Løgting

Breefmarken-Gedenkutgave vun 2002, as dat 150 Johre her weer, dat dat Løgtings wedder upmaakt wurrn weer

Dat Løgting [[ˈlœktiŋg]] (bestimmte Form Løgtingið [[ˈlœktɪɲdʒɪ]], mit vullen offiziellen Naam Føroya løgting, däänschen Naam: Lagting(et) [[ˈlautɪŋ]] ([[əð]]), vun ooldnoordsch lǫgþing „Gesettversammeln, Gericht“) is dat Parlament vun de Färöer.

Dat warrt to de Welt ehre öllsten Parlamente rekent. Siene Wuddeln gaht torüch bit up dat Johr 900. Blot man vun 1816 bit 1852 sünd dor keene Afordenten tohopen kamen. Bit um un bi 1400 hett dat Althing heten.

Dat Parlamentshuus is 1856 unner Gouverneur Carl Emil Dahlerup boot wurrn. Dat besteiht ut Holt un is nich wiet af vun de Halfinsel Tinganes in de Hööftstadt Tórshavn ehr Zentrum, wo dat Thing an un for sik tohopenkamen weer. Neven düt zentrale Thing hett dat bit 1892 in elkeen vun de seven Bezirke up de Färöer noch en lokal Thing geven, dat weer dat so nömmte Várting. De seven olen Bezirke sünd in'n Oktober 2007 to een Wahlkreis tohopenleggt wurrn. Wählen un sik wählen laten dröövt all Borgerslüde, de al 18 Johre oold sünd. En Amtstied duert veer Johre, dat is avers mööglich, al vör de Tied nee Wahlen af to holen.

Dat Løgtingshuus in Tórshavn

Wo dat Woort herkamen deit

Dat Woortdeel løg kummt vun dat ooldnoordsche lǫg vun her un bedutt Regel un Gesett. Verwandt is dat mit dat engelsche law un dat latiensche lex. Dat Woortdeel ting kummt vun dat ooldnoordsche Þing, wat Raat, Versammeln, Plenum un Gericht heten deit.