Semkenfohrt

Vun Wikipedia
Ne’e Semkenfohrt in dat Blockland
Ole Slüüs an de Ne’e Semkenfohrt
Iesbahn bi de Semkenfohrt in’n Februar 2012

De Semkenfohrt is en Schippgraven, de von dat Düvelsmoor na Bremen föhrt. De Graven weer för Törfkahns dor, de Törfhannel dreven hebbt. Düsse Kanaal besteiht ut dree Afsneed, de to verscheden Tieden anleggt worrn sünd: de ole Semkenfohrt, de Semkenfohrtkanaal un de Ne’e Semkenfohrt (ok Ne’en Törfkanaal nöömt).

Verloop[ännern | Bornkood ännern]

De ole Semkenfohrt fangt an de Steed an, an de Tüschendörp un Adelsdorp tohoopdreept. Von dir geiht se na Süüdwesten un löppt twüschen Adelsdorp un Ottersteen langs un denn twüschen Nee-Bargdörp un Mooringen. In’n Süden von’n Weyerbarg maakt de Semkenfohrt en Knick na Noordwest un denn na en kort Stück wedder op Süüdwest. Nu geiht de Graven twüschen Süüdweed un Westerweed dör. An de Steed, an de de Graven op Worpheim drippt, dreiht he na Noordwest, geiht dör Waakhusen un münnt dor in de Hamm. Op dat annere Över münnt de Karkdammgraven in de Hamm, de na Oosterholt föhrt.

De twete Afsnidd, de Semkenfohrtkanaal twiegt in Worpheim von de Semkenfohrt af un geiht na Süüdwesten dör dat St.-Jürgensland. De Kanaal krüüzt den Oort Överenn, dat Karkenfleet un dat Truper Sielfleet. In Truperdiek münnt de Kanaal denn in de Wümm.

De drüdde Afsnidd geiht von dat annere Över von de Wümm (Grenz von Nedderblockland na dat Överblockland bi’n hüdigen Gasthoff Gartelmann) na Süüdwesten dör dat Blockland, is 3,4 Kilometer lang un drippt denn bi de hüdige Autobahn 27 op de Lütte Wümm. Dat is dat Enn von de Semkenfohrt. Von dor güng de Fohrt för de Törfkahns en Stück wieder de Lütte Wümm rop un denn na Süden in’n Törfkanaal, de bet to’n Törfhaven in Findörp reckt. Dor is de Törf för Bremen utlaadt worrn.

Historie[ännern | Bornkood ännern]

De Fohrt mit Törfkahns von dat Düvelsmoor üm’n Weyerbarg över Hamm, Lesum un Wümm hett fröher dree bet veer Daag duurt. De Strööm sünd fröher in veel Slingen mäandert, wat tosätzlich veel Tied köst hett. Üm den Weg eenfacher un körter to maken, is von 1754 af an in de Tied von Jürgen Christian Findörp sien Moorkolonisatschoon de ole Semkenfohrt anleggt worrn. De Semkenfohrtkanaal is 1869 för 28.000 Daler anleggt worrn[1] un de ne’e Semkenfohrt keem noch later in dat 19. Johrhunnert to. As de Semkenfohrt trech weer, weer de Fohrtied man noch so een bet twee Daag.

De Naam kummt wohrschienlich von een von de Familien öp de ehr Land de Semkenfohrt anleggt worrn is. Semken is ok vondaag noch en Familiennaam, de fakener in de Region vörkummt.

In de eerste Tied sünd de Kahns noch mit en Winn över den Diek von de Wümm tagen worrn. 1902 is en Slüüs anleggt worrn. De Kamer weer 21,50 Meter lang un 2,40 Meter breed. Düsse Slüüs is 1995 slaten worrn.

Üm 1880 rüm sünd so bi 25.000 Scheep in’t Johr mit Törf na Bremen föhrt. 5000 bet 6000 (mit en Ümfang von 30.000 bet 36.000 m³) kemen över de Semkenfohrt.[2]

Wenn de Wind good stahn dee, kunnen de Törfkahns seilen, de annere Tied müssen se aver treideln, staken oder wriggen.

Vondaag sett de Bremer Iesvereen an de ne’e Semkenfohrt in’t Blockland jeden Winter en Stück Land twüschen de Blocklanner Hemmstraat, Gartelmann sien Gasthoff, de Semkenfohrt un de Süüdwenje ünner Water, üm dor en Iesbahn antoleggen. Dat eerste Maal hebbt se dat in’n Winter 1965/1966 daan. Dat Rebeed is so bi 30 Hektar groot.

Footnoten[ännern | Bornkood ännern]

  1. Annalen der Landwirthschaft in den Königlich Preussischen Staaten. Band 57, 1871, Sied 60
  2. Bremen und seine Bauten. Schünemann Verlag, Architekten- und Ingenieur-Verein, Bremen 1900, Sied 611