Olympsche Gödder

Vun Wikipedia
Wesseln na: Navigatschoon, Söök

De Olympschen Gödder (grek. Δωδεκαθεον = Dodekatheon), ok Olympiers, sünd de twölf Hööftgödder vun de Greeksche Mythologie. Wahnt hefft se up den Barg Olymp (grek. Ὄλυμπος; Olympos) in Grekenland. Jem ehr Tall paßt just to de Maanden vun dat Johr un to de twölf Steernbiller vun den Tierkreis.


De twölf Olympiers (Tabell)[ännern | Bornkood ännern]

Greeksch (Ümschrift) (Platt-)Düütsche Naam röömsche Naam Tostännig för
Aφροδίτη (Aphroditē) Aphrodite Venus De Leev un de Schönheit ehr Göddin.
Απόλλων (Apollōn) Apollon Apoll Gott vun de Poesie, vun dat Licht, vun de Müse, vun de Pest un vun de Prophetie.
Αρης (Arēs) Ares Mars Gott vun den Krieg (Leefhebber vun Aphrodite) un vun de Slachten.
Άρτεμις (Artemis) Artemis Diana Jungfrulich Göddin vun de Jagd un vun den Maand.
Αθηνά (Athēna) Athene Minerva Göddin vun de Weisheit, vun de Strategie un Kriegsfru (Pallas).
Δήμητρα (Dēmētra) Demeter Ceres Eergöddin, Muddergöddin, Göddin vun de Fruchtbarkeit, den Zeus sien Suster etc..
Άαδης (Hades) Hades Pluto Herr vun de Unnerwelt (Hades), vun den Dood un Broder vun Zeus, vun Hera un vun Poseidon.
Ήφαιστος (Hēphaistos) Hephaistos Vulcanus Gott vun de Vulkanen, vun dat Füür un vun de Smeedkunst.
Ήρα (Hēra) Hera Juno Göddin vun de Familie, tostännig för Hochtiet, Kinnerkriegen un Geboort, den Zeus sien Wiev (düchtig ieversuchtig)
Ήρμής (Hērmēs) Hermes Merkur Gott vun de Deven, vun den Hannel un vun de Lüde, de unnerwegens sünd. Gödderbood.
Ήστία (Hestia) Hestia Vesta Göddin vun dat Heerdfüüer, vun dat Huusleven un Zeus siene Suster. As Dionysos bi de Twolf upnahmen wurrn weer, hett se Bott geven.
Ποσειδων (Poseidōn) Poseidon Neptun Gott vun de See, Zeus sien Broder
Ζεύς (Zeus) Zeus Jupiter Vadder vun de Minschen un de Gödder, tostännig för Blitz un Dunner un Luft. Jünger Broder vun Poseidon, Hades, Demeter un vun sien Wiev Hera

Wie de Olympiers de Macht an sik reten hefft[ännern | Bornkood ännern]

De Baas vun de Olympiers, Zeus harr nah swaren Krieg sienen Vadder Kronos un den siene Geswister, dat weeren de Titanen, de Macht ut’e Hannen reten. Hölp harr de dorbi vun de Kyklopen, vun de Hekatoncheiren un vun siene Mudder Rhea kregen. Bi düsse Gelegenheit harr he vun de Kyklopen ok Blitz un Dunner kregen.

As se de Titanen in den Tartaros insparrt harrn, mössen Zeus un de Olympiers gegen de Titanen ehr upsternaatsche Kinner vörgahn. Dor bruken se de Hölp vun de Styx to. Noch veel later hefft se dorüm jem ehr Eeden up de Styx swaren. Amenn weert ok düsse Titanenkinner in den Tartaros insparrt. Bloß Okeanos, Thetys un Themis kunnen Baas öber jem ehr Rieken blieven, vunwegen datt se bi den Upstand gegen de Olympiers nich mitmaakt harr.

Nu mössen de Olympiers gegen de Giganten gegenan gahn. Dorbi hefft se Hölp harrt vun den sterflichen Herakles (de wurr later ok in den Olymp upnahmen). Ok in düssen Krieg bleev Zeus baben un nu konn he mit siene Bröder de Herrschup öber de Welt innehmen. Mit dat Los hefft se fastleggt, wer öber wat vun Deel vun de Welt regeeren schall. Dor is denn bi rutkamen, datt Zeus öber den Himmel, Poseidon öber de See un Hades öber de Ünnerwelt regeeren scholl.

Tolest mössen de Olympiers noch mal gegen Typhon gegenan. De brüll mit Dunnerstimm, kladder rup nah’n Heben un smeet dorbi mit glönige Steen. So verfehren sik de Olympiers un sehn to, datt se weg keemen. Bi dat Utbüxen verwanneln se sik, jedeneen in een anner Deert. Zeus is to’n Schaapsbuck wurrn, Apollo to’n Raben, Dionysos hett sik in een Zeegenbuck verwannelt, Artemis in een Katt, Hera in een Koh, Aphrodite in eenen Fisch, just so, as Ares. Eos is to’n Ibis wurrn, Herakles hett sik in een lütt Reh verwannelt un Leto in een Wessel. Hephaistos weer een Bullen. So sünd se all nah Ägypten utknepen. Man amenn hett Zeus den Typhon denn doch ünnerkregen. So hett Zeus den Grund leggt för de drüdde Ordnung vun de Welt.

Kiek ok bi[ännern | Bornkood ännern]