Philipp Helbach
Philipp Helbach (* 28. September 1900 in Wilsdörp; † 22. März 1982 in Bookholt) weer en düütschen Politiker von de SPD.
Helbach is 1900 as Söhn von Katharina, borene Stölcken, un den Kröger Philipp Helbach boren. He weer op de Volks- un Middelschool in Horborg. He hett denn en Lehr as Maschinenboer in dat Separatorenwark in Sinsdörp maakt. Von Oktober 1917 af an hett he Militärdeenst daan un denn von 1919 bet 1939 as Maschinenboer un Slosser op Schippswarften un in Fabriken arbeidt, ok butenlanns. In’n Tweten Weltkrieg weer he von 1939 bet 1945 Soldaat. Na’n Krieg hett he as sülvstännigen Handwarker in Mäkelfeld leevt. He weer twee Maal verheiradt, harr aver keen Kinner.
1919 is Helbach in de SPD rin. De Gemeenraad hett em 1946 as Börgermeester von Mäkelfeld wählt. Dat Amt harr he bet 1972, as Mäkelfeld Deel von de Eenheitsgemeen Seevdaal worrn is. Helbach weer denn von 1972 bet 1976 Oortsbörgermeester von Mäkelfeld/Lütt Moor un Biornten von de Gemeen Seevdaal.
As Helbach 1976 ut Öllersgrünn dat Amt as Börgermeester afgeven hett, is he de eerste Ehrenbörger von de Gemeen Seevdaal worrn. In siene Amtstied is ut dat Dörp Mäkelfeld von 1.500 Inwahners en Wahnoort in dat Vörland von Hamborg mit 10.000 Minschen worrn.
Helbach weer von 1948 bet 1976 Afornten in’n Kreisdag von’n Landkreis Horborg. 1948 bet 1951 un 1964 bet 1968 weer he ok Landraad von’n Landkreis Horborg un 1961 bet 1964 Viez-Landraad. Von’n 6. Mai 1955 bet 5. Mai 1967 (drüdde bet föffte Wahlperiood) weer Helbach för den Wahlkreis Bookholt Maat von’n Landdag von Neddersassen.
Em to Ehren driggt dat Mäkelfeller Veranstaltungs- un Verwaltungsgebüüd vondaag den Naam Helbach-Huus.