Oosterholter Geest

Laag von de Oosterholter Geest in Noordneddersassen

Topograafsche Koort von de Oosterholter Geest

De Oosterholter Geest is en Geestrebeed in’n Noordoosten von Neddersassen un höört to de Stoder Geest. Nöömt is se na de Stadt Oosterholt (vondaag Deel von Oosterholt-Scharmbeek).

Geografie

De Oosterholter Geest liggt in’n Süüdwesten von dat Elv-Werser-Dreeeck un billt den Süden von de Wersermünner Geest. Dor höört von de Stadt Bremen de Noorden, von’n Landkreis Oosterholt de Westen, von’n Landkreis Cuxhoben de Süden un von’n Landkreis Rodenborg de Noordwesten to.

In’n Westen grenzt de Oosterholter Geest an de Masch von Oosterstood, de to de Eems- un Wersermaschen tellt warrt. In’n Noorden geiht se in de von Stroomdaals dörbraken Geestrüggens twüschen Land Wusten un Oost över, de den Noorden von de Wersermünner Geest billen doot. In’n Oosten liggt dat Daal von de Hamm un dat Düvelsmoor. In’n Süden triddt de Oosterholter Geest mit en Hoogöver bet an den Rand von Lesum un Werser. De scharpe Kant von de Geest na Masch un Moor is ok an de Grenz na dat Düvelsmoor to finnen. Bi Gnarrenborg un Korlshöben raakt de Oosterholter Geest de Zevener Geest. Hier hett in de Iestied en Gletscherpoort legen, de ehr Water in dat Urstromtal von de Hamm afgeven hett.

De höögste Punkt is mit 48 Meter över NN en Steed op de Lange Heid twüschen Oosterholt-Scharmbeek un Garlst.

De Süden von de Oosterholter Geest mit Swonewebel, Bremen-Noord, Hu’e un Oosterholt-Scharmbeek is dicht besiedelt, de Rest man dünn. De Süüdwesten von de Oosterholter Geest warrt ok Bremer Swiez nöömt.