Monozyt

Vun Wikipedia
Wesseln na: Navigatschoon, Söök
Monozyt

Monozyten sünd Zellen vun’t Immunsystem, de mit dat Blood in Lief zirkuleert. Se sünd de Vörlöpers vun de ü.a. in’t Geweev lokaliseerten Makrophagen (en Oort vun Freetzell). Jemehr Opgaav is dat Tonichtenmaken vun lieffrömde Strukturen dör Phagozytoos un dat Aktiveeren vun de tüügt Immunafwehr dör de Antigenpräsentatschoon.

Opbo[ännern | Bornkood ännern]

Monozyten hebbt en Dörmeter vun 5-20 µm un tellt dormit to de gröttsten vun de witten Bloodkörpers (Leukozyten) un makt vun jem ungefähr 3-8 % ut. Tyypsch för jem is de grote Karn (gr. monos „eenzig“), de tomeist formt is as en Bohn, un teemlich wenig Cytoplasma.

Entwickeln un Funkschoon[ännern | Bornkood ännern]

Hämopoetische (bloodbillnd) Stammzellen in’t Knakenmark künnt sik ünner den Influss vun Wassdomfakters as GM-CSF (Granulozyten-Monozyten Kolonie-stimuleerend Fakter) un M-CSF (Monozyten Kolonie-stimuleerend Fakter) to so nöömte Monoblasten entwickeln. Dorut entwickelt („differenzeert“) sik wedder Monozyten, de dorbi ut dat Knakenmark rut gaht un in den Bloodkreisloop kommt. För een bit dree Daag zirkuleert se dor un wannert bi Kontakt mit Infekschonen in dat bedrapen Geweev. Disse Anlaag heebt de Monozyten mit de neutrophilen Granulozyten gemeen, draapt aver mit en Tietafstand vun bit to mehrere Daag an’n Infekschoonsheerd in. Bi’t Inwannern in dat Geweev differenzeert sik de Monozyten in Makrophagen. Se hebbt ok vör’t Differenzen al de Anlaag, lieffrömde Strukturen as Mikroorganismen in sik optonehmen un kaputt to maken. Dordör sünd de Monozyten in de Laag Antigenen to präsenteeren, wat de op dissen Weg tüügte Immunafwehr in Gang setten deit.

Zelluläär Signalen[ännern | Bornkood ännern]

Aktiveerte Monozyten, de Signalen kregen hebbt, in dat Geweev intowannern un sik to Makrophagen to differenzeeren, hebbt op jemehr Bavenflach de Rezepters CD14, CD86 un CD16. Bito gifft dat dor twee wietere verscheedene Toll-liek-Rezepters: TLR2 un TLR4. Bestanddelen vun bakterielle Zellwannen, bakterielle Lipoproteinen oder Antigen-bunnen Antikörpers löst disse Rezepters ut, wat to en Signalwiederleiden in’t Innere vun de Zell föhrt. As Folg dorvun warrt t. B. sweerutlösende Stoffen (Mediaters as Interleukin 1β, Interleukin 6 oder de Tumor-Nekroos-Fakter) maakt oder de Phagozytoos-Vörgang anstött.

Monozytenbetogen Krankheiten[ännern | Bornkood ännern]

Monozyten un Makrophagen sett in’n natürlichen Rahmen LDL üm, wat en wichtigen Deel vun’n Fettstoffwessel is. Wenn dat LDL aver dör en Acetyleeren vun den Protein-Andeel verännert worrn, kann dit oxideerte LDL nich mehr verarbeit warrn un sammelt sik in’t Zellinnere an. Monozyten un Makrophagen, de op disse Oort verännert warrt, wartr as Schuumzellen betekent. Se gellt in’n Tosamenhang mit verletzt Bloodfatten as Hööftutlöser vun de Arterioskleroos.

Is de Tall vun de Monozyten vun wegen stännige Sweren un Nekrosen höger, snackt man vun Monozytoos.