Otto Fenichel

Vun Wikipedia
Wesseln na: Navigatschoon, Söök

Otto Fenichel (* 2. Dezember 1897 in Wien; † 22. Januar 1946 in Los Angeles) weer een Psychoanalytiker ut de so nömmt tweede Generatschoon.

Leben[ännern | Bornkood ännern]

Vunaf 1915 studeer he Medizin in Wien. Dorbi besöch he ok den Unnericht bi Sigmund Freud un leet sik to een Psychoanalytiker utbillen. 1920 al is he Maat vun de „Wiener Psychoanalytische Vereinigung“ wurrn.

1922 is he ümtogen na Berlin. Dor hett he mit annere tosamen een Grupp vun Psychoanalytikers upmaakt, de sik an Karl Marx siene Lehr holen döen. Toeerst studeer he an dat Psychoanalytisch Instituut in Berlin, vun 1925 af an weer he Lehrmeester vun de Psychoanalyse. In Berlin arbeit he mit Karl Bonhoeffer un Ernst Cassirer tosamen.

1933 wurr he na Oslo beropen. 1935 güng he na Prag. 1938 wanner he in de USA ut. Dor leef he denn in Los Angeles.

In Amerika keem he nich so richtig togange. He starv korte Tiet, nadem he sien groot Wark „The Psychoanalytic Theory of Neurosis“ afsloten harr. In Europa hefft se em ansehn as een, de vun de Geschicht vun de Psychoanalyse Bescheed wüß, as anners nüms.

Lehr[ännern | Bornkood ännern]

Fenichel warrt as een vun de wichtigst Lüe ut Freud sien School ansehn, just so as Karl Abraham un Sándor Ferenczi. In den groten Striet um Freud siene Lehr in de 1930er Jahren hett he sunner Twiefeln an de Hoofdsaak vun Freud sien Lehr fastholen. Dat weer de Saak mit den Ödipuskomplex. As sien eegen Upgaav seh he dat an, een Lehr tohopentoschostern ut allens, wat in de Analyse bit dohen utfunnen wurrn weer. He maak sik denn an de Arbeit för een „spezielle Neurosenlehre“.

1931 kemen vun em twee Böker rut: „Perversionen, Psychosen, Charakterstörungen“ un „Hysterien und Zwangsneurosen“. Blangenbi hett he de Tietschrift „Imago“ rutgahn laten.

Vun Los Angeles ut versöch he, den Berliner Krink tosamen to holen un schreef geheim Rundbreefe, de bloß för düssen Krink bestimmt weren. De Lüe weren midderwielen öber de ganze Eer verdeelt. Düsse Rundbreef kann een eerst siet 1998 lesen. De vertellt allerhand öber de Geschicht vun de Psychoanalyse in Düütschland in de Jahren 1933 bet 1945. Besunners kann een wat Nees rutkriegen öber dat Theater mit Wilhelm Reich. Freud harr dormals dorför sorgt, dat Reich ut de „Psychoanalytische Vereinigung“ rutsmeten wurrn is.

Böker vun Fenichel[ännern | Bornkood ännern]

  • Hysterien und Zwangsneurosen, Wien 1931, nadruckt Darmstadt 1993, ISBN 3-534-06395-3
  • The Psychoanalytic Theory of Neurosis, 3 vols., 1945/düütsch: Psychoanalytische Neurosenlehre, 3 Böker, 1974ff
  • 119 Rundbriefe, rutgeben vun Johannes Reichmayr un Elke Mühlleitner, 2 Böker, 1998

Up Platt is nix vun Fenichel rutkamen.

Böker öber Fenichel[ännern | Bornkood ännern]

  • Russell Jacoby: The Repression of Psychoanalysis, 1983/ düütsch: Die Verdrängung der Psychoanalyse, 1990
  • Elke Mühlleitner: Ich — Fenichel. Das Leben eines Psychoanalytikers im 20. Jahrhundert. Wien: Paul Zsolnay Verlag 2008 ISBN 978-3-552-05429-5


Up Platt is nix öber Fenichel rutkamen.