Pegida

Vun Wikipedia
De PEGIDA ehr Logo

Patriotische Europäer gegen die Islamisierung des Abendlandes (PEGIDA, PEgIdA oder Pegida) is en Vereen ut Dresden, de meent, Düütschland un Europa kemen jummers mehr unner Infloot vun den Islam. He will sik dor gegen stellen. De Liddmaten, de in düssen Vereen dat Seggen hefft, organiseert vun den 20. Oktober 2014 af an jede Week en Demonstratschoon in Dresden gegen de Utlänner- un Asylpolitik. Lieke Demonstratschonen gifft dat ok in annere düütsche Städer.

Soziolwetenschoplers meent, de Lüde, de dor mitmaken döen, hören to’n Deel to de Borgerliche Klass un to de Konservativen, weern to’n annern Deel avers ok Rechtspopulisten un Rechtsextremisten. In Düütschland warrt dor to’n Deel butt over diskuteert, ob mit de Lüde, de Pedida in Gang brocht hefft un de dor mitmaakt, snackt weern scholl oder nich. In en Reeg vun Städer in Düütschland gifft dat Gegendemonstratschonen. Lüde ut de Wetenschop un ut de Politik un ok Journalisten seggt, man scholl sik konstruktiv ut’neen setten mit Themas, de vun Pegida up’t Tapeet brocht wurrn sünd, as mit de Sekerheit in Düütschland, Innwannerung un Integratschoon un sunnerlich ok mit dat Mitmaken vun Borgerslüde in de Politik vun en Demokratie.

Veranstalters[ännern | Bornkood ännern]

Lutz Bachmann[1] hett de Demonstratschonen in Gang brocht un vormols ok de wichtigsten Reden holen. He seggt, Pegida weer ut en Facebook-Grupp rutwussen, de sik in’n Oktober 2014 funnen harr ut Protest gegen den Besluss vun de Bundsregeerung, Militärmateriol un Wapen an de Arbeiderpartei vun Kurdistan ut to levern, ofschoonst düsse Partei in Düütschland verbaden is.[2] Denn weern ok noch Kurden un annere Muslime in Hamborg un Celle up’e Straten up’nanner losgahn.[3] Siet de Tied laadt he jede Weken to en „Avendspazeergang“ in.[4] He hett seggt, Wahlplakate vun de CDU ut de 1960er Johre mit den Spröök „Rettet die abendländische Kulur“ weer dat Vorbild ween, for de Bewegung ehren Naam.[5] Vunwegen dat de Spazeergang jummers up’n Maandag is un de Lüde faken roopt: „Wi sünd dat Volk“ stellt sik Pegida in de Traditschoon vun de Maandagsdemonstratschonen 1989/1990 in de DDR.

Tahlen[ännern | Bornkood ännern]

Bi de eerste Demonstratschoon an’n 20. Oktober 2014 unner dat Motto „Sunner Gewalt un vereent gegen Glovens- un Stellvertrederkriege up düütschen Grund“ hefft bi 350 Lüde mitmaakt. Bi jede Demonstratschoon, de achterna keem, sünd dat denn mehr Lüde wurrn. An’n 5. Januar 2015 sünd dat denn bi 18.000 ween, as dat groff taxeert wurrn is. Na den Anslag up Charlie Hebdo in Paris an’n 7. Januar schöllt dat mehr as 25.000 Lüde ween hebben.

Belege[ännern | Bornkood ännern]

  1. Sächsische Zeitung, 2. Dezember 2014: Das krumme Leben des Pegida-Chefs (für Nichtabonnenten kostenpflichtig; Nachdruck bei Indymedia)
  2. Michael Winkler: PEGIDA olé! PEGIDA adé?, Der Freitag, 4. Dezember 2014.
  3. „Pegida“-Demonstrationen: Die neue Wut aus dem Osten, FAZ, 7. Dezember 2014.
  4. Marcus Lütticke: „Pegida“ ins Netz gegangen, Deutsche Welle, 12. Dezember 2014.
  5. Islamfeinde protestieren als Dügida in Düsseldorf, Die Welt, 8. Dezember 2014.