Opsoniseeren

Vun Wikipedia

De Opsoniseeren is en Vörgang vun’t Immunsystem vun de högeren Leevwesens. Bi dissen Vörgang warrt de Böverflach vun Frömdzellen oder Frömdkörpers, de in’n Lief indrungen sünd, över jemehr Antigenmuster vun Immunglobulinen (Antikörper) un Fakters vun’t Komplementsystem bedeckt. Dordör künnt disse frömmen Zellen vun de endozyteeren Zellen (Phagozyten) vun’t Immunsystem kennt un tonichten maakt warrn. De bedeeligten Fakters warrt Opsoninen nöömt.

Dat wichtigste Opsonin is C3b, dat sik an den CR1-Rezepter op de Phagozyten (Monozyten, Makrophagen, Neutrophile Granulozyten un en Deel vun de dendritischen Zellen) binnt un dordör de Phagozytoos vun den markeerten Partikel anstöten deit. För’t Tonichtenmaken warrt also keen spezifischen Antikörper bruukt.