Rear Window (1954)

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Rear Window
Düütsch Titel: Das Fenster zum Hof
Produkschoonsland: USA
Johr vun’t Rutkamen: 1954
Läng: 112 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Alfred Hitchcock
Dreihbook: John Michael Hayes
Produkschoon: Alfred Hitchcock
Musik: Franz Waxman
Kamera: Robert Burks
Snitt: George Tomasini
Kledaasch: Edith Head
Dorstellers

Rear Window (op plattdüütsch so veel as „Dat Finster na achtern rut“; dt. Titel: Das Fenster zum Hof) is en US-amerikaanschen Thriller vun Alfred Hitchcock ut dat Johr 1954. De Film baseert op de Kortgeschicht It Had to Be Murder vun den Krimi-Schriever Cornell Woolrich ut dat Johr 1942.

Inholt[ännern | Bornkood ännern]

L. B. Jefferies („Jeff“) is en Fotoreporter, de sik bi en Unfall dat Been broken hett un nu mit’n Gipsbeen in’n Rullstohl sitt. He kann nich veel maken un kiekt vör Langewiel den helen Dag ut sien Finster, wat in’n Binnehoff vun sien Wahnanlaag so allns vör sik geiht. Sien Plegersche Stella is vun sien Neeschier gor nich andoon, de meist bit to’n Voyeurismus geiht. Besöök kriggt Jeff sonst blots vun sien Leefsten Lisa Freemont, de veel in de vörnehmen Kreisen ümgeiht. Dat is de Grund, worüm Jeff ehr nich heiraten will, vun wegen, dat he meent för ehr nich goot noog to wesen. Se will vun dissen Tüdelkraam aver nix weten, vunwegen dat se em leef hett.

Een Nacht waakt Jeff op un beobacht ut dat Finster, dat sien Naver Mr. Thorwald, en Vertreder, midden in de Nacht mehrmols mit sien Musterkuffer weggeiht. An nächsten Morgen is siene Fro verswunnen un Jeff sütt sien Naver, as he en Saag un en Mess in Papeer inwickelt. He kummt op den Gedanken, dat Thorwald sien Fro an de Siet maakt hett un vertellt Stella un Lisa vun sien Verdacht. De denkt eerst, dat Jeff nu opletzt verrückt worrn is bi sien Kiekeree, ännert jümmer Ansichten aver gau, as se seht, dat Thorwald en groten Schrankkuffer tobinnen deit.

Jeff schallt den nächsten Dag sien ollen Fründ Tom Doyle in, de hüüt bi de Kriminalpolizei arbeit. Ok de is vun de Geschicht nich övertüügt, seggt aver to, inoffiziell ’n beten natoforschen. Dorbi kummt rut, dat Thorwald sien Fro na Kur schickt hebben schall un eenige Tügen dat woll ok sehn hebbt. Man, de Fro ehr Handtasch hangt noch jümmer an’t Bett, so dat Lisa nich recht an de Kur glöven mag: En fro geiht nienich ahn ehr Handtasch weg. Doyle hett aver noog vun de Geschicht un stellt sien Ünnersöken in.

Jeff un Lisa weet eerst nich recht, wat se sik nu frein schüllt oder nich. Dat jemehr Detektivarbeit för de Katt weer, passt jem nich recht. Op eenmol gifft dat Schandaal in’n Hoff, as en Naversche ehrn Hund dood vörfinnt. All Navers kiekt se na, wat los is, mit Utnahm vun Thorwald. Jeff finnt rut, dat een poor Planten in en Blomenbeet körter laat as noch vör twee Weken un glöövt sik nu seker, dat Thorwald dor wat inkuhlt hett – villicht sogors de Liek vun sien Fro. Üm em ut sien Wahnung to locken, röpt he em anonym an. Lisa un Stella graavt in de Tiet dat Beet üm, künnt aver nix finnen.

Dorna Stiggt Lisa bi den Naver över de Füertrepp in, üm in de Wahnung na Bewiesen to söken. Jeff will ehr mit dat Telefon künnig maken, wenn Thorwald torüch kummt, warrt den aver vun aflenkt, as en annere Naversche kort vör’n Sülvstmoord steiht. Dordör markt Stella un he nich rechttietig, dat Thorwald torüchkummt un Lisa in de Fall sitt. Se warrt opdeckt un dat kummt sogors to en Gerangel, bit in’n letzten Moment jüst noch de Polizei indrapen deit. Lisa is wedder in Sekerheit und hett in de Wahnung wohrhaftig den Bewies funnen: den Ehring vun de vermissten Fro. As Lisa Jeff dat dör dat Finster wiesen deit, kriggt Thorwalds dat aver mit.

Wiel Stella mit en Kautschoon de Polizei opsöcht üm Lisa ruttoholen, geiht Thorwald na Jeff röver, de in’n Rullstohl nich weglopen kann. Jeff kann em mit en poor Blitzlichters vun sien Fotoapparat blennen un winnt so en beten Tiet. Man, opletzt kummt Thorwald an em ran un drammt Jeff mit sien Rullstohl na’t Finster un versöcht em ruttostöten. In den Moment kamt Lisa un Stella mit de Polizei torüch. Thorwald warrt gau fastnahmen, man Jeff kann sik nich mehr fasthollen un stört in’n Hoff rünner, woneem he vun twee Polizisten affungen warrt.

An nächsten Dag sitt Jeff wedder in sien Rullstohl vör’t Finster – nu aver mit twee Gipsbeen, wiel de Kamera wiest, dat bi de Navers allns in de Reeg kamen is. Bi Jeff liggt Lisa op’n Bett – kleedt in för ehr so untyypsche Jeans un en eenfacke Bluus, as Teken dat se sik för Jeff ännern will.

Kritik[ännern | Bornkood ännern]

  • Lexikon vun’n internatschonalen Film: „Hitchcocks Versuch über die unersättliche Gier der Augen, über die Wonnen und den Alpdruck des Voyeurismus in Form eines spannenden Thrillers. Ein sehr spannender, dramaturgisch ausgefeilter Film ohne Schockeffekte. Einer der stilistisch klarsten und originellsten Filme Hitchcocks.“
  • De bekannte amerikaansche Filmkritiker Leonard Maltin hett „Rear Window“ veer vun veer möögliche Steerns geven.
  • Stuttgarter Zeitung (1984): „Mit detailbesessener Akribie schafft Hitchcock den Schauplatz für seine aufregende Geschichte. Eine perfekte Besetzung unterstützt die Wirkung des intelligenten Reißers.“

Utteken[ännern | Bornkood ännern]

De Film is goot opnahmen worrn. He weer tosamen dörteihn mol för Filmpriesen vörslhan, dorünner aleen veer mol för den Oscar in de Kategorien Best Kamera (Klöör), Best Speelbaas, Best Toon un Best Dreihbook na Vörlaag. Wunnen hett de Film veer Priesen:

Achtergrünnen[ännern | Bornkood ännern]

  • Dat Dreiboock hett John Michael Hayes schreven, de vörher Radio-Krimis un -Kummedies maakt hett. Vun de Kortgeschicht vun Woolrich hebbt se an’t Enn blots de Grundidee övernahmen, de Inholt vun den Film is an sik nee opboet worrn.
  • Dat Set för Rear Window is ahn Utnahm in’t Studio opboet worrn. För de Dekoratschoon weern Sam Comer un Ray Moyer verantwoortlich, as art directors weern Hal Pereira un Joseph MacMillan Johnson in de Plicht. Woll speelt de FIlm in blots een Ruum, man dat egentliche Set wiest den Binnenhoff mit de annern 31 Wahnungen, vun de twölf vullstännig inricht weern. De Bo un vör allen dat Utlüchten weern bannig opwännig.
  • Rear Window weer Hitchcock sien eersten Film för Paramount Pictures, för de he negen Filmen maken schüll. Opletzt sünd dat blots fief worrn. Luut Verdrag sünd de Rechten an den Film (un wietere dree) an Hitchcock torüchfallen, de jem as Arv för sien Dochter opbewohren wull. Se weern dorüm johrteihnten lang nich to sehn un keemen eerst na Hitchsock sien Dood wedder in’t Kino un in’t Feernsehn.
  • As so faken in sien Filmen, hett Hitchcock ok in dissen en Cameo-Optritt: Na ruchweg 25 Minuuten is he in de Wahnung vun den Ledermaker to sehn, woneem he en Klock optehn deit.
  • In Düütschland weer de Film 1955 dat eerste mol ünner dat Regeer vun Peter Elsholtz synchroniseert worrn. In disse Faten weer de Stewart vun Siegmar Schneider snackt as tomeist. Eleonore Noelle harr Grace Kelly synchroniseert. As de Rechten acht Johren na de Ooropföhren an Hitchcock fallen sünd, sünd all Kopien vun den Film tonichten maakt worrn – ok all utlännschen Fatens. De eerste Synchroonfaten is sietdem verschollen bit op Fragmenten, de vundaag en hogen Sammlerweert hebbt. De Film keem 1984 nee in de Kinos, un so müss en ne’e Synchroonfaten maakt warrn. För James Stewart künn wedder Siegmar Schneider ünner Verdrag nahmen warrn, GRace Kelly weer in disse Faten vun Monica Bielenstein snackt. De DVD-Faten vun den Film bargt ok de Synchronisatschoon vun 1984.
  • In’t Johr 1998 hett de Speelbaas Jeff Bleckner de Kortgeschicht noch mol ünner den glieken Titel för dat US-amerikaansche Feernsehn verfilmt. De Hööftrull harr Christopher Reeve. De Film harr aver keen Betog to Hitchcock sien Film. De Film vun 1954 geev de Film Inspiratschoon för den Teen-Movie-Thriller Disturbia.

Literatur[ännern | Bornkood ännern]

  • Cornell Woolrich: Das Fenster zum Hof und vier weitere Kriminalstories (OT: Rear Window). Diogenes, Zürich 1989, ISBN 3-257-21718-8
  • Eric A. Leuer: "To See You Is To Love You!" – To de Rull vun’n Voyeurismus in Alfred Hitchcock sien „Rear Window“, Grin-Verlag, München 2009, ISBN 978-3-640-24434-8
  • Robert A. Harris, Michael S. Lasky, Rgv. Joe Hembus: Alfred Hitchcock und seine Filme (OT: The Films of Alfred Hitchcock). Citadel-Filmbuch bi Goldmann, München 1976, ISBN 3-442-10201-4
  • François Truffaut: Mr. Hitchcock, wie haben Sie das gemacht? Heyne, 2003. ISBN 3-453-86141-8 (Reeg vun Interviews (circa 50 Stunden) vun den frz. Speelbaas ut dat Johr 1962). Originalutgaav: François Truffaut: Le cinéma selon Hitchcock (dt. „Der Film gemäß Hitchcock“) Simon und Schuster, 1984. ISBN 0-671-52601-4
  • John Russel Taylor: Die Hitchcock-Biographie, Fischer Cinema 1982, ISBN 3-596-23680-0
  • Donald Spoto: Alfred Hitchcock – Die dunkle Seite des Genies. Heyne, München 1984, ISBN 3-453-55146-X (dt. Översetten vun Bodo Fründt)
  • Bodo Fründt: Alfred Hitchcock und seine Filme. Heyne Filmbibliothek Band Nr. 91, 1986, ISBN 3-453-86091-8

Weblenken[ännern | Bornkood ännern]