Slott Gymnich
Slott Gymnich is en Waterborg vun de Erftaue in Gymnich, en Stadtdeel vun Erftstadt, in Noordrhien-Westfalen. Jahrhunnertenlang weer dat de Sitt vun dat rhiensch Riddergeslecht von Gymnich.[1] Dat Slott, dat vun en grooten Park umgeven is, hett en Gesamtgrundstücksgrött vun 21 ha un liggt an den Rhienschen Sagenweg.
Historie[ännern | Bornkood ännern]
En eerste Borg wurr 1354 an den westlichen Rand vun den Oort vun Heinrich I. von Gymnich erricht. He hett den Bau den Arzbischop Wilhelm von Gennep as Apenhuus vun de Kölner Kark up un kreeg de as Lehen vun de torüch.[2] Nah Överfällen un Schadenshandlungen vun anner Lehnslüüd vun den Arzbischop dör Heinrich II. wurr de Borg 1399 up Befehl vun den Arzbischop Friedrich von Saarwerden afbraaken. Heinrich hett sück verplicht – ok för sien Nahkommen – nie mehr ahn Genehmigung vun den Arzbischop en fast Huus in Gymnich to errichten.[3] De Nahfolgebau wurr an anner Stäe, östlich vun de eerste Borg, erricht. 1419 wurr Johann von Gymnich, Söhn vun Heinrich II., mit Huus Gymnich belehnt.[4] Sien Söhn Arnold hett 1467 Huus Gymnich arvt,[5] dat in' Familienbesitt bleev bit to dat Erlöschen vun den Lien von und zu Gymnich in dat Johr 1824 mit den Dood vun de Freiin Johanna von Gymnich, Stiftsdaam to Neuss, Dochter vun Karl Otto Ludwig Theodat von und zu Gymnich. Dornah keem dat Slott as Schenkung an hör Grootneffen Max Felix Reichsgraf Wolff Metternich un sien Arven. Vilma Reichsgräfin Wolff Metternich, de dat letzte Liddmaat vun de Familie un somit dat Arv harr, broch dat dör hör Heirat mit Franz Vicomte de Maistre an de sien Lien. In de wiedere Arvfolg full dat Slott nah den Dood vun den kinnerlos storven Söhn Rudolf Vicomte de Maistre an den testamentarsch vun Vilma bestimmten Naharven, den Enkel vun de Gräfin un Söhn vun hör Dochter, Jörg Freiherr von Holzschuher.[6] Miranda de Maistre (1912–2009), Ehfru vun Rudolf, de nah Huusrecht nich arven kunn, truck nah den Dood vun hör Mann (1968) in de Kaplanei neben de Kark.[7] Nah en eenfack Leven is se dor an' 22. Juli 2009 storven. Gymnich weer se bit kört vör hör Dood as Protektorin vun de Sebastianus-Bröerschap verbunnen.[8]
Mit de Borg un dat latere Slott weer de Gymnicher Möhlen as Bannmöhlen verbunnen.
Beschrieven vun de Anlaag[ännern | Bornkood ännern]
Över en Siedenstraat, de vun de Hööftstraat aftwiegt, kummt man to dat Ingangsdoor vun dat Slott, vun dat en Allee to dat Slott führt. Vun den ehmalgen Wertschapshoff, de Vörborg, wurr de Noordflögel afreeten. Dör en Brügg is de Vörborg mit de Hööftborg verbunnen, de up en rechteckig vun Waterschlööt umgeven Eiland liggt. De tweeflögelige Anlaag besteiht ut en Westflögel mit twee Toorns un en in' rechten Winkel ansluuten nördlichen Trakt. In' Winkel vun de beid Flögels liggt in en Vörbau de Ingang, de över en Trapp to recken is.
De beid Flögels entstunnen to verscheeden Tieden. Nah dat Daalbrennen vun de Borg in' Hessenkrieg in dat Johr 1642 wurr de 1547 erricht Westflögel mit den südlichen Kapellentoorn van 1655 bist1659 dör Sofia Margarethe Wolff nömmt Metternich, de Wittfru vun Adolf von Gymnich, in' Barockstil wedder upbaut un de Altar in' Borgtoorn reconzileert. In dat Sockelfundament vun den Kapellentoorn sünd noch Reste vun en fröhere Borganlaag to erkennen.
De Nordflögel wurr 1722 erricht. Karl Otto Ludwig Theodat von und zu Gymnich leet 1738 de Rüüms in' Rokokostil utstatten. De prunkvull Binnenrüüms mit prächtigen Stuckverzierungen wurrn vör allen präägt dör de in de Wandflachen inlaaten Porträts vun de dormalig Kurfürsten in' „Kurfürstensaal“, en Porträt vun de Kaiserin Maria Theresia in dat „Marmorkabinett“ un Gemälden vun Persönlichkeiten ut de Familie vun de Herren von Gymnich as ok dör de eenmaligen Supraporten mit Dorstellen vun eenig Slotten vun den Kurfürsten Clemens August. Bi de in de Johren 1903–1930 dörführt Umbauten un grundleggend Renoveeren wurr 1907 de Hööftingang verleggt un de hüüdige Ingang as lütt Vörbau in' Neobarockstil baut.
De Bedüüden vun dat Barockslott liggt nah Henriette Meynen nich blots in sien kunstvull Binnenutstatten, sonnern ok in sien groot Park mit en Fülle inheimisch Holtoorten, aber ok botanisch upfallen Exoten.[9] Hüüd steiht dat Slott ünner Denkmalschuul. Dat Grundstück umfaat mit Park en Flach vun 212 667 Quadratmetern.[1]
Moderniseeren vun de Anlaag[ännern | Bornkood ännern]
Jörg Freiherr von Holzschuher, de dat Slott nah Medienberichten unverwacht[10] vun sien Grootmoder Vilma Reichsgräfin Wolff-Metternich arvt harr,[11] funn en siet Johren los stahn stark renoveerungsbedürftig Anlaag vör.
In' Tweeten Weltkrieg weer se militärisch bruukt wurrn. De Luftwappen harr dor hör Telefonzentraal för dat up den Gymnicher Feldflooghaven statschoneert Luftwappengeschwader inricht.[12] Da Ehepaar Vicomte de Maistre harr de Wahnen in dat Slott upgeven un in' Nordwestbau vun de Vörborg Bowarken afrieten un 1956 för sück en nee Wahnhuus bauen laaten.
Jörg von Holzschuher hett dat Slott gründlich renoveert. So hett he en Zentraalheizung inbauen laaten, Stroomleitungen nee verleggt, Bäder un Toiletten inbaut un de Repräsentatschonsrüüms gründlich restaureert, um ok de stiegen Bedürfnisse nah mehr Wahnkomfort nahtokommen.[6]
Gebruuk dör de Bundsregeeren[ännern | Bornkood ännern]
1971 hett he dat Slott för 750.000 DM pro Johr an de düütsch Bundsregeeren verhüert, de dat Slott bit Juli 1990 as Gästehuus in Gebruuk harr. Dat weer dormit Vörgänger un Nahfolger vun dat Bundsgästehuus up den Petersberg. Slott Gymnich hett all tosommen 262 Staatsgäste ünnerbrocht.[13] De meesten Staatsgäste sünd dorbi up den in Sichtwiet liggen Flegerhorst Nörvenich land un wurrn denn mit en Pkw in dat dicht bi liggen Gästehuus fohren.
De Begreep Gymnich-Treffen geiht up en Drapen in' Rahmen vun de Europääsch Politische Tosommenarbeit in' April 1974 in dat Gästehuus Slott Gymnich vun de düütsch Bundsregeeren torüch, dat Hans-Dietrich Genscher veranstalten dee. Siet dit Drapen finnen eenmal pro Ratspräsidentschap, also eenmal jedes half Johr, dat so nömmt Gymnich-Treffen statt.
An' 25. August 1989 keem dat in't Slott to en Geheimdrapen vun de ungaarsch un düütsch Staatschefs, dat denn dorto führen dee, dat de ungaarsch-öösterrieksch Grenz in de Nacht van' 10. up den 11. September 1989 för de Botschopsflüchtlinge ut Ungarn apenmaakt wurr.
Nee Eegendömer[ännern | Bornkood ännern]
As nah de Rückverleggen vun dat Gästehuus vun de Bundsregeeren to'n Petersberg dat Enn' vun dat Gästehuus Slott Gymnich aftosehn weer, hett Freiherr von Holzschuher en Köper söcht. In' Juni 1987 hett de japaansch Ünnernehmer Masao Nangaku dat Slott för 28 Millionen DM köfft.[11] He harr vör, Slott Gymnich in en Luxushotel mit en angleederten Golfplatz umtobauen, de sück in Richt Gymnicher Möhlen erstrecken sull. Aber he kreeg nich noog Geld binanner, um dat fardig to stellen und so wurr dat nich umbaut. Nah Afsluss vun de Koopverhandlungen kunn he aber nich mehr vun den Koop torüchtreeden, ahn en nee Köper vörtowiesen. He funn de 1993 in Joachim (Joe) Wander (Wander-Grupp). De nee Eegendömer wull ebenfalls up dat Grundstück en Golfplatz errichten, muss denn aber faststellen, dat de Baugenehmigung dorför all 1992 Torüchtrucken wurrn weer. Wander hett denn dor en Hotel vun de höhger Klasse inricht, wat sück aber nich lohnen dee, wiel de verwacht Gäste wegen den fehlen Golfplatz utbleeven. Wegen groot finanzieller Schwierigkeiten muss ok he upgeeven.[1]
In' Juli 1998 hett Dan Kelly, Vader vun de Musikgrupp Kelly Family, dat Slott in' vun en Dwangsverstiegern för 13,1 Millionen DM erwurben.[14][15] De Kelly Family hett dor denn bit to den Dood vun den Vader in dat Johr 2002 wahnt. Wegen de Busladungen vun Fans, de deelwies in de Vörgoorden vun de Anwahner campeeren deen, wurr en sünner Ordnungsdeenst notwennig.[14] Mit de Tiet weern de Kinner uttrucken, un Vader Dan bleev faken alleen in dat Slott. So wurr siet dat Johr 2000[16] mehrfack versöcht, dat Slott to verkoopen, wat aber nich klappt hett. Dör den Dood vun den Vader Dan in' August 2002 hemm sluutend de negen Geschwister un dree Halfgeschwister – dorban een in den USA mit Sachwalter – dat Slott gmeenschaplich arvt. De völ Miteegendömer kunnen sück lang nich up en ansluuten Gebruuk oder en Verkoop eenigen.
Dorum wurr dat Slott in de Tüschentiet verpacht. 2005 hemm de Ünnernehmer Wilfried Vogt un Manfred Diel gemeensam mit Joey Kelly de „Schloss Gymnich GmbH“ grünnd, de dat Slott as Restaurant un Veranstaltensoort bedreev. Nahdem Manfred Diel in' Toog vun de Insolvenz vun de Heros Ünnernehmensgrupp fastnommen wurrn weer, mell de GmbH in' Fröhjahr 2006 Insolvenz an. Af 1. Mai 2006 övernehm de Upfangssellschop „Schloss Gymnich Erleben und Genießen GmbH“, deren Geschäftsführer Wilfried Vogt bleev; Joey Kelly weer wiederhen Sellschopper.[17] Bit 2009 wurr dat Slott as Hotel un Restaurant vun höhger Klasse führt un deen as Veranstaltensoort. Van September 2010 bit Juni 2011 deen dat Slott as Butenkulisse för de ZDF-Telenovela Lena – Liebe meines Lebens.
Wiel sück de völ Miteegendömer wiederhen nich eenig wurrn kunnen, hett Joey Kelly de Dwangsverstiegern bedreeven,[18] wobi de Verkehrswert up 5,3 Millionen Euro fastleggt wurr. Wegen dissen Verkehrswert weer dat Mindestgebot vun Amts wegen up 2,65 Millionen Euro fastleggt wurrn. Gebote mussen bit to'n 31. Januar 2012 bi dat tostännig Amtsgericht Brühl afgeeven wurrn.[19][1] To dissen Tietpunkt leeg aber blots en Gebot vun Joey Kelly sülvst in Hööcht vun 1,7 Millionen Euro vör. Dat leeg somit ünner dat fastleggt Mindestgebot un so keem dat vöreerst nich to'n Verkoop.[20]
An' 3. Juli 2012 wurr dat Waterslott in dat Amtsgericht Brühl denn doch noch för 3,05 Millionen Euro dwangsverstiegert. De ehmalge Kölner Industrieversekerungsmakler Gerd Overlack hat dat Slott erstiegert. He wull dör sülvst intrecken un dor ok en Hotel un en Restaurant ünnerbringen.[21][22] Overlack is siet 2000 Eegendömer vun Slott Eberstein in' Landkreis Rastatt (Baden-Württemberg).
Sage un Wappen[ännern | Bornkood ännern]
Mit dat Slott un Geslecht is de Sage vun den Gymnicher Ritt verbunnen, de hüüd noch an' Christi Himmelfohrtsdag vun de Sebastianus-Bröerschap un de St. Kunibertus Schüttensellschap as Rieder-Prozession begahn wurrd. De Sage gung as Gestaltenselement ok in dat Wappen derer von Gymnich in.
Weblenken[ännern | Bornkood ännern]
Referenzen[ännern | Bornkood ännern]
- ↑ a b c d 5,3 Millionen Euro wert: Wer kauft Schloss Gymnich? in Kölnische Rundschau van' 29. November 2011
- ↑ Wilhelm Janssen:: Die Regesten der Erzbischöfe im Mittelalter Bd. VI. Köln 1977. Nr. 482
- ↑ Norbert Andernach: Die Regesten der Erzbischöfe im Mittelalter Bd. X, Düsseldörp 1987. Nr. 1789
- ↑ Karl Stommel: Das kurkölnische Amt Lechenich, seine Entstehung und Organisation, Euskirchen 1961. Siet 48
- ↑ Archiv Schloss Gymnich, Urkunde Nr. 258, verapenlicht vun in Karl un Hanna Stommel: Quellen zur Geschichte der Stadt Erftstadt, Bd. II, Erftstadt 1992. Nr. 1206
- ↑ a b Matthias Weber, Erftstadt-Gymnich, Heimatbuch S. 282–283, 288-300
- ↑ Adel in Gymnich: Wo einst die Gräfin lebte in Kölner Stadt-Anzeiger, Rhein-Erft, van' 30. Januar 2012, Siet 38
- ↑ Nahroop vun de Bröerschap (Togreep Januar 2012)
- ↑ Henriette Meynen: Wasserburgen, Schlösser und Landsitze im Erftkreis. Köln 1992. Sieden 122–128
- ↑ Protokoll: Treffen bei Theodat in Der Spiegel, Ausgabe 5/1972 vom 24. Januar 1972
- ↑ a b Ein Schloßherr aus Japan in Der Spiegel, Utgaav 26/1987 van' 22. Juni 1987
- ↑ Geheime Zentrale auf Schloss Gymnich in Kölner Stadtanzeiger, Rhein-Erft van' 17. Januar 2012
- ↑ Rolf Breithaupt, Schloss Gymnich – 19 Jahre Gästehaus der Bundesregierung. In: Jahrbuch der Stadt Erftstadt 1993/94. S. 47–62
- ↑ a b Fans: Ein Hauch von Woodstock in Der Spiegel, Utgaav 43/1999 van' 25. Oktober 1999
- ↑ Online bi binkyskellypage.de Kellys wollen Schloss Gymnich kaufen, Berliner Zeitung van' 18. Juni 1998
- ↑ Schloss zu verkaufen – die Kellys ziehen aus, RP Online van' 30. August 2000
- ↑ Die ungeklärte Frage nach den Schuldigen in Kölner Stadtanzeiger van' 7. Dezember 2007
- ↑ Schloss der Kelly Family wird zwangsversteigert, oe3.orf.at, 28. Jänner 2012
- ↑ Zwangsversteigerung: Experte schätzt Wert von Schloss Gymnich in Kölnische Rundschau van' 11. August 2011
- ↑ Anwesen der Kelly Family wird zwangsversteigert: Schloss aus und vorbei in Süddeutsche Zeitung van' 31. Januar 2012
- ↑ Familiensitz der Kellys verkauft: Ein Schloss für einen Rentner in Die Tageszeitung van' 3. Juli 2012
- ↑ Hintergründe zur Zwangsversteigerung: Das Luftschloss der Kelly Family in Stern van' 3. Juli 2012
Literatur[ännern | Bornkood ännern]
- Henriette Meynen: Wasserburgen, Schlösser und Landsitze im Erftkreis. 4. Uplaag Köln 1992, ISBN 3-7927-0904-X.
- Matthias Weber: Erftstadt-Gymnich. 1. Uplaag 1984, J.P. Bachem Verlag Köln, ISBN 3-7616-0757-1.