Saskia van Uilenburgh

Vun Wikipedia
Wesseln na: Navigatschoon, Söök
Saskia Uylenburgh maalt vun Rembrandt

Saskia (van) Uylenburgh (* Leeuwarden an'n 2. August 1612; † 14. Juni 1642 in Amsterdam) weer Rembrandt van Rijn siene Fro.

Saskia weer de jungste Dochter vun den Afkaten Rombertus van Uilenburgh un den siene Fro Sjoukje Ozinga. 1584 is Saskia ehr Vadder Börgermeester vun de freesche Stadt Leeuwarden wurrn. Bavenhen weer he Afordenten vun de Provinz Freesland. As se 12 Johr oolt weer, weern al beide Öllern doot un Saskia is denn, tohopen mit ehren Broder Geert un ehre Süster Titia uptagen wurrn vun ehre öllere Süster Hiskje un de ehren Mann in Het Bildt, nich wiet af vun de Küst. An'n 22. Juni 1634 hett Rembrandt ehr dor heiraat. He kenn ehr över sien Macker Hendrik Uilenburgh, wat Saskia ehr Cousin weer. Hendrik weer Kunsthöker in Amsterdam un vun 1631 af an hett Rembrandt mit em to doon harrt. Vunwegen dat Saskia ut en „betere Familie“ stamm, kreeg Rembrandt Togang to den Krink vun vörnehme Amsterdammers un konn dor siene Biller goot an'n Mann bringen.

Rembrandt keem gau to Geld un 1639 sünd Saskia un he in en vörnehm Huus an de hüdige Jodenbreestraat (dormols: St. Anthoniebreestraat) tagen. Dat lä direktemang blangen Hendrik Uilenburgh sien Huus in dat jöödsche Quartier. De beiden hefft veer Kinner harrt. Dree sünd fröh storven, man 1641 is denn noch de Söhn Titus boren. He is an'n 22. September 1641 döfft wurrn. Dat duer nich lang, dor is Saskia an Tuberkuloos storven. Ehr Graff hett se in de Oude Kerk kregen. Rembrandt hett sik denn woll mit de Amm Geertje Dircx inlaten un hett ehr Saskia ehren Smuck schunken. Later hett he ehr verstött un sik an Hendrikje Stoffels holen. So, as dat utsütt, hett Saskia för allerhand Biller vun Rembrandt dat Modell afgeven.