Rheiderland

Vun Wikipedia
Wesseln na: Navigatschoon, Söök
Dat Rheiderland vandag up beid Sieden van de Grenz. (Kaart up Dütsk.)

Dat Rheiderland is en Landstreek in Düütschland un de Nedderlannen tüsken Eems un Dullert. De düütsche Deel van’t Rheiderland liggt westelk van d’ Eems in Oostfreesland. De nedderlannsche Deel (schrieven: Reiderland) liggt in d’ Provinz Grunneng. Nett as dat Overledingerland, dat Moormerland un dat Lengenerland is dat Rheiderland en van de veer historisk Landskuppen van d’ Landkreis Leer.

De gröttste Deel van’t Rheiderland is Maschland (Pollers) un is nett so platt as de Rest van Oostfreesland, man dat gifft noch minner Bomen. Dat Land in d’ Noorden wurr van d’ Dullert torüggwunnen un so ist da d’r leep good, um Korn antobauen. Bit vandag sünd daar de prachterg Hoffen van de rieke Buren („Pollerfürsten“) to sehn. In d’ Süden van’t Rheiderland gift dat en bietje Moor, wat to dat Bourtanger Moor tohört.

Dat Rheiderland is riek an oll Örgeln in de Karken, de van hör Gemeenten vör hunnerten van Jahren köfft worden sünd. Besünners bedüdend is de Arp Schnitger-Örgel in d’ Georgskark in Weener.

Blick van d’ Diek

De meeste Karken un Minsken in de Streek sünd van de reformeerte Konfesschoon. In en paar Dörpen gifft dat ok en lutherske Kark. Minnerheiden sünd de Old-Reformeerten un freei Karken un ok en paar Kathoolsch.

De meeste Lü in’t Rheiderland proten dat Rheiderlanner Platt, en Dialekt van dat Oostfreesch Plattdüütsch, bi hör dagelk Leven. Kinner wassen faken mit twee Spraken – Hoog un Platt – up.

Gröttste Stadt is Weener, de ok Hööftstadt van de oll Landkreis Weener was, de siet de 20er Jahren to de Landkreis Leer hört. Updeelt is dat Rheiderland up de düütsche Sied in de Gemeenten Weener, Bunn un Jemgum un de Stadtdeel Bingum van de Stadt Leer. Up nedderlannsche Sied is dat de Gemeente Reiderland un Delen van de Gemeenten Bellingwedde, Scheemda un Winschoten.

Wenn dat ok dat bold kien Industrie in dat Rheiderland gift, is de Partei SPD hier leep stark un kriggt bi Wahlen normaalerwies mehr as 50 Perzent van de Stimmen.

Weblinks[ännern | Bornkood ännern]