Melkdrüüs
De Melkdrüsen sünd en Organ (exokrine Drüüs, ene Drüüs, de ehr Stoffen na buten afgifft) bi de Söögdeerten. Se produzeert de Melk, vun de de Jungen vun de Söögdeerten de eerste Tiet leevt. Utbillt sünd de Drüsen blots bi dat Seken, aver ok dat Heken hett Ansätz vun Melkdrüsen. De ganze Klass vun de Söögdeerten is dordör defineert, dat se Melkdrüsen hebbt.
Evolutschoon[ännern | Bornkood ännern]
De Melkdrüsen hebbt sik ut Sweetdrüsen rutbillt. Bi dat Snaveldeert is hüüt noch mit dat Melkfell en temlich eenfache Form vun Melkdrüsen to finnen. De Melkdrüsen sünd dorbi över en gröttere Fläch verdeelt un nich as Titten tohoopfaat.
Bi’n Embryo billt sik toeerst ene Melkliest, de vun de Vörbeen bet na de Achterbeen över’n Buuk geiht un de sik eerst later to enkelte Titten opdeelt.
Anlaag[ännern | Bornkood ännern]
Bi verschedene Deerten liggt de Melkdrüsen an verschedene Stellen an’n Lief. Minschen oder Elefanten to’n Bispeel hebbt se an’e Bost, Keih un Peer ünnern’n Buuk twischen de Achterbeen un Hunnen, Katten oder Swien hebbt en ganze Reeg vun Melkdrüsen, de vun de Bost bet twischen de Achterbeen gaht. De Büdeldeerten hebbt ehr Melkdrüsen in enen Büdel vör’n Buuk, in dat dat Junge de eerste Tiet tobringt.
Ok de Tall vun Titten is verscheden. Minsch, Peerd, Zeeg un Schaap hebbt in de Regel een Poor, de Koh twee, de Katt veer, de Hund fief un Swien söss bet acht Poor.
De Melkdrüsen geevt de Melk in de Melkkanaals af. De Melk sammelt sik in de Melkbucht un warrt dör de Titt afgeven.