Klassentreffen – Mordfall unter Freunden
| Filmdaten | |
|---|---|
| Plattdüütsch Titel: | — |
| Originaltitel: | Klassentreffen – Mordfall unter Freunden |
| Düütsch Titel: | Klassentreffen – Mordfall unter Freunden |
| Produkschoonsland: | Düütschland |
| Johr vun’t Rutkamen: | 2001 |
| Läng: | 93 Minuten |
| Originalspraak: | Düütsch |
| Öllersfreegaav in Düütschland: | FSK 12 |
| Filmkru | |
| Speelbaas: | Diethard Küster |
| Dreihbook: | Jochen Brunow |
| Produkschoon: | Kerstin Wiedé |
| Musik: | Robert Papst Wolf Wolff |
| Kamera: | Theo Angell |
| Snitt: | Daniela Beauvais |
| Dorstellers | |
| |
Klassentreffen – Mordfall unter Freunden (op Platt so veel as „Klassendrapen – Moord ünner Frünnen“) is de Titel vun en düütschen Feernsehfilm ut dat Johr 2001. De Krimi is vun den privaten Feernsehsenner Sat.1 produzeert worrn. De Hööftrull speelt Natalia Wörner.
Inholt[ännern | Bornkood ännern]
De Staatsafkaatsche Nina stickt bit to’n Hals in Arbeit un mutt sik butendem noch mit ehrn Kollegen un Leefsten Littmann rümslahn, de ehr heiraten müch. Se weet aver nich, wat se dorvun hollen will. Mehrfack röpt ehr beste Fründin ut de Schooltiet an un laadt ehr to en Klassendrapen na föffteihn Johren in. Eerst will se gor nich dorhen, maakt dat denn aver doch, üm Afstand vun ehrn Arger to winnen. In de Provinz, neemlich in Rendsborg, dröpt se denn all de ollen Bekannten wedder. Man ehr Fründin Dagmar, de dat Fest op de Been stellt und ehr de hele Tiet achterran telefoneert hett, lett sik nich sehn. Also föhrt se mit Detlev un mit ehrn dormoligen Leefsten Rainer op’n Weg, üm na ehr to kieken. De dree Frünnen finnt Dagmar aver dood in ehr Baadwann vör mit apensneden Pulsadern.
För de Polizei is de Saak kloor: Dagmar hett sik ümbröcht. Man, so gau lett sik Nina dorvun nich övertügen. Se glöövt nich an Sülvstmoord un fangt an, den Fall op egen Verantwoorten to ünnersöken. Snaaksch kummt ehr to’n Bispeel de Dokter för, de ahn Obdukschoon den Dodenschien utstellt, as Spenner un Ünnerstütter in de Apentlichkeit optreden deit un in’t Geheem en Roop as groten Wieverheld hett. Nina deckt aver ok dat een oder annere Geheemnis vun ehr Frünnen op, de na buten all so ordig un Korrekt wirken doot. Dor is to’n Bispeel Marianne, de in de Aftheek vun Dagmar arbeit un den Bedrug vun de Krankenkassen dör Dagmars Ehmann mit Medikamentenproven decken deit. Oder de Politiker Georg, de verheiraat is, aver liekers wat mit Dagmar an’t Lopen harr un bito vör en Ünnersöken steiht, vun wegen dat he bi’t Planen vun en Autobahntrass sien Fründ, den Buer un Landbesitter, Detlev to veel Geld verholpen hett. Un ok Wolfi, de in de Twüschentiet Reporter vun en öörtlich Dagblatt is un för en go’e Story ok al mol olle Frünnen dör’n Dreck tütt.
Nina ehr Ünnersöken tütt wiete Kreisen. As Georg sien Affär mit Dagmar publiek warrt, finnt sien Loopbahn as Politiker en gau Enn. Blameert in de Apentlichkeit un vör sien Familie bringt he sik üm. Op eenmol fraagt sik Nina, wat dat allns so sien Richtigkeit hett, dat se rümsnüffeln deit. Man Rainer, ehr Leef ut de Schooltiet, maakt ehr Moot wietertomaken. As jümmer klorer warrt, dat Dagmar vergift worrn is, warrt de verdächtige Dokter fastnahmen. De seggt belast nu aver Brühning, den Ehmann vun de Doden, dat he verbodenerwies mit aflopen Medikamenten Geld maken deit. De Situatschoon spitzt sik to, man opletzt kann Brühning stellt warrn, vördem he mit sien Fleger utneihn kann.
Thematik[ännern | Bornkood ännern]
Ut en harmlose Fier, de vun en Tragödie belast warrt, entwickelt sik en Geschicht vun Verwickeln. Dör den Film tütt sik de kriminalistische Ünnersöken vun den Moordfall, de eerst an’t Enn oplöst warrt. Man, de Geschicht dreiht sik vör allen ok üm de velen lütten Kavaliersdelikten, den Dörps- un Lüttstadtklüngel un de nich jümmer so reine Siet vun de Figuren, as se opletzt jeedeen opwiesen deit, un as se ok vun de Sellschop hennahmen warrt, solang een dor nich apen över snackt. Disse privaten Geschichten hebbt jemehrn Hööchpunkt, as kloor warrt, dat ok de Staatsafkaatsche, de jümmer nipp un nau op’t Gesett kieken deit, ehrn düsteren Plack in de verleden Tiet hett. Se hett neemlich inst duun an’t Stüer seten un dorbi en Unfall maakt, bi den ehr grote Leef ümkamen is. Üm ehr Schuld to verwischen hett se (mit Help vun Detlev) den Doden an’t Stüer sett. Dat is also en süütje Kriminalgeschicht ahn grote Balleree un opwännige Stunts utkummt, sik dorför aver mit mehr mit de Figuren un den sellschopplichen Filz in de lütten Stadt befaat.
De Musikgrupp[ännern | Bornkood ännern]
Ünner de Muskanten vun de Showband, de bi dat Klassendrapen för de Musik sorgen doot, sünd en Reeg vun Profimusiker, de groot rutkamen sünd:
- An’n Kontrabass steiht ’n beten verkleedt Florian Schneider-Esleben vun de Grupp Kraftwerk.
- Singer is Marian Gold, de in de 1980er Johren Spood mit de Popgrupp Alphaville harr.
- An de Orgel sitt Klaus Schulze, de as Synthesizer-Pioneer siet 1972 mehr as 100 CDs publizeert hett.
- De Gitarr warrt vun Frank Jürgen „Eff Jott“ Krüger speelt, de in de 1980er Johren bi de Grupp Ideal weer.
Websteden[ännern | Bornkood ännern]
- Klassentreffen – Mordfall unter Freunden in de Internet Movie Database (engelsch)