SonntagsReport

Vun Wikipedia

De SonntagsReport is en Blatt, dat jede Week Sünndags rutkummt. Dat gifft twee Utgaven, ene för den Landkreis Leer un ene för den noorden Deel van’n Landkreis Emsland. De Redakschoon sitt in Leer. De Druckoplaag liggt bi över 100.000 Stück un dat Blatt warrt kostenlos an all Huusholden verdeelt. Dat Leid van d' Redaktion hett Gisela Robben.

Den SonntagsReport hebbt se 1986 as dat eerste unafhängiges Anzeigenblatt in de Region Oostfreesland grünnt. De Utgaav för dat Emsland gifft dat siet 1996. Toeerst harr disse twete Utgaav ehr Redakschoon in Papenbörg, man 2002 hebbt se de Redakschonen in Leer tohoopleggt. Ganz kort harr dat ok en Lokalutgaav för Emden geven, aver de hebbt se gau wedder instellt.

1999 hett de Verlag vun de Ollnbörger Nordwest-Zeitung (NWZ) de Mehrheit an den SonntagsReport övernahmen. 2002 harrn sik al de Dagbläder Ostfriesen-Zeitung un General-Anzeiger to de Zeitungsgruppe Ostfriesland tohoopslaten, un ok dor an hett de NWZ en Andeel. Dorüm harr dat Kartellamt de NWZ al afmahnt, dat se soveel Bläder kuntrulleren deen un meist en Monopol harrn. Ok de Konkurrent van den SonntagsReport, dat Anzeigenblatt Der Wecker, höör nu to desülvige Grupp. Se hebbt denn ok wat later de Utdregers van’n SonntagsReport aflohnt un de Utdregers van’n Wecker schullen de Bläder nu mit uteneenbringen.

2004 hebbt welk Mitarbeiders van’n SonntagsReport dat Anzeigenblatt Abendkurier för den Landkreis Leer grünnt. Den hett 2005 de Neue Osnabrücker Zeitung (NOZ) övernahmen un dat Blatt kummt nu Sünnavends rut. Dat warrt as Reakschoon van de NOZ sehn, dor op, dat de NWZ mit ehren SonntagsReport un den Wecker in Noord-Emsland dat Stammgeschäft vun de NOZ angriepen deit.

Weblenken[ännern | Bornkood ännern]