Regerungsbezirk Lümborg

De Regerungsbezirk Lümborg weer bet 2004 een von de toletzt veer neddersassischen Regerungsbezirken. De Seet weer Lümborg. He harr Stand 30. September 2004 1.702.179 Inwahners op en Rebeed von 15.507,13 km².

Historie[ännern | Bornkood ännern]

De Regerungsbezirk Lümborg is an’n 1. April 1885 grünnt worrn, as de Landdrostien in dat fröhere Königriek Hannover (siet 1866 prüüßsche Provinz Hannover) oplööst un in Regerungsbezirke ümwannelt worrn sünd. Prüßen weer al siet 1815 in Regerungsbezirke indeelt un dat is 1885 för Hannover denn nahaalt worrn. De Regerungsbezirk Lümborg is ut de Landdrostie Lümborg billt worrn. De olen Ämter sünd dor denn bi to wat gröttere Kreise tohoopleggt worrn. De Landdrostie Lümborg harr to disse Tied üm un bi 377.000 Inwahners.^[1]

1885 hebbt to’n Regerungsbezirk Lümborg de dree Stadtkreise Celle, Horborg un Lümborg un de 13 Landkreise Bleikd, Borgdörp, Celle, Dannenbarg, Fambossel, Gifhorn, Horborg, Isenhagen, Lüchow, Lümborg, Soltau, Ülzen un Winsen tohöört. Bi de Kreisreform von 1932 is de Tall Landkreise op negen dalgahn. Bleikd is en Deel von’n Kreis Lümborg worrn, Isenhagen von Gifhorn, Lüchow von Dannenbarg un Winsen von Horborg.

1937 is dör dat Groot-Hamborg-Gesett de gröttste Stadt in’n Regerungsbezirk, Horborg-Willemsborg, an de Stadt Hamborg gahn un weer nich mehr Deel von’n Regerungsbezirk. 1951 is Wulfsborg kreisfre’e Stadt worrn un weer denn nich mehr Deel von’n Landkreis Gifhorn.

An’n 1. März 1974 hett de Regerungsbezirk Lümborg dat Rebeed von’n Landkreis Borgdörp an’n Landkreis Hannover in’n Regerungsbezirk Hannover afgeven.

Bi de Kreisreform, de in Neddersassen an’n 1. August 1977 maakt worrn is, sünd en Reeg Kreise to gröttere tohoopslaten worrn. De Landkreis Soltau is dorbi Deel von’n Landkreis Soltau-Fambossel worrn, de Stadtkreis Celle is Deel von’n Landkreis Celle worrn un de Stadtkreis Lümborg von’n Landkreis Lümborg.

An’n 1. Februar 1978 is dat Rebeed von’n Regerungsbezirk Stood mit de fiev Landkreise Cuxhoben, Oosterholt, Rodenborg, Stood un Veern denn an’n Regerungsbezirk Lümborg gahn. De Regerungsbezirk Stood is oplööst worrn. De Landkreis Gifhorn un de Stadt Wulfsborg sünd na’n Regerungsbezirk Bruunswiek wesselt.

De Regerungsbezirke in dat Land Neddersassen bestünnen bet to’n 31. Dezember 2004. Mit den 1. Januar 2005 sünd all Regerungsbezirke in Neddersassen mit de Bezirksregerungen oplööst worrn.^[2] In Lümborg is dat fröhere Gebüüd von de Bezirksregerung in „Behördenzentrum Op de Huud“ ümdöfft worrn, in dat siet 1. Januar 2005 16 Behörden ünnerbröcht sünd, ünner annern de Neddersassische Landsschoolbehörd, de Polizeidirekschoon Lümborg, da Landsamt för Bezüge un Versorgung un dat Landsamt för Sozialsaken. An de Steed von de Regerungsvertretung, de 2005 inricht worrn is, sünd 2014 Regionalbeopdragte för dat Rebeed von’n olen Regerungsbezirk Lümborg in de Grenzen von 1978 bet 2004 beropen worrn.

Inwahners^[3][ännern | Bornkood ännern]

Landkreis	Inwahners 1890	Inwahners 1900	Inwahners 1910	Inwahners 1925	Inwahners 1933	Inwahners 1939	Inwahners 1950	Inwahners 1960	Inwahners 1969	Inwahners 1980
Stadt Lümborg	20.665	24.693	27.790	28.899	31.171	33.535	58.139	58.600	59.900
Bleikd	20.862	20.299	20.053	19.654
Lümborg	19.940	20.683	22.567	24.078	44.103	46.448	65.356	55.800	63.200	131.700
Borgdörp	35.766	41.381	49.777	58.409	57.225	61.406	114.934	113.600	138.100
Stadt Celle	18.901	19.883	23.263	25.545	27.734	35.622	59.667	56.500	56.300
Celle	29.661	31.577	39.290	45.987	47.821	52.305	101.655	94.100	104.800	165.300
Lüchow	29.407	28.762	29.225	29.879
Dannenbarg	14.237	13.663	13.560	13.317
Lüchow-Dannenbarg					41.246	40.530	72.741	52.500	50.700	48.700
Fambossel	26.221	27.805	30.762	34.410	35.140	39.985	72.482	59.700	62.800
Soltau	16.753	19.986	22.517	25.099	26.736	32.469	64.480	60.700	67.000
Soltau-Fambossel										126.800
Isenhagen	16.402	17.846	20.358	22.036
Gifhorn	30.828	34.097	37.208	39.174	62.302	71.335	144.959	117.800	136.800
Stadt Horborg	35.081	49.153	67.025	73.212	112.593
Winsen	23.800	26.389	30.039	31.610
Horborg	36.736	48.805	60.755	69.308	78.499	65.031	120.270	113.200	147.000	184.400
Ülzen	44.833	47.576	52.216	56.998	57.711	61.382	117.614	95.400	95.700	95.600
alltohoop	420.093	472.598	546.405	597.615	622.281	540.048	992.297	877.900	982.300	752.500