Peroxid

Peroxiden sünd chemisch Verbinnen de en Peroxigrupp R₁-O-O-R₂ (bi organische Verbinnen; de R’s staht för Resten) oder en Peroxid-Ion O₂^2- (anorgansch Verbinnen) bargt. De Suerstoff hett dorbi de Oxidatschoonstall -1.

Eegenschoppen

Peroxiden hebbt en bannigen Drang to disproportioneeren, also gliektietig as Redukschoons- un Oxidatschoonsmiddel to wirken. Dorbi warrt veel Hitt free, as t. B. bi dat Disproportioneeren von Waterstoffperoxid to Suerstoff un Water. Vele Övergangselementen wirkt dorbi as en Katalysater un maakt dat flinker.

Orgaansch Verbinnen mit swacke C-H-Binnen, as Ethers oder Ketonen hebbt dat faken an sik, wenn se länger staht, mit den Suerstoff ut de Luft Peroxiden to billn. Bi’t Destilleern kann dat Explosionen utlösen. Dorüm schall man vörher jümmers kieken, wat sik Peroxiden billt hebbt.

Nawies

Peroxiden künnt t. B. dör Oxidatschoon von Jodid-Ionen nawiest warrn. Afgeven Lösmiddels farvt sik bruun. Dör dat Togeven von sättigte Stärklösen kann de Fienföhligkiet noch verbetert warrn; Dor entstaht denn bannig blaue Verbinnen von Jod un Stärk. Gifft ok Teststäven dorför to köpen.

Herstellen un Sekerheit

Dat Anthrachinon-Verfohren is dat wichtigste bi de Herstellen von Waterstoffperoxid. Dorut könnt denn wedder annere Peroxiden wunnen warrn.

Üm Peroxiden seker herstellen to künnen, mutt en beten Opwand maakt warrn un man mutt doröver goot Bescheed weten. Orgaansch Peroxiden warrt industriell in Zellenbowarken herstellt, wat vör Explosion bewahrt. Man Unfällen kann dat liekers geven.