Ofra Haza

Vun Wikipedia
Wesseln na: Navigatschoon, Söök

Ofra Haza (hebrääsch עפרה חזה – Ofra Chaza; * 19. November 1957 in Tel Aviv; † 23. Februar 2000 ok dor) weer en internatschonal bekannte Singersche ut Israel.

Levensloop[ännern | Bornkood ännern]

Ofra Haza weer dat negente Kind vun jöödsche Inwanneres ut’n Jemen. Opwassen is se in een vun de armsten Vöröört in’t süüdliche Tel Aviv, in’n Bezirk Sch’chunat HaTikva. As se twölf weer hett Bezalel Aloni, en Organisater vun en Theatergrupp, mitkregen, dat se groot Talent to’n Singen harr. Se kunn bi jemehr Theater mitmaken un entwickel sik mit de Tiet to en Singersche, de in’t hele Israel geern höört worrn is. Se hett vele Priesen wunnen un weer veermol as „Singersche vun’t Johr“ wählt. Mit Aloni, de nu ehr Manager weer, harr se gegen vele Hinnern to kämpen, vun wegen dat vele Produzenten in de 1970er und 1980er Johren wegen ehr Afkunft un den sieten Sozialstand nich mit jem tosamenarbeiten wullen. Liekers hett Haza sik dörbeten un künn eenige Platten produzeeren, de hüüt as Sammlerstücken gellt.

In’t Johr 1983 hett Haza ehr Land bi’n Eurovision Song Contest vertreden un keen dor mit dat Leed „Chai“ op’n tweeten Platz. En Johr later keem ehr Album „Yemenite Songs“ op’n Markt, dat ok in Europa rutkeen un sünners in Grootbritannien teemlich veel verköfft worrn is. Se kreeg dorför wunnerbore Kritiken un hett dormit den Grundsteen för ehr internatschonale Loopbahn leggt.

Mit dat Leed „Im Nin’alu“ harr se 1988 en internatschonalen Hit, de in Düütschland acht Weken op Platz 1 weer un ok in de USA op de eerste Steed kamen is. Dorna keem noch in’t glieke Johr de Hit „Galbi“ urt, de in Düütschland bit op Platz 20 stegen is. Siet de Tiet gellt se för vele Lüüd as dat Prototyyp för orientaalsche un israelsche Popmusik. Se weer in de Tiet dorna weltwiet in vele Konzerthallen un Shows to sehn un hett ok mitwirkt an de 1992er Faten vun dat Leed „Temple of Love“ vun de Sisters of Mercy. Tosamanerbeit hett se ok mit Stefan Waggershausen, mit den se „Jenseits von Liebe“ in’t Duett sungen hett (1993), un mit Paula Abdul bi de Single „My Love is for real“ (1995). Internatschonal hett se 24 ALben rutbröcht un kreeg vele Utteken. Ehr Album Kirya ut dat Johr 1992 weer för den Grammy nomineert.

De Graffsteed vun Ofra Haza

Blangen ehr Leder hett Haza ok Filmmusik komponeert un sungen, as in de Filmen The Governess oder Wild Orchid (dt.: Wilde Orchidee). Twüschen 1997 un 1998 hett se de Filmmusik för The Prince Of Egypt (dt.: Der Prinz von Ägypten) sungen. 1994 harr se de Ehr, bi de Verlehen vun’n Fredensnobelpries vun Jitzchak Rabin, Schimon Peres un Jassir Arafat optotreden. Ok as Jitzchak Rabin later mit en Zeremonie begraven worrn is, is Ofra Haza optreden.

In’t Johr 1997 hett se den Gewarfsmann Doron Ashkenazy heiraat, man de Eh hett blots twee Johren anduert. Se hett sik in disse Tiet meist vullstännig ut ehr künstlerisch Leven torüchtogen un sik vun ehrn Manager Aloni splitt, üm vull för ehrn Ehmann un jemehrn gemeensomen Adoptivsöhn dortowesen.

Fröhjohr 2000 is se bewusstlos mit en swore Gripp in’t Tel-Haschomer-Hospital in Tel Aviv inlevert worrn, woneem se veerteihn Daag later an’n Organverseggen as Naklapp vun en HIV-Infekschoon doodbleven is. Se is een Dag later op’n Yarkon-Karkhoff in’n Noorden vun Tel Aviv bisett worrn. Blangen vele Fans ut de helen Welt weern ok Politikers as Ehud Barak un Schimon Peres dorbi as ok vele bekannte israelsche Persönlichkeiten as de Singersches Shoshana Damari un Yardena Arazi oder Leah Rabi, de Weetfro vun Jitzchak Rabin.

De Weetmann vun Haza, Ashkenazy, is in’n April 2001 an en Överdosis Drogen doodbleven.

An’n 21. März 2008 is dat Album „Forever Ofra Haza - Her Greatest Songs Remixed“ rutkamen. Dorop sünd Leder as „Im Nin Alu“, „Galbi“ oder ok „Ya Ba Ye“ nee afmischt worrn. Tosätzlich bargt dat Album dat Leed „The Poem“, dat bit dorhen nich publizeert weer. In dat glieke Johr keem in Israel de DVD Ofra Haza live in Montreux Jazz Festival op’n Markt, dat ehr eenzige offizielle Konzertopnahm vun’t Montreux Jazz Festival in’n Juli 1990 in de Swiez wiest. As Bonus bargt de DVD dree bit dorhen unbekannte Videoclips .

Diskografie[ännern | Bornkood ännern]

  • 1974 · Ahava Rishona (+ Shchunat Ha’Tikva Workshop Theater)
  • 1976 · Ve-Chutz Mizeh Hakol Beseder (+ Shchunat Ha’Tikva Theater)
  • 1977 · Atik Noshan (+ Shchunat Ha’Tikva Workshop Theater)
  • 1979 · Song Of Songs With Fun (Shir ha’Shirim be’Sha’ashu’im) (+ Shchunat Ha’Tikva Workshop Theater)
  • 1980 · About Our Loves (’Al Ahavot Shelanu)
  • 1981 · Let's Talk (Bo Nedaber)
  • 1982 · Temptations (Pituim)
  • 1982 · Songs For Children (Li'Yladim)
  • 1983 · Chai (Lebendig)
  • 1983 · Shirey Moledet A (Heimatleder 1)
  • 1984 · A Place For Me (Bait Cham)
  • 1984 · Yemenite Songs (Shirey Teyman)
  • 1985 · Earth (Adama)
  • 1986 · Shirey Moledet B (Heimatleder 2)
  • 1986 · Broken Days (Yamim Nishbarim)
  • 1987 · The Golden Album (Albom ha’Zahav)
  • 1987 · Shirey Moledet C (Heimatleder 3)
  • 1987 · Fifty Gates Of Wisdom
  • 1987 · Yemenite Songs
  • 1988 · Shaday
  • 1989 · Desert Wind
  • 1992 · Kirya
  • 1994 · My Soul (Kol ha’Neshama)
  • 1997 · Ofra Haza
  • 1998 · LIVE @ Montreux Jazz Festival
  • 2001 · Greatest Hits Vol. 1
  • 2005 · Greatest Hits Vol. 2
  • 2008 · Forever Ofra Haza - Her Greatest Songs Remixed (mit nich publizeerte Titel)
  • 2008 · Ofra Haza live in Montreux Jazz Festival

Weblenken[ännern | Bornkood ännern]

Commons-logo.svg Ofra Haza. Mehr Biller, Videos oder Audiodateien to’t Thema gifft dat bi Wikimedia Commons.