Klauenrott

Vun Wikipedia
Wesseln na: Navigatschoon, Söök

De Klauenrott oder ok Footrott is en Klauensüke bi Schaap, de faken vörkummt. Se warrt in Gang sett vun de Bakterien mit Naam Dichelobacter nodosus un Fusobacterium necrophorum. Düt Bakterium kann up Weiden un in'n Grund bi 14 Daage leven, man wenn dat ungünstig kümmt, ok bit to sess Maanden. Dor schöllt Schaap üm vun Weiden, wo Deerter mit düsse Süke stahn hefft, tominnst en half Johr wegblieven. Wenn de Grund, wo de Schaap up staht, natt is un de Klauen nich gründlich pleegt weert, denn is dat goot för de Süke. De Bakterien starvt na de boven nömmte Tiet in'n Grund af un denn blievt de annern Deerter över, wo sik de Schaap ansteken könnt. Dat langt also nich hen, dat een sik um de kranken Deerter kümmern deit. De ganze Heerde mutt behannelt weern, anners steekt sik de Schaap jummers wedder an.

Süke[ännern | Bornkood ännern]

De kranken Deerter weert lamm. De Klauen kehlt un de Schaap gaht in de Knee un stütt sik dor af, vunwegen de Klauenpien. Dat Hoorn vun de Klauen lööst sik vun den Rand af an vun de Klauen af. In den Spleet, de so tostanne kümmt, sammelt sik stinkigen Eiter an.

Behanneln[ännern | Bornkood ännern]

Toeerst mütt de Klauen tosneden weern un dat up Beton, wenn dat mööglich is. Bi Klauen, de al duchtig angrepen sünd, mütt de kranken Stellen vörsichtig mit en scharp Mess afsneden weern. Achterno sünd de Klauen fröher en Minuut lang baadt weern in en Bad vun en 10-prozentig Lösung vun Koppersulfat oder Formalin. Hüdigendags weert meist Antibiotika up de kranken Steden upsmeert (as CTC-Blauspray).

De Schaap weert denn up en Weid bröcht, de tominnst en half Johr nich mehr bruukt wurrn is, dat sik de Deerter nich glieks wedder ansteken doot. Wenn dat mit de Süke al so wiet is, dat de Schaap nich mehr behannelt weern könnt, mütt se doot maakt weern.

Wat een vörweg doon kann[ännern | Bornkood ännern]

Vörweg kann en de Deerter impen. De Klauen mütt jummerweg pleegt weern. Nee Deerter schollen mit dat Footbad behannelt weern, so, as dat boven upschreven is.