November

Vun Wikipedia

De November, ok as Daakmaand bekannt, is in’n Gregoriaanschen Klenner de ölvte Maand in dat Johr. He hett 30 Daag un tellt to de Harvstmaanden.

De ollen hoochdüütschen Naams hebbt ok mit de düstere Johrestiet to doon. Karl de Grote harr in’t 8. Johrhunnert dorvör den Naam Windmaand inföhrt, aver ok Nevelung weer dorto seggt, wiel dat faken nevelig is in’n November. Man welke seggen ok Wintermaand. In de Nedderlannen geev dat ok noch den Naam Slachtemaand, wiel de Swien in’n dissen Maand tomeist slacht weern. De Naam November kummt aver ut den röömschen Klenner. Dor weer dat de neegte Maand (lat.: novem = negen). Aver 153 v. Chr. weer de Anfang vun’t Johr twee Maanden na vörn verleggt, dorüm stimmt dat mit de Tall nich mehr övereen.

In dat Karkenjohr is de November en Maand in’t Teken vun In sik Gahn un Gedenken. Dorüm hett de November en ganze Reeg vun Fierdaag, de mit Besinnen to doon hebbt:

En Skulptur vun den Hilligen Martin (Höchster Slott, Frankfort an’n Main).

De Röömsch-kathoolsche Kark denkt an’n 1. November (Allerhilligen) an jümmer Hilligen un een Dag later an all de Lüüd, de Dood bleven sünd (Allerseelen). An’n 11. November warrt de Martinsdag fiert to Ehren vun den Hilligen Martin vun Tours.

Wietere Fierdaag sünd de Volkstruerdag, de Beeddag un de Dodensünndag. De Volkstruerdag is twee Sünndaag vör den 1. Advent. Dor warrt an de Dooden ut den 1. un 2. Weltkrieg dacht. Den Sünndag dorop kummt de Doodensünndag, an den de evangelschen Kark an de Dooden denkt. De Beeddag liggt op den Middeweken dortwüschen un is ok vun de evangelsche Kark. Dor schall man sik wedder mehr de Kark un Gott towennen.

Mit den 1. Advent fangt de Adventstiet an. Denn tövt man op Wiehnachten. De 1. Advent is toglieks ok de letzte Sünndag vun’t Karkenjohr. He liggt in veer von söven Fäll ok in’n November, kann aver ok al in’n Dezember fallen.

De November fangt mit den lieken Wekendag an as de März oder as de Februar, wenn wi en Schaltjohr hebbt.

Dat Woort „November“ warrt ok noch as Beteken för den Bookstaven N bruukt, bi dat Boockstaberen na dat ICAO-Alphabet.