Raasay

Vun Wikipedia
Wesseln na: Navigatschoon, Söök
Raasay

Raasay (de Naam bedüüd Reh-Eiland) is en Eiland twüschen Skye un dat faste Land vun Schottland, dat to de Binneren Hebriden höört. Üm 1800 rüm hefft mehr as 900 Lüde up Raasay wahnt, hüde gifft dat noch 194 Inwahners. Dat Eiland warrt dör den Sund vun Raasay vun Skye un dör den Binneren Sund vun Applecross trennt. Dat lütte Eiland South Rona mi een Inwahner liggt vör ehr Noordküst.

Dat Eiland hett en Läng vun 22,5 Kilometers vun Noord na Süüd un en Breed vun fief Kilometers vun Oost na West. De hööchste Punkt is mit 444 Meters de Dun Caan. Dat Dörp Inverarish liggt an de Waterkant in’n Süüdoosten. En Deel vun’t Dörp deen in'n Eersten Weltkrieg as Kriegsfangenenlager för Düütsche. Die Fangenen harrn in dat Arzbargwark vun dat Eiland arbeiden musst, dat se korte Tiet na den Krieg stillleggt hebbt.

Vundaag arbeidt de Inwahners in de Fischeree, för de Fähr oder pennelt to ehr Arbeidsplätz na Portree op Skye. Dat gifft ene Volksschool, aver öllere Schölers mööt mit de Fähr un den Bus na Portree fohren.

Wiel dat Eiland geologisch intressant is, warrt Raasay vun vele Studenten besöökt, de hier an Kartierungsprojekten mitarbeidt.

Sehnswöördigkeiten sünd de Överresten vun en Broch, de Ruinen vun dat Slott Brochel, dat ole Raasay House un vele Wannerweeg. Raasay is de Heimat vun de Raasay-Wöhlmuus, de eenzig op dit Eiland leevt. Todem gifft dat vele verschedene Plantenoorden un en grote Populatschoon vun Ottern.

En Fähr, de 15 Minuten bruukt, verbinnt dat Eiland mit Sconser op Skye. En lütt Laden un en Poststell finnt sik in Inverarish. Todem gifft dat dat Isle of Raasay Hotel, dat Raasay Outdoor Center un en Jöögdherbarg.


Koordinaten:57° 23′ N, 006° 02′ W