Schabloon

Vun Wikipedia
Tekenschabloon

En Schabloon (vun franz. échantillon) is en utsneden Munster, wo en jummers de glieken Saken mit fardig maken kann. Dat gifft Schablonen ut Holt, Blick, Stoff oder ok vun Papp. Dat gifft Schablonen, de sünd an de Kanten utsneden. Dor kann een denn de Böverkant vun en Saak mit torechtmaken, as bi Smuckliesten un Gesimsen. In annere Schablonen sünd Streken, Biller oder allerhand Smuckformen insneden. Wenn een so en Schabloon gegen en Ünnergrund gegenhöllt un dor denn överhen malt oder sprayt, denn gifft dat jummers datsülbige Bild oder Teken. In de Kunst vun de Street Art speelt de Schabloon en grode Rull. Dor kann een vigeliensche Biller in korte Tiet un mit wenig Risiko mit an'e Wänn spröhen.

Anners weert Schablonen ok bi dat Technisch Teken bruukt oder ok in de Mathematik, wenn ganz akraat en Parabelschabloon oder en Schabloon för en Sinusfunktschoon för den Graphen vun en Funktschoon torecht maakt weern schall.

Bi Multiple-Choice-Tests, as bi den Fraagbogen för'n Föhrerschien, weert vun de Prüfers Antwoortschablonen bruukt, vunwegen dat de Resultaten vun en Test denn gauer rutkaamt. De richtigen Antworden sünd in de Finsters vun de Schabloon to sehn un een bruukt bloß natellen, wie veel Krüüzen to sehn sünd.

Street Art in Barcelona: Biller in Schablonen-Technik