Murder by Numbers (2002)

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Murder By Numbers
Düütsch Titel: Mord nach Plan
Produkschoonsland: USA
Johr vun’t Rutkamen: 2002
Läng: 115 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Barbet Schroeder
Dreihbook: Tony Gayton
Produkschoon: Richard Crystal
Susan Hoffman
Barbet Schroeder
Musik: Clint Mansell
Kamera: Luciano Tovoli
Snitt: Lee Percy
Szenenbild: Stuart Wurtzel
Kledaasch: Carol Oditz
Dorstellers

Murder By Numbers (op plattdüütsch so veel as „Moord na Tallen“; dt. Titel: Mord nach Plan) is de Titel vun en US-amerikaanschen Thriller ut dat Johr 2002. Speelbaas’sche vun den Film weer Barbet Schroeder, de ok as Produzentin bedeeligt weer. De Hööftrull speel Sandra Bullock.

Inholt[ännern | Bornkood ännern]

De Film hannelt vun twee Schölers, de sik tosamen finnt, üm den perfekten Moord to begahn: Justin Pendleton, de in de School in en Referat de Hypothees opstellt, dat Freeheit en Verbreken is, vunwegen dat jeedeen, de wohrhaftig free wesen will, radikal egozentrisch hannelt un sik sülvst över de Gemeenschop stellt. Sien Mitschöler Richard Haywood hett rieke Öllern, un in’n Gegensatz to Justin hebbt em de Deerns geern. Tosamen wüllt se mit jemehr vereenigte Intelligenz dat perfekte Verbreken begahn, wovun jeedeen Regenmöörder drömen deit.

De Fall warrt vun Detective Cassie Mayweather un ehrn ne’en Kollegen Sam Kennedy bearbeit, de den Daatoort nipp un nau ünnersöken doot. Dat Opper is en doodwörgte Fro, de en Finger afsneden worrn is. Cassie is düchtig prägt vun den Fall Carl Hudson. Se maakt sik Sorgen, vunwegen dat en Utschuss doröver nadenkt, den Verbreker op Bewährung free to laten. Intwüschen kamt sik Cassie un Sam neger, as se in Cassie ehr Huusboot sünd. Man, na en gemeensome Nacht sett se em vör de Döör.

Se schufft dat vun sik weg un kunzentreert sik lever op ehrn aktuellen Fall. Se ünnersöcht de Wahnung vun dat Opper un weert de Henwiesen ut. Ehr Instinkt seggt ehr, dat wat nich stimmen kann mit de Sporen, de se funnen hebbt. De hele Fall sütt för ehr ut, as wenn he ut en Lehrbook kummt. An’n Daatoort hebbt se den Afdruck vun en Stevel vun en teemlich düre Marke funnen. Dordör fallt de Verdacht op Richard, de aver en Alibi hett un vörgifft, dat em de Stevel klaut worrn sünd. Cassie ehr Verdacht blifft aver bestahn, wat ehrn Baas gor nich gefallt, vunwegen dat Richard sien Öllern veel Influss hebbt.

De beiden Möörders dorgegen föhlt sik seker: Se hebbt Sporen utstreiht, de op den Huusmeester an jemehr School, Ray Feathers, hendüüdt. De warrt kort later doodschaten opfunnen un allens süüt ut, as weer dat en Sülvstmoord. För Cassie ehrn Baas, Capt. Rod Cody, is de Fall dormit afslaten. Liekers lett Cassie nich na.

An de Fundsteed hebbt se wieter ok Brekels funnen. In de Proov warrt Kaviar funnen, wat en ne’e Spoor op Justin lenken deit. Justin un Richard sünd sik intwüschen nich mehr gröön. Dat kummt dorvun, dat Justin wat mit Lisa Mills anfangt, de fröher mol mit Richard tosamen wesen is. Richard schickt Justin en Video to, worop Richard mit Lisa bi’n Sex to sehn is. Justin tütt sik dorophen vun Lisa torüch.

Cassie kann Sam dorvun övertügen, dat de Fall noch nich afslaten is. Sam dorgegen kummt mit de Tiet dorachter, dat Cassie mit Carl Hudson veel mehr to doon hett, as se togeven will. Se vertellt em de Wohrheit, dat Carl ehr Ehmann weer un he versöcht hett, ehr ümtobringen, as se sik wegen vun em scheden laten wull. He hett ehr neemlich över längere Tiet misshannelt. Cassie will de verleden Tiet aver lever verdrängen un mutt sik deswegen wat vun Sam böös wat vertellen laten.

As Cassie DNS vun Justin mit Sporen ut de Brekels verglieken deit, passt de tosamen. Dormit kann se ehrn Baas övertügen. Se laadt Justin un Richard vör un versökt jem droto to bringen, dat se wat togeven doot. Wohrhaftig harrn se Richard meist so wiet hat, as op eenmol en Afkaat kumt un dorför sorgt, dat de beiden Jungs freekamt. Man, de beiden Verbrekers sünd sik nich mehr eens. Richard versöcht mit den Viez-Staatsafkaat wat uttohanneln. Cassie kriggt dorvun Wind un will de beiden nochmol wedder fastnehmen. Se sünd aver nich tohuus.

Richard helpt Justin bedenken, dat se en Swoor afleggt hebbt, dat se lever tosamen Sülvstmoord begahn wüllt as dat se in’t Gefängnis gaht. Se drapt sik in en oolt Huus op’n Klint, woneem se sik dat Leven nehmen wüllt. Man, Richard hett sien egen Plaan. Sien Revolver is leddig, wiel Justin sien laadt is. Vun Lisa kriggt Cassie aver den Tipp, woneem de Jungs sünd. Dordör kann se Justin jüst noch dorvun afbringen, dat he Richard doodmaakt. Dat kummt to en Scheteree, bi de Justin anschaten warrt.

Opletzt versöcht Richard Cassie op’n morschen Balkon to wörgen, wat för Cassie so is as fröher. Vertwievelt wehrt se sik. As de Balkon nagifft, stört Richard mit af un blifft dood. Cassie kann sik fasthollen un warrt vun Justin reddt. As se an ehrn Hals de Wörgmalen vun Richard ünnersöcht stellt se fast, dat Justin de Möörder vun de Fro weer. Dör en Trick bringt se Justin dorto, den Moord totogeven.

An’t Enn is to sehn, dat Cassie sik mit ehr verleden Leven ut’nannersett. Se nimmt an de Verhanneln vun ehrn Ehmann deel un seggt ut.

Kritik[ännern | Bornkood ännern]

  • Dat Lexikon vun’n internatschonalen Film hett Murder By Numbers as en Thriller beschreven, över den man hen un her reten wesen künn, un den dat swoor fallen de, de gegenlöpigen Vertellevenen tosamen to hollen. De Film harr en psycholoogsche Siet un weer vun spannende Ünnerplots dörtogen, liekers fünn de Inszeneeren keen övertügen Gestalt.
  • David Bergmann schreev op Filmstarts vun en uninspireerten Thriller, de sik binnen de Dwäng vun’t Genre bewegt. De Oort un Wies vun’t Moorden weer nee un man harr sik wedder mol veel Möh geven, sik för de Protagonisten en jüst so venieenschen as ok perfekten Moord infallen to laten, man de Film weer sünd mit Elementen utsmückt, de nümms mehr sehen will. Bito leet de Film bi de Tokiekers Fragen apen.[1]
  • Bruno Amstutz vun de Redakschoon vun Cineman.ch faat tosamen, dat man den Film anreken müss, dat he versöcht, de för dat Genre tyypschen Konventschonen apentobreken. De kriminalistische Spannung künn liekers tietwies nich övertügen.[2]

Utteken[ännern | Bornkood ännern]

De Film hett keen Priesen wunnen, man he weer in’t Johr 2003 för twee Priesen nomineert: eenmol för den Young Artist Award för Agnes Bruckner un nochmol för den CFCA Award för Ryan Gosling .

Achtergrund[ännern | Bornkood ännern]

De Film is vun’n 27. Februar 2001 bit to’n 21. Mai 2001 dreiht worrn. Dat Budget leeg bi ruchweg 55 Millionen US-Dollar, wovun he in de USA knapp 32 Millionen US-Dollar wedder inspeelt hett.[3] In Düütschland hebbt den Film üm un bi 650.000 Lüdd in de Kino sehen.[3] De Film premiere weer an’n 19. April 2002 in de USA. In Düütschland lööp he an’n 27. Juni 2002 in de Kinos an.[4] Dreihöörd geev dat veschedene, de all in’n Bundsstaat Kalifornien weern.[5] De Hütt op’n Felsen is dorbi blots för den Film boet worrn un weer na’t Enn vun de Dreiharbeiten wedder afreten.[6]

De Kriminalthriller baseert op den wohren Moordfall „Leopold & Loeb“ vun Chicago ut dat Johr 1924, de ok al vun Alfred Hitchcock in sien Film Rope as Vörlaag bruukt weer.[6] De Titel Murder By Numbers is inspireert vun dat glieknöömte Leed vun de Grupp The Police, dat ok vun en perfekt plaanten Moord hannelt.[6]

Borns[ännern | Bornkood ännern]

  1. Filmkritik op Filmstarts vun David Bergmann
  2. Filmkritik op Cineman vun Bruno Amstutz
  3. 3,0 3,1 Budget un Innahmen na de Internet Movie Database
  4. Startterminen na de Internet Movie Database
  5. Dreihöörd na de Internet Movie Database
  6. 6,0 6,1 6,2 Informatschonen to’n Achtergrund na de Internet Movie Database

Weblenken[ännern | Bornkood ännern]