Klaus Johann Jacobs

Vun Wikipedia
Wesseln na: Navigatschoon, Söök

Klaus Johann Jacobs (* 3. Dezember 1936 in Bremen; † 11. September 2008 in Küsnacht) weer en Koopmann un weer fröher düütschen Vörstand un gröttsten Inhebber vun Aktien vun den Swiezer Lebensmiddelkonzern Jacobs Suchard AG.

Vun’n Bremer Koffihannel to’n Swiezer Lebensmiddelkonzern[ännern | Bornkood ännern]

1970 hett Klaus J. Jacobs dat Föhren vun de Geschäften vun dat Koffi-Hannelshuus Johann Jacobs & Co. öbernahmen. Sien Grootunkel Johann Jacobs harr düsse Firma in de Bremer Ooltstadt grünnt. Hüdigendags höört se to Kraft Foods, wat wedder een Dochter vun Altria is, de fröher Philip Morris heten dö. 1973 hett he den Setel vun dat Hannelshuus nah Zürich leggt un 1982 öbernehm he de Swiezer Interfood mit de Firmen Tobler un Suchard. Klaus Johann Jacob is Wahl-Swiezer wurrn un hett bi dat Dressurrieden ok in de Nationalmannschup vun de Swiez mitmaakt. Sien Ökelnaam is „KJJ“.

Verkoop un wat denn keem[ännern | Bornkood ännern]

1990 verköff Klaus Jacobs de Jacobs Suchard AG an Altria. He seggt, dat weer, vunwegen datt he siene Sustern un Bröder utbetahlen möss. Denn waag he aber een neen Anfang mit Firmen, de he ut de Konkursmass vun Werner K. Rey köfft hett. Ut een Tosamensluss vun sien Firma Adia Interim mit de franzöösche Ecco (Philippe Foriel-Destezet) is de Firma Adecco SA (Tietarbeit) vun wurrn. As een Rest ut den Verkoop vun Jacobs Suchard is ok noch de Firma Barry Callebaut (Roh-Schokolaad) bi em bleben. De verscheden Andelen, de he höllt, weert midderwielen vun de Jakobs AG in Zürich verwalt’. Anunforsik woll sik Klaus Jacobs an sienen 65. Gebortsdag to Roh setten un in Newsells Park Stud bi Oxford in England up eenen Peerhoff leben. Man denn geev dat in’n Raat vun de Verwalten vun Adecco Striet mit sienen Geschäftspartner Philippe Foriel-Destezet un he stünn för een bestimmte Tiet wedder an de Spitz vun düsse Firma.

Privaat[ännern | Bornkood ännern]

Klaus Jacobs hett ut sien eerste Eh twee Söhns (Dr. Christian Jacobs un Dr. Andreas Jacobs). Ut sien tweede Eh hett he twee Söhns un twee Döchter. He sett sik för soziale Saken in un hett in dat Johr 1995 den „Chairman’s Award“ in’t Leben ropen.

De Jacobs Foundation[ännern | Bornkood ännern]

1988 hett Klaus Jacobs in Zürich de Jacobs Foundation grünnt. De hett een Stammkapital, wat nah Milliarden tellen deit. Düsse Stiftung schall hölpen, Projekten in de Forschung nah vörn to bringen un de Tostänn, in de Jugendlichen leben mütt, verbetern. An’n 1. November 2006 hett de Stiftung kunnig maakt, datt se eenen Toschuss vun 200Mio. Euro an de „International University Bremen“ geben will. Dor sünd all Sorgen vun düsse private Universität mit wegnahmen, datt se vunwegen dat Fehlen vun Geld ehr Porten tosluten mutt. För düssen Toschuss ännert de International University Bremen ehren Naam un heet vun nu af an Jacobs University Bremen. Dat Geld warrt so geven, datt dat toeerst mal fiev Johr lang jedet Johr 15 Mio. Euro gifft un denn to’n Sluss in dat Johr 2011 noch mal 125 Mio. up eenen Bulten.

Weblinks[ännern | Bornkood ännern]