Loki Schmidt

Vun Wikipedia
Wesseln na: Navigatschoon, Söök
Loki Schmidt (1978)
Loki Schmidt bi dat Kanzler-Summerfest 1980

Prof. Dr. h.c. mult. Loki Schmidt, an un for sik Hannelore Schmidt, borene Hannelore Glaser, (* 3. März 1919 in Hamborg; † 21. Oktober 2010 in Hamborg-Langenhorn[1]) is en düütsche Schoolmeestersche an de Volks- un Realschool ween. Bekannt wurrn is se as den vörmoligen Bundskanzler Helmut Schmidt siene Fro. Se hett sik bannig mit Biologie un Natur befaat un as Botanikersche un bi ehrn Insatz för den Naturschuul hefft ok de Facklüde ehr gellen laten un tolustert, wat se to seggen harr.

Leven[ännern | Bornkood ännern]

Loki Schmidt weer de Dochter vun Hermann Glaser, de up en Warft as Bedriefselektriker arbeiden dö un den siene Fro Gertrud. Tohopen mit ehre Suster Linde un ehrn Broder Christoph is se unner bescheidene Umstänn upwussen. As de Vadder 1931 arbeitslos wurrn is, hett de Mudder as Neihersche ehr Geld verdeent. [2] Den Ökelnaam „Loki“ hett se sik as lüttje Deern sülms geven. [3] Se besöch de Lichtwarkscholen in Hamborg. Dat weer en Gymnasium, wo Musik un Kunst en Rull speelt hefft. Jungs un Deerns sund dor tohopen uptagen wurrn un so hett se dor al 1929 ehrn latern Mann Helmut kennen lehrt. [4] Erna Stahl weer ehre Schoolmeestersche. Düsse Fro höör to dat Umfeld vun de Witte Rose Hamborg mit to. Na dat Abitur 1937 möss Loki na’n Riekssarbeitsdeenst. Weil dat to veel an Gebühren kosten dö, konn Loki nich Biologie studeern un hett denn Pädagogik up Lehramt an Volksscholen studeeert. An’n 27. Juni 1942 hett se denn Offizier Helmut Schmidt heiraat. De weer liek oolt, as se. Na den Tweeten Weltkrieg hett se em sien Studium in Hamborg betahlt. Vun 1940 bit 1972 hett se up verscheden Volks-, Grund- un Realscholen arbeit’. Mit Helmut Schmidt hett se twee Kinner harrt. Söhn Helmut Walter (* 26. Juni 1944) is noch vör sien eersten Geboortstag, an’n 19. Februar 1945 in Bernau sturven. Sien Ökelnaam weer „Moritzelchen“ ween. De Dochter Susanne is in’n Mai 1947 boren un leevt hüdigendags as promoveerte Volksweertschopplersche in London. Vör un na de Geboort vun ehre Dochter hett Loki Schmidt alltohopen sess Mol en Fehlgeboort harrt. [5]Twuschen 1974 un 1982 hett Loki Schmidt Protokoll-Upgaven as Fro vun den Bundskanzler övernahmen. Ok för den Planten- un Natuurschutz hett se sik bannig insett. Johrelang is se bi Forschungstörns vun Wetenschoppslüde, meist vun de Max-Plank-Sellschop, mitföhrt un hett ehrn egen Andeel jummers sülms betahlt. Unner annern gung dat na dat Nakuru-Meer in Kenia, up de Galapagos-Inseln, na Ecuador, Malaysia, Noordborneo oder na Brasilien. Ok na düsse Tied is se, bit in de 1990er Johre wietlöftig in dat Utland unnerwegens ween, um dor Natur un Planten to unnersöken. [6] 1976 hett se de Stiftung zum Schutze gefährdeter Pflanzen grünnt. Düsse Stiftung is midderwielen mit de Stiftung Naturschutz Hamburg to de Stiftung Naturschutz Hamburg und Stiftung Loki Schmidt tohopenslaten. Düsse Stiftung vergifft vun 1977 af an de Utteknung „Loki-Schmidt-Sülverplant“. Dat is en Ümweltpries, de an Minschen utgeven warrt, de sik för de Natuur insetten doot.[7] Vun 1980 af an stellt se de Bloom vun dat Johr vör. To’n 80. Geboortsdag hett se vunwegen allens, wat se för dat Schulen vun Natur un Planten daan hett, vun de Universität Hamborg den Perfesser-Titel kregen. Bovento is se Ehrendoktersche vun de Russische Akademie vun de Wetenschoppen in St. Petersborg wurrn. Versacheden Planten dreegt ehrn Naam, unner annern de Bromelien Puya lokischmidtiae un Pitcairnia loki-schmidtii , de Balsaminenplant Impatiens loki-schmidtiae de venezolaansche Rosenplant Lachemilla loki-schmidtiae un, as lüttjet Deert, ok de Skorpion Tityus lokiae[8]

2005 hett se sik in ehr Book „Mien Leven för de School“ (hoochdt.: „Mein Leben für die Schule“) to de Bildungspolitik un överhoop to Fragen vun de Bildung ütert. Unner annern hett se dor allerhand Wind vun vörn kregen, weil se dor menen dö: „En Backs hett noch numms wat schaadt“. Dree Johre later is dat Book „Vertell doch mol vun fröher“ (hdt.: „Erzähl doch mal von früher“) rutkamen. In ehrn 90. Johr is se denn mit de Gedanken un Besinnen över ehr Leven en Bestseller-Schrieversche wurrn. In’n Oktober 2010 is ehr Book rutkamen: „Up roden Teppich un mit’n Foot an’n Grund“ („Auf rotem Teppich und fest auf der Erde“).

End September 2010 is Loki Schmidt henfullen un hett sik en Foot braken. Na de Operatschoon hefft de Dokters ehr Anfang Oktober na Huus gahn laten. Loki Schmidt is, in den fröhen Morgen vun’n 21. Oktober 2010 in ehrn Huus in Hamborg-Langenhorn sturven. Ehre Dochter Susanne is bi ehr ween. [9] In de Hööftkarken St. Michaelis in Hamborg hett dat an'n 1. November en Troerstunne för Loki Schmidt geven.

Warken[ännern | Bornkood ännern]

Plantenkunn
  • Schützt die Natur. Impressionen aus unserer Heimat. Herder Verlag, Freborg 1979, ISBN 3-451-18225-4.
  • mit H.-U. Reyer, W. Migongo-Buke: Field Studies and Experiments on Distribution and Foraging of Pied and Malachite Kingfishers at Lake Nakuru (Kenya). In: Journal of Animal Ecology, Band 57, 1988, S. 595–610, faat .
  • mit W. Barthlott, S. Porembski, M. Kluge, J. Hopke: Selenicereus wittii (Cactaceae). An epiphyte adapted to Amazonian Igapó inundation forests. In: Plant Systematics and Evolution, Band 206, 1997, S. 175–185.
  • Die Botanischen Gärten in Deutschland. Verlag Hoffmann und Campe, 1997, ISBN 3-455-11120-3.
  • Die Blumen des Jahres. Hoffmann und Campe, Hamborg 2003, ISBN 3-455-09395-7.
  • mit P. Parolin, J. Adis, M. F. da Silva, I. L. do Amaral und M. T. F. Piedade: Floristic composition of a floodplain forest in the Anavilhanas archipelago, Brazilian Amazonia. In: Amazoniana, Band 17 (3/4), 2003, S. 399–411, Abstract.
  • Das Naturbuch für Neugierige. Rowohlt, Berlin 2010, 240 S., ISBN 978-3-87134-681-1, Leseproov, 15 S. (PDF; 234,5 kB).
Över ehr egen Leven
  • Loki: Hannelore Schmidt erzählt aus ihrem Leben. Hoffmann und Campe, Hamborg 2003, ISBN 3-455-09408-2.
  • Mein Leben für die Schule. Loki Schmidt im Gespräch mit Reiner Lehberger. Hoffmann und Campe, Hamborg 2005, ISBN 3-455-09486-4 (över de Lichtwarkschool).
  • Erzähl doch mal von früher. Loki Schmidt im Gespräch mit Reinhold Beckmann. Hoffmann und Campe, Hamborg 2008, ISBN 3-455-50094-3.
  • Loki Schmidt, Dieter Buhl: Auf dem roten Teppich und fest auf der Erde. Hoffmann und Campe, Hamborg 2010, ISBN 978-3-455-50175-9 (to de Politik).

Belege[ännern | Bornkood ännern]

  1. Bürgerschaft und Senat trauern um Loki Schmidt, Pressemitteilung der Senatskanzlei Hamburg auf hamburg.de, 21. Oktober 2010.
  2. Loki Schmidt: Mehr als nur eine Kanzlergattin up de Internetsiet vun den Noorddüütschen Rundfunk, 21. Oktober 2010.
  3. Der Spiegel: „Gattin des Altkanzleres: Loki Schmidt ist tot“[1] vun’n 21.10.2010
  4. „Den 70. Hochzeitstag wollen wir noch erleben“ Interview mit Loki Schmidt vun’n 21. September 2010
  5. Eigentlich wollte Loki Schmidt eine große Familie haben. Aber sie erlitt sechs Fehlgeburten, eine vor der Geburt von Susanne, fünf danach (Michael Schwelin: Helmut Schmidt: ein Leben für den Frieden. Heyne-Verlag München, S. 110).
  6. Vita Hannelore Schmidt Deutsche Bundesstiftung Umwelt, afropen an’n 22. Oktober 2010
  7. Loki Schmidt verleiht Silberpflanze an den AKN, 5. Juli 2010
  8. Das ist eisern! 65 Jahre Schmidt-Einander. Bericht in’t Hamburger Abendblatt vun’n 26. Juni 2007 (afropen an’n 13. Februar 2009).
  9. Vorbild mit beeindruckender Haltung Vorwärts.de, 21. Oktober 2010, abgerufen am 21. Oktober 2010.