Linosa

Vun Wikipedia
De Pelaagsch Eilannen in de Middellannsche See
En tyypsch Huus op dat Eiland
Fischereehaven op Linosa. In’n Achtergund sütt man verscheden Lagen vun vulkaansch Stenen un Sedimenten.

Linosa is de nöördliche vun de dree Pelaagsch Eilannen, de twüschen Tunesien un Sizilien in de Middellannsche See leegt.

Geografie[ännern | Bornkood ännern]

Dat Eiland hett en Flach vun ruchweg 5 km² un liggt üm un bi 170 km in’n Süüden vun Sizilien, 160 km wiet vun Tunesien un ruchweg 140 km in’n Westen vun Malta. Tosamen mit de annern beiden Pelaagschen Eilannen Lampedusa un Lampione billt se de Gemeen Lampedusa e Linosa, de politisch to de italieenschen Provinz Agrigent in de Region Sizilien tellt. 2005 harr Linosa ruchweg 450 Inwahners.

De Landschap warrt bestimmt vun vulkaansche Formatschonen, as de dree verlöschten Kraters Monte Vulcano (195 m), Monte Rosso (186 m) un Monte Nero (107 m)

Planten un Deerten[ännern | Bornkood ännern]

In’n Vergliek to de beiden Navereilannen bargt Linosa en rieke Vegetatschoon. Dor wasst vör allen Mastixstrüker, Fiegenkakteen un en poor endeemsche Planten as to’n Bispeel de Valantia calva, de dat blots op Linosa geven deit.

De See üm Linos is riek an Fisch. Butendem leevt hier ok Karettschildkröten, de an de Strännen vun’t Eiland jemehr Eier afleggen doot. Wiete Delen vun’t Eiland staht siet 2002 as Deel vun’t Riserva Marina Isole Pelagie ünner Naturschuul, dat sik de Bestand vun de vör’t Utstarven stahen Schildkrötenoort wedder berappeln kann.

Historie[ännern | Bornkood ännern]

Linosa weer al in de Antike bekannt un tietwies ok bewahnt. In’n Verloop vun de Tiiet harr dat Eiland ünnerscheedliche Naams. To de Tiet vun de Römers weer Linosa en Stüttpunkt för de Scheep vun de Slavenhännlers un laterhen vun de Piraten.

De Naam „Linosa“ stammt vun den Kaptein Sanvisente, de 1845 invn Opdrag vun Ferdinand II. mit üm un bi 40 Manns- un Fronslüüd an Land gahn is, üm op dat Eiland to bewahnen. To de Tiet hebbt de Inwahners noch in Höhlen huust un de ollen röömschen Zisternen bruukt, üm Water to winnen. Leevt hebbt se vun’n Fischfang un von de Bueree.

In de 1960er Johren is op Linosa en Kraftwark un en School opboet un en Telefonkavel vun Sizilien ut leegt worrn. För de Versorgen mit Water is 1973 en Anlaag to’n Seewaterentsolten inricht worrn.

Weertschap un Verkehr[ännern | Bornkood ännern]

Ok vundaag noch is de Grundlaag för’t weertschopplich Leven vun de Inwahners de Fischeree un de Landweertschap. De Bodden is fruchtbor un warrt bruukt, üm dorop Wien, Linsen un Kapern antoboen. In hüütige Tiet warrt ok de Tourismus jümmer starker un winnt an Bedüden. Dat gifft op dat eiland en poor Hotels, Gasthüüs un Teltsteden.

Na Linosa föhrt en Fährschipp vun Porto Empedocle op Sizilien ut. De Fohrt duert ruchweg söss Stünnen. Man, in de Hööftsaison vun Juni bit September drööft keen touristische Fohrtüüch op Linosa anlannen. Twüschen Linosa un Lampedusa gifft dat jeden Dag mehrere Draagflögelbööd. Vun Lampedusa ut gifft dat ok’n Flaagverbinnen na Palermo.

Weblenken[ännern | Bornkood ännern]

Linosa. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:35° 52′ N, 12° 51′ O