Sisyphos
Sisyphos (ooltgr. Σίσυφος) oder Sisyphus (Lat.) is en Figur ut de Greeksche Mythologie. Dor warrt vertellt, he schall Korinth grünnt hebben un he weer denn de eerste König vun düsse Stadt.
De Mythos[ännern | Bornkood ännern]
Sisyphos hett as Minsch de Gödder rutfoddert. De hefft denn Thanatos (de Dood) up em lostüert, de scholl em fangen. Man de plietsche Sisyphos hett Thanatos for'n Narren harrt un hett em fast bunnen. Ares hett em eerst en paar Dage later free tüdelt. In düsse Tied is numms up de Eer storven. Na düssen Trick hefft de Gödder befahlen, dat he würklich starven möss. Man he hett siene Fro den Updrag geven, se scholl em nich begraven un bavenhen scholl se em keen Münt as Obolus för den Fährmann Charon unner de Tung leggen. So weer dat nich mööglich, dat he över den Styx överwegföhr na de Unnerwelt. As he in den Hades ankeem, hett he dor bi den Gott Hades över siene Fro klaagt un seggt, se harr sik um nix scheert. Dor möss Hades em torüchstüern, dat he de nödigen Ritualen afhanneln konn.
Man as Sisyphos baven weer, dach he dor nich an, torüch to kehren na de Unnerwelt un besloot, he woll noch en beten wieter leven. Amenne kregen de Gödder em man liekers tofaat un he wurr verordeelt, dat he in den Tartaros en swaren Felsblock up en steilen Barg rup wöltern möss. Man de Felsblock rull jummers wedder vun den Topp vun den Barg wedder hendal. So weer he verdammt, he möss ewig wedder den Felsblock nee un nee den steilen Barg rup schuven.
Moderne[ännern | Bornkood ännern]
- In dat 20. Johrhunnert is Sisyphos dör Albert Camus in sien Essai De Mythos vun Sisyphos (1942) as en Bispeel tekent wurrn för den absurden Minschen. Düsse Minsch begrippt, dat de Welt keen Sinn hett un mit den Verstand nich to begriepen is. Man he gifft doch nich Bott un boot so sien egen Sinn up (kiek bi: Existentialismus).
- In Hoochdüütsch, Plattdüütsch un Nedderlannsch warrt dat Woort Sisyphusarbeit bruukt för sinnlose Arbeit, de umsünst maakt warrt.