Samenleider
Vun Wikipedia
De Samenleider (lat.: ductus deferens) is bi de männlichen Söögdeerten, Vagels un Reptilien de Verbinnen vun de Nevenklöten na de Harnröhr un deent to’n Wiederleiden vun de Spermien, also den Samen.
De Samenleider tütt sik, vun de Klöten kamend, toeerst dör den Liestenkanal, löpt denn an de Harnblaas langs un münnt in de Harnröhr, nadem sik de Utföhrgang vun de Blasendrüüs (Samenblaas, Vesicula seminalis) dormit verbunnen hett.
Wenn de Samenleider chirurgsch ünnerbroken warrt, snackt man vun Vasektomie. Dordör warrt de Mann unfruchtbor.
[ännern] Histologie
As all binneren Hollorganen wiest ok de Samenleider den Opbo vun en „hüütig-muskulösen“ Slauch op mit en binnenliggend Sliemhuut, en Muskelschicht un en butenliggend Tunica serosa.
De Sliemhuut wiest Längsfalten op un hett keen Submukosa. To’t Lumen billt de Organafgrenzen je na Oort en een- bit tweereegig Epithel, wat deelwies mit Stereozielen besett is. De Egenschicht vun de Sliemhuut (Lamina propria mucosae) is dör Netten ut elastisch Binnengeweevfasern kenntekent, de sik bit in de Muskelschicht treckt. Drüsen sünd blots nöög de Münnen in de Harnröhr in’t Rebeet vun de Samenleiderampull utbillt.
De glatte Muskulatur vun de Muskelschicht is in verscheeden Anstiegwinkels anordent un billt so Spiraltouren in de Samenleiderwand.
In de Serosa, also den Buukfell, laat sik tomeist Rudimenten vun den Müller-Gang nawiesen, mitünner en helen Uterus masculinus
[ännern] Samenleiderampull
In de Wand vun den Endafsnitt vun’n Samenleider sünd Drüsenpaketen inlagert, de as Glandulae ampullae betekent warrt. Bi Minschen un de meisten Deertenoorden (Utnahmen sünd t. B. de Kater un de Ever) föhrt disse Drüseninlagern to en Opdrieven vunvn Samenleider, de ok vun buten to sehn is un de as Samenleiderampull (Ampulla ductus deferentis) betekent warrt.
So ein Samenleiderampull is bi de mehrsten Warveldeerten utbillt. Se fehlt aver t. B. bi de Büdelbeester, Seekeih, Wale, Katten un Swien, wobi in de Wand tomeist liekers Glandulae ampullae utbillt sünd, de aver blots nich to de sichtboren Utwieten föhrt. De Samenleiderampull vun de Söögdeerten höört to de akzessorischen Geslechtsdrüsen un produzeert en Deel vun de Samenfletigkeit. Bi de Kloakenbeester is woll en Samenblasenampull dor, man se wiest keen sekretorische Aktivität.
[ännern] Literatur
- A.J.P van den Brock: Gonaden und Ausführungswege. In: Bolk et al. (Hrsg.): Handbuch der vergleichenden Anatomie der Wirbeltiere. Urban & Schwarzenberg 1933, Bd. 6, S. 1–154.
- H.-G. Liebich: Funktionelle Histologie der Haussäugetiere. Schattauer, 4. Opl. 2003. ISBN 3-7945-2311-3
- Uwe Gille: Männliche Geschlechtsorgane. In: Salomon, F.-V. u. a. (Hrsg.): Anatomie für die Tiermedizin. Enke-Verlag, Stuttgart 2004, S. 389–403. ISBN 3-8304-1007-7
