegen dat Helmchens Truppen ut Versehn jemher Stuntdoubles fastnehmen doot. So richtig in de Brass mit Lord Helmchen fleegt se em nu achteran, de al op’n Weg na Druidia is. Dor an den Planeten wannelt sik de Spaceball I in en riesige Weltruum-Putzfro mit’n Stoffsuger, mit den se Druidia de Luft afsugen will. Aver Lone Starr bedeent sik vun’n Saft un schallt den Suger op Blasen üm. Op de Spaceball kummt dat to’n Showdown twüschen Lone Starr un Helmchen, wobi sik jemehr Saftringen to Laserswerter wannelt. Bi’t Gerangel kummt Lord Helmchen an’n Knoop to’n Sülvsttonichtenmaken un de Weltruumputzfro explodeert.

Lone Starr dröff nu aver de Prinzessin nich heiraten, vun wegen dat he jo keen Prinz is. As he sik frustreert wedder op’n Weg maken will, knackt he den Glückskeks vun Yoghurt, de dorophen togang kummt un Lone Starr wat över sien Afkumst vertellt. So warrt he wies, dat he en echten Prinz is. Jüst noch rechttietig kummt he torüch na Druidia, üm de Hochtiet mit Prinz Valium to hinnern. Tosamen verswinnt se in Lone Starr sien Weltruum-Wahnmobil.

Kritik[ännern | Bornkood ännern]

Spaceballs hett bi sien Ooropföhren 1987 mischte Kritiken kregen. Janet Maslin hett vör allen en Problem in de Läng vunn Film sehn, vun wegen dat de Grundlaag för’n bannig komischen Sketch woll dor weer, sik aver över de Speelläng vun’n Film dwangslöpig afnütten müss.[1] Roger Ebert meen, dat de Film to laat rutkamen weer, vun wegen dat de Apetit op Parodien to Star Wars 1987 al wedder vörbi weer.[2] Den visuellen Humor vun’n Film, sünners in de Figur „Pizza The Hutt“ hett he höger acht as den Witz vun de Dialogen, den he as mitünner „jöögdhaftig bit to’n wehdoon“ beteken. He segg „Ich habe gelacht, aber nicht genug, um den Film empfehlen zu können.

In Phil Hardys Science-Fiction-Nakieksel steiht Spaceballs as’n „über weite Strecken überflüssige Persiflage der Star-Wars-Trilogie.[3] in. He loov noch de talenteerten Schauspelers un de Trickeffekten vun’n Film, segg över dat Dreihbook aver, dat dat en „humorfre’e Zoon“ weer. Mit Sicht op annere Parodien vun Mel Brooks beteken he dissen Film as „fulminanten Fehlgreep“.

Synchronisatschoon[ännern | Bornkood ännern]

Vun den Woortwitz is in de düütschen Synchronisatschoon veel verloren gahn un jüst so ok veel vun’t Anspelen op de US-amerikaansche Alldagskultur.

Dat Lone Starr de Radarantenn vun de Spaceball I mit Marmelaad lahmleggen deit, maakt blots in de Originalspraak Sinn, vun wegen dat Marmelaad op engelsch jam heet un un to jam de Utdruck is för den Funk stören. In’n Film warrt faken de Satz „may the Schwartz be with you“ (anlehnt an „may the force be with you“) bröcht, wat op dat US-amerikaansche Koophuus FAO Schwartz anspeelt, dat veel vun de Star-Wars-Produkten anboden hett. In de düütschen Synchronisatschoon is disse Witz fallen laten worrn. De Böse Pizza Mampf heet in dat engelsche Original Pizza the Hutt, wat klor op de Figur Jabba the Hutt anspeelt, aver togliek ok op de amerikaansche Fastfood-Keed Pizza Hutt. Un Waldi hett in’t Orignal Barf – as dat ok op dat Namenschild op sien Overall steiht, wat to’n een en Onomatopoetikum is för’t Bellen vun en Hund, in de Ümgangsspraak aver ok kotzen heet.

Annere Woortspelen künnen aver ok op Düütsch maakt warrn, as to’n Bispeel de Beteken vun Barfs Rass as mog (half man, half dog), de in de düütschen Faten to’n Möter warrt (halb Mensch, halb Köter).

Anners wat[ännern | Bornkood ännern]

  • Mit en Budget, dat op 22,7 Millionen US-Dollar schätzt warrt, hett Spaceballs in de US-amerikaanschen Kinos mehr as 38 Millionen US-Dollar inspeelt.[4] De Spood, den de Film in’n Filmverleeh hett, wiest, dat de Film ok lang na sien Rutkamen noch düchtig populär is.

Borns[ännern | Bornkood ännern]

  1. Janet Maslin: Spaceballs (1987). In: New York Times vun’n 24. Juni 1987. (Online-Archiv)
  2. Roger Ebert: Spaceballs. In: Chicago Sun-Times vun’n 24. Juni 1987. (Online-Archiv)
  3. Phil Hardy (Rgv.): Die Science Fiction Filmenzyklopädie. 100 Jahre Science Fiction. Königswinter: Heel 1998. S. 434F ISBN 3-89365-601-4
  4. o.a.: Box office / business for Spaceballs (1987). afropen vun imdb.com an’n 29. Dezember 2007.

Weblenken[ännern | Bornkood ännern]