Performance (Kunst)

Vun Wikipedia

Performance is de Naam for en sunnerliche Form vun Kunst. Dor geiht dat um de Dorstellung vun en Performer oder vun en Performancegrupp bi, wo en Aktschoon bi in’n Middelpunkt steiht, de mit den Ogenblick to doon hett un mit Enn vun de Aktschoon vergahn is. Düsse Kunstform will sik dor nich mit affinnen, dat Kunstwark un Künstler scheedt weern könnt un dat de Kunstwarke, so as dat begäng is, as Waren ankeken weern könnt.

Begreep[ännern | Bornkood ännern]

Joseph Beuys, Vordrag Jeder Mensch ein Künstler — Auf dem Weg zur Freiheitsgestalt des sozialen Organismus, 1978 in Achberg

Anfang vun de 1960er Johre is, toeerst in de USA, de Begreep „Performance Art” to en Sammelnaam for allens wurrn, wat in de Kunst passeert, wenn dat den normolen Tosamenhang vun de „Performing Arts” (Dorstellkunst) un de „Visual Arts” (Bildkunst) sprengen dö: Happenings, „Live Events“, Fluxus-Kunzerte, Stratenaktschonen un Demonstratschonen as künstlerische Begeevnisse, wo jedereen mit bi ween konn. Um 1970 rum is „Performance Art” in de USA vun Künstlers, as Allan Kaprow noch mehr as en Antithese to’n Theater upstellt wurrn. Dormols hefft en ganze Reeg Künstlers ehr jummers mehr as en Kunstform begrepen, de an un for sik sülvstännig weer. In düsse „Performance Art” scholl en künstlerisch Begeevnis nie nich twee Mol up desülvige Aart passeern un dat scholl nie nich so tohopen stellt ween, as en Stück ut de Dorstellkunst.[1] For de Kunstform, de sik so verstohn dö, is de korte Form „Performance“, in’n Sinn vun „Kunstperformance“ in de Düütsche Spraak overnahmen wurrn. Theoretikers un Künstlers maakt en Unnerscheed twuschen Performance, de sik ut de Grundlaag vun de Bildkunst utspunnen hett, un annere Formen, de vun de Dorstellkunst herkaamt, as Theaterperformance, Musikperformance un Literaturperformance.[2] Performance is en Konzept, wo Inspraak un annere Meenungen al inmengelt sünd. Dat kann nich allgemeen seggt weern, wat nu for jedereen de richtige Definitschoon vun Performance is. Dat höört bi düsse Kunstform dor mit to, dat se up verschedene Aart utleggt weern kann un dat se vun verscheden Lüde verscheden verstohn warrt (So is dat bi dat Konzept „Demokratie“ ja ok).[3] So passt dat goot, dat in düsse Kunstform inleggt is, dat se sik nich an en sunnerliche Ästhetik holen will un over all Regeln overweg geiht. De Begreep Aktschoonskunst hangt mit de Performance tohopen. De Wiener Aktschonisten un de Neo-Dadaisten hefft for ehre Aktschonen avers lever de Begreepe Live Art, Action Art, Intervention oder ok Manoeuvre nahmen, ok, wenn sik dat towielen um Warke hannelt hett, de een na strenge Definitschoon „Performance“ nömen konn.

Belege[ännern | Bornkood ännern]

  1. Adrian Parr: Becoming + Performance Art, in: The Deleuze Dictionary, Edinburgh University Press, 2005, ISBN 0-7486-1898-8 / 0748618996|Online=http://books.google.de/books?id=OsVOy4s1QLMC&printsec=frontcover#v=onepage&q&f=false ;togrepen an’n 26. Oktober 2010|engelsch
  2. vgl. Marvin Carlson „Performance“, S. 103,2-105,1
  3. vgl. Marvin Carlson „Performance“, S.1,2