Lone Wolf (Kiowa)

Vun Wikipedia
Wesseln na: Navigatschoon, Söök
Lone Wolf, 1870. Portrait vun William S. Soule, vermootlich upnommen in Fort Sill

Guipago, beter bekannt as Lone Wolf (* um un bi 1820 in dat Rebeet vun de Staked Plains; † April 1879 dicht bi Fort Sill), weer Böver-Hööftling vun de Kiowa-Indianer.

Lone Wolf weer de Nahfolger vun Dohäsan un en unversöhnlich Feind vun de Witten. He weer Liddmaat vun de Elite-Kriegersellschop Tsetanma. 1863 un 1872 is he nah Washington, D.C. reist, um hentokriegen, dat Satanta un Big Tree free laaten wurrn, wat hüm wegen sien brillanten Verhannelnsstrategie ok gelung. Mit anner Indianer hett he an' 16. Oktober 1867 den Verdrag vun Medicine Lodge ünnerschreven.

Nahdem 1873 sien Söhn bi en Kiowa-Överfall in Süüd-Texas to Dood keem, fung he weer mit Överfallen up Siedler, Mexikaner un Amerikaner an. In' Juli 1874 hett he in den Lost Valley Fight in dat Young County (Texas) gegen Texas Rangers ünner Major John B. Jones kämpt. An' 9. September 1874 hett he an' Washita River, Hemphill County (Texas), General Miles Nahschuuvkolonne (5. Infanterie) ünner Captain Lyman angreepen. He hett den Toog för mehrere Daag belagert, bit ut Camp Supply Ünnerstütten indrapen dee. Nah toii Wedderstand hett he sück an' 26. Februar 1875 mit de letzt 250 in Freeheit leven Kiowas in Fort Sill ergeven, vun wo he in de Verbannung nah Fort Marion (Florida) brocht wurr. He is in' April 1879, kört nahdem he entlaaten wurrn weer, an Malaria dicht bi Fort Sill storven.

Weblenken[ännern | Bornkood ännern]

Commons-logo.svg Lone Wolf. Mehr Biller, Videos oder Audiodateien to’t Thema gifft dat bi Wikimedia Commons.