Liborius (Bischop)

Vun Wikipedia
Wesseln na: Navigatschoon, Söök
Wandbild vun Liborius in’n Doom to Patterbuorn

De Bischop Liborius weer een Bischop vun de franzöösche Stadt Le Mans in de late Antike. He hett in dat 4. un 5. Johrhunnert leevt un is later hillig spraken wurrn. Sturben is he up'n 23. Juli.

Leven[ännern | Bornkood ännern]

Een kann bloß man wenig seggen öber denn Bischop Liborius. Wenn dat nah de Vertellen ut dat Middelöller geiht, denn so is he 47 Johr lang Bischop vun siene Stadt ween. He schall ok een goden Fründ vun den Hilligen Martin vun Tours (†397) ween hebben. In Le Mans hefft se em al bitiets as eenen Hilligen ansehn. As de Franken ehr Kaiser Ludwig de Fromme regeeren dö (814-840), kemen siene Knaken nah Sassen in de Bischopsstadt Patterbuorn. Dat weer to de Tiet ganz begäng, dat de Reliquien vun de Hilligen ut den Westen vun dat Frankenriek nah den Oosten henstüürt wurrn sünd, nah Sassen. Düt Wannern vun de Öberresten vun de Hilligen warrt mit den Fachbegripp Translatio nömmt. Een Unbekannten ut Patterbuorn hett an't Enn vun dat 9. Johrhunnert upschreven, wo düsse Translatio tostannen kamen is. Dat weer to den Bischop Biso siene Tiet (887-909). He vertellt, dat een Grupp vun Karkenlüde ut Patterbuorn nah Le Mans hengahn is un dor vun den Bischop Aldrich (832-857) Reliquien kregen hett. Up den Weg öber Chartres un Paris sünd de denn öber den Rhien nah Sassen henbröcht wurrn. Dor sünd se denn up den Pingstdag vun dat Johr 836 ankamen. Dat weer de 28. Mai. Dat ganze Volk strööm tohopen. In Patterbuorn hett de tostännige Bischop Badurad (815-862) de Knaken in den Dom ünnerbröcht. Dor schöllt ok Wunner bi passeert sien.

Kultus[ännern | Bornkood ännern]

In Patterbuorn un annerwegens güng dat vun dor af an mit den Kultus vun den Hilligen Liborius los. Liborius is Schutzpatron vun de Stadt un vun ehren Dom wurrn. Patterbuorn weer dormit een Oort, wo Liborius in besunners groot Ansehen stünn. Man nich bloß in Westfalen, man ok in Bayern, in dat Kloster Tegernsee un in Queddelnborg wurr he al in dat 11. Johrhunnert verehrt. In dat 12. Johrhunnert geev dat ok in de Nedderlannen, in Neddersassen, in Döringen un an den Nedderrhien eenen Liborius-Kult. In dat late Middeloller is Liborius denn to den Hölpsmann gegen allerhand Pien vun dat Lief wurrn, as Steen- un Nerenpien dat weeren. Mit de Tiet vun de Reformation un de Gegenreformation änner sik ober doch allerhand in den Kult rund üm Liborius ümto. Ok in de röömsch-kathoolsche Kark güng dat nich eenfach so fudder, as vördem.

Fründschap ünner de Städer[ännern | Bornkood ännern]

Vunwegen den Translatio vun de Reliquien vun Le Mans nah Patterbuorn sünd de beiden Städer al ganz fröh Frünnen wurrn. Dat is woll de öllste Fründschup ünner Städer up de ganze Welt. Hüdigendags warrt jümmers noch dat Libori-Fest fiert to'n Andenken an den Öbergang vun de Reliquien nah Patterbuorn. Bi düt Fest weert de Reliquien denn in eenen schönen Kasten öber den Domplatz hendragen.