Pius VIII.

Vun Wikipedia
Pius VIII.
Ünnerschrift vun Pius  VIII.
Wappen vun Pius VIII.

Pius VIII. (* 20. November 1761 in Cingoli bi Ancona, Karkenstaat; † 30. November 1830 in Rom) – börgerlich Naam Francesco Saverio Castiglioni – weer Paapst van 1829 bit 1830.

Francesco Castiglioni entstammt en old italieensch Adelsfamilie. Sien theologisch Studien hett he an dat Collegio Campana in Osimo un dat Collegio Montalto in Bologna makt. 1785 hett he sien Studien mit Swoorpunkten in dat kanonischen Recht (Dr. iur. utr.) afslooten un wurr an‘ 17. Dezember in Rom to’n Preester weeht.

Dör sien Studium weer he besünners dorto geeignet, as Sekretär vun de Kommission to dat Begoodachten vun de Beslüsse vun de Synode vun Pistoia (1786) to arbeiten un wurr entsprekend beropen. Ansluutend wurr he in verscheeden Diözesen as Generalvikar insett, bevör he denn to’n Dompropst vun sien Gebortsoort Cingoli ernannt wurr.

Paapst Pius VII. hett Castiglioni an‘ 10. Oktober 1800 to’n Bischop vun Montalto ernannt. In sien Amtstiet dor fallt de Besetten vun Italien dör de napoleoonsch Truppen. Sien Moot un sien Wedderstand hebbt hüm in de Bevölkerung groot Ansehn verschafft. De Franzosen hebbt Castiglioni in‘ Juli 1808 in Mailand fastnommen. He wurr eerst nah den Rücktoog vun de franzöösch Truppen 1814 entlaaten. Bit 1816 bleev he Bischop in Cingoli.

An‘ 8. März 1816 wurr he to’n Kardinal un Bischop vun Cesena ernannt. 1821 wurr he to’n Grootpönitentiar vun de Kurie in‘ Vatikan ernannt un gliektiedig to’n Bischop vun Frascati. 1822 folg de Ernennung to‘n Präfekten vun de Indexkongregation. Nah de Dood vun Pius VII. 1823 gull Castiglioni as Kandidat mit de meest Utsichten för de sien Nahfolge. Aber de Konflikt tüschen Gemäßigten up de een Siet un konservativ Kraften up de anner Siet, hebbt sien Wahl verhinnert. Dat Verhältnis mit Paapst Leo XII. weer nah den Konflikten in dat Konklave belast. Castiglioni sien Karriere gung aber liekers wieder.

Pontifikat[ännern | Bornkood ännern]

Nah de Dood vun Leo XII. an‘ 10. Februar 1829 wurr en nee Konklave inberopen, in de Castiglioni an‘ 31. März 1829 to’n Paapst wählt wurr. De Krönung vun Pius VIII. weer an‘ 5. April 1829. An‘ 21. April 1829 hett he sien Enzyklika Traditi humilitati nostrae verapenlicht, in de he dat Programm vun sien Pontifikat vörstellen dee. Sien Gesundheitstostand weer dor aber all bannig slecht un he is an‘ 30. November 1830 storven.

Paapst Pius VIII. gellt as en vun de modernsten Paapsten. Sien utgliekend Wesen un sien diplomatisch Fähigkeiten wurrn eerst in dat 20. Johrhunnert weer vun sien Nahfolgers erreicht. Besünners fall sien Wietsicht up, mit de he de Julirevolution van 1830 in Frankriek akzepteert hett. In dit Verhollen hett he sück vun de meest Paapsten vun dat 19. Jorhunnert ünnerschett. Tegen den Wedderstand vun de Kurie un de franzöösch Legitimisten wies he sück mit de parlamentarisch Regeerensform ünner den „Börgerkönig“ Louis-Philippe inverstahn un hett hüm de traditionellen Titel vun den Roi Très Chretien (Allerchristlichst König) verleeht, de radikal Monarkisten blots den afsluuten Herrscher tobilligen wullen.

Weblenken[ännern | Bornkood ännern]

Pius VIII. Mehr Biller, Videos oder Audiodateien to’t Thema gifft dat bi Wikimedia Commons.
Vörgänger Amt Nafolger
Leo XII. Paapst
1829 - 1830
Gregor XVI.