Povoação Velha

Vun Wikipedia
Povoaçao Velha, in’n Süüden vun’t Eiland Boa Vista

Povoação Velha (port.: „olle Siedlung“; op Kapverdisch Kreol Povoason Bédja) is en Dörp in’n süüdööstlichen Deel vun’t Eiland Boa Vista, een vun de negen bewahnten Eilannen vun de Republiek Kap Verde. De Siedlung is de öllste op’t Eiland.

Geografie[ännern | Bornkood ännern]

De Huusbarg Rocha Estância, vun’n Noorden bekeken

Dat Dörp liggt in’n Süüdoosten vun Boa Vista in den Deel vun’t Eiland, wo de wenigsten Minschen leevt, un is ümgeven vun drögen Sand un Steenwööst. De nächste Stadt vun hier ut is Rabil in’n Noorden, wat ruchweg 16 km wiet weg is. Wieter na Süüden hen kummt en na den wieten Sandstrand vun Santa Monica, an den ok de ehmolige Oort Curral Velho liggt.

Povoação Velha liggt in en Oort Ketel: In’n Noordoosten liggt de Barg Rocha Estância mit en Hööch vun 354 m[1], de in’n Süüdoosten in’n Ponta de Poio övergeiht, de bit op 182 m anstiggt. Na Westen hen liggt opletzt de Rocha Gambeza mit en Hööch bit to 158 m

Historie[ännern | Bornkood ännern]

Igreja Nossa Senhora da Conceição buten dat Dörp

De Oort is as eerste fre’e Siedlung to’n Anfang vun’n Hannel mit Solt grünnt worrn[1]. Dat de Oort mitten in de Wööst boet worrn is, liggt an de Laag: De Inwahners weern bang vör Piraten, de faken de Öörd an de Küsten plünnern deen. Ümgeven vun de Bargens weer disse Steed aver nich to sehn, so dat de Minschen dor goot schuult weern. Un ok, wenn de Piraten kemen, weer tomindst noch noog Tiet sik in de Bargen to versteken.

In’n Hang vun’n Ponta de Poio steiht buten dat Dörp de Kark Igreja Nossa Senhora da Conceição. Se is 1828 boet worrn, steiht aver op dat Fundament vun en Kapell ut dat Johr 1680.[2]

Weertschop un Infrastruktur[ännern | Bornkood ännern]

De Levensstandard in’n Oort is teemlich siet. Ofschoonst Povoação Velha midden in de Wööst liggt, bedrieft vele vun de Inwahners Bueree. Industrie un Handwark gifft dat nich veel. De meisten Göder to’n Leven mööt vun de Hööftstadt vun’t Eiland Sal Rei herbröcht warrn. Ok för den Tourismus is de Oort nich intressant.

Bornen[ännern | Bornkood ännern]

  1. a b Pitt Reitmeier & Lucete Fortes: Cabo Verde – Kapverdische Inseln, Reise Know-How Verlag, Builefeld, 5. Oplaag, 2009, ISBN 978-8317-1771-2
  2. Kapverdische Inseln, Dumont Reisetaschenbuch, 3. Oplaag, 2007, ISBN 3-7701-5968-3


Koordinaten:16° 2′ N, 22° 55′ W