Ludolf Wienbarg

Vun Wikipedia

Christian Ludolf Wienbarg (* 25. Dezember 1802 in Altno; † 8. Januar 1872 in Sleswig) weer en Schriever ut de Tiet vun’n Vörmärz.

Wienbarg hett vun 1822 af an an de Universität Kiel op Theologie studeert. Sien Studium müss he aver 1826 vun wegen knappe Kass opgeven. He hett denn as Huuslehrer in Loonborg arbeidt. 1829 möök he in Marborg aver doch sien Dokter. 1833 keem he na Kiel trüch un hett an de Universität as Dozent lehrt.

1834 denn hett he ene Sammlung vun 22 vun siene Vörlesungen ünner den Titel „Ästhetische Feldzüge“ rutgeven. Mit de Widmung „Dir, junges Deutschland, widme ich diese Reden“ hett he den Utdruck Jung Düütschland mit präägt. In dat Johr hett Wienbarg ok Karl Gutzkow kennenlehrt, mit den he bald ene Tietschrift rutgeven wull, de „Deutsche Revue“. Doch al bevör de eerste Utgaav vun dat Blatt rutkamen weer, is se verbaden un beslagnahmt worrn.

In’n November 1835 hett toeerst Preußen, denn in’n Dezember de Bundsdag vun’n Düütschen Bund Wienbarg sien Schriften tohoop mit de vun de annern Jungdütschen verbaden. Wienbarg is na Helgoland utneiht, keem aver 1836 trüch na Hamborg, wo he wedder as Journalist un Rutgever vun verschedene Tietschriften arbeiden dee.

De Plattdüütschen is he weniger in gode Erinnerung bleven. 1833 hett Wienbarg, ofschoonst sülvs mit Plattdüütsch groot worrn, den Opsatz Soll die plattdeutsche Sprache gepflegt oder ausgerottet werden? Gegen Ersteres und für Letzteres. schreven, in den he sik utspraken hett för dat Utrotten vun de plattdüütsche Spraak.

1869 hebbt se bi Wienbarg Verfolgungswahn faststellt un em in ene Heilanstalt in Sleswig inwiest. Dor is he 1872 doodbleven.

Warken[ännern | Bornkood ännern]

  • Aesthetische Feldzüge. Dem jungen Deutschland gewidmet. Hoffmann u. Campe, Hamborg 1834; [normalisierter Neudruck:] Ästhetische Feldzüge. Hg. v. Walter Dietze. Textredaktion: Jürgen Jahn. Aufbau, Berlin/Weimar 1964.
  • Zur neuesten Literatur. Von L. W., Verfasser der ästhetischen Feldzüge. Löwenthal, Mannheim 1835.
  • Wanderungen durch den Thierkreis. Hoffmann u. Campe, Hamborg 1835; Reprint: Frankfurt a. M. 1973.
  • Die Dramatiker der Jetztzeit, H. 1. Altno 1839.
  • Die Volks-Versammlung zu Nortorf am 14ten September 1846. Hoffmann u. Campe, Hamborg 1846.
  • Der dänische Fehdehandschuh. Opnahmen vun L. W. Hoffmann u. Campe, Hamborg 1846.
  • Die plattdeutsche Propagande und ihre Apostel. Hoffmann u. Campe, Hamborg 1860 (bi Google Books)
  • Nach Helgoland und anderswohin. Gedanken auf Reisen. Hg. u. m. einem Nachw. v. Alfred Estermann. Greno, Nördlingen 1987

Weblenken[ännern | Bornkood ännern]

Bi’n Wikiborn gifft dat Originalschriften över dat Thema oder vun den Schriever: Soll die plattdeutsche Sprache gepflegt oder ausgerottet werden? (op hoochdüütsch).